ரஷ்யாவின் கம்சட்கா தீபகற்பத்தில் 6.4 ரிக்டரில் சக்திவாய்ந்த நில அதிர்வு: சுனாமி எச்சரிக்கை..?

ரஷ்யாவில் கம்சட்கா தீபகற்பத்தின் தென்கிழக்கு கடற்கரையில் 6.4 ரிக்டர் அளவில் சக்தி வாய்ந்த நிலநடுக்கம் ஏற்பட்டுள்ளது. இதனை ஜெர்மன் புவியியல் ஆய்வு மையம் அறிவித்துள்ளது. குறித்த நிலநடுக்கம் 24 கிமீ ஆழத்தில் ஏற்பட்ட்டுள்ளதாகவும் தெரிவிக்கப்பட்டுள்ளது.

இந்த நிலநடுக்கத்தினால் ஏற்பட்ட பாதிப்புகள், உயிரிழப்புகள் மற்றும் சுனாமி எச்சரிக்கைகள் பற்றிய எவ்வித தகவல்களும் வெளியாகவில்லை. கம்சட்கா தீபகற்பம், பசிபிக் பெரும்பகுதியைச் சுற்றியுள்ள நெருப்பு வளையத்தில் அமைந்துள்ளது. இதனால், அடிக்கடி இங்கு நிலநடுக்கம் மற்றும் எரிமலை சீற்றம் போன்றவை ஏற்படுகின்றது.

கம்சட்கா தீபகற்பம், நில அதிர்வு நடவடிக்கைகளுக்குப் பெயர் பெற்றது. 1952 ஆம் ஆண்டில், இங்கு 9.0 ரிக்டர் அளவிலான மிகப்பெரிய நிலநடுக்கம் ஏற்பட்டது. இது, வரலாற்றில் பதிவு செய்யப்பட்ட மிக பெரிய நிலநடுக்கங்களில் ஒன்றாகும்.

சமீபத்திய இந்த நில அதிர்வுகள், அப்பகுதியின் புவியியல் உறுதியற்ற தன்மையை மீண்டும் எடுத்துக்காட்டுகிறது. இந்நிலையில், தற்போதைய நிலநடுக்கத்தைத் தொடர்ந்து நிலைமை ரஷ்யா மற்றும் சர்வதேச புவியியல் நிறுவனங்களால் தொடர்ந்து கண்காணிக்கப்பட்டு வருகிறது.