மனிதர்களை மீண்டும் நிலவுக்கு அனுப்பும் மகத்தான கனவை நோக்கி அமெரிக்காவின் விண்வெளி ஆராய்ச்சி நிறுவனம் நாசா புதிய உற்சாகத்துடன் தனது முயற்சிகளை தீவிரப்படுத்தியுள்ளது. பல கட்டங்களாக நடத்தப்பட்ட கடுமையான சோதனைகளைக் கடந்த பிறகு, ஆர்டெமிஸ்-2 திட்டம் வெற்றிகரமாக முன்னேறியுள்ளது.

இந்த மாபெரும் பயணத்தில், கனடாவைச் சேர்ந்த ஒருவரை உட்பட நான்கு திறமையான விண்வெளி வீரர்கள் பங்கேற்றுள்ளனர். அவர்கள் முதற்கட்டமாக ஒரு முழு நாளுக்கு பூமியைச் சுற்றி வந்து, விண்கலத்தின் உயிர் காக்கும் அமைப்புகள் அனைத்தும் சீராக செயல்படுகிறதா என்பதை பரிசோதித்தனர்.

அதனைத் தொடர்ந்து, ‘டிரான்ஸ்லூனார் இன்ஜெக்ஷன்’ எனப்படும் சக்திவாய்ந்த என்ஜின் எரிப்பின் மூலம், அவர்கள் நிலவை நோக்கி துல்லியமாக செலுத்தப்பட்டனர். இந்த பயணத்தின் முக்கிய அம்சமாக, நிலவின் இதுவரை மனிதர்கள் நேரடியாக பார்க்காத மறுபக்கத்தை மிக அருகில் இருந்து காணும் வரலாற்றுச் சாதனையை அவர்கள் உருவாக்க உள்ளனர்.

இந்தப் பெரும் திட்டத்தின் மொத்த மதிப்பு சுமார் ரூ.8.64 லட்சம் கோடி என தெரிவிக்கப்படுகிறது. மேலும், இந்த பயணம் 2028ஆம் ஆண்டில் திட்டமிடப்பட்டுள்ள ஆர்டெமிஸ்-4 மனிதர் நிலவிறக்கம் முயற்சிக்கான முக்கிய முன்னோட்டமாக அமையும்.ஆர்டெமிஸ்-2 விண்கலம், கடந்த 2ஆம் தேதி அமெரிக்காவின் புளோரிடா மாநிலத்தில் இருந்து விண்ணில் பாய்ந்தது.

தற்போது அது நிலவின் வட்டப்பாதையை நெருங்கி வருகிறது. இன்று இரவு, ஓரியன் விண்கலம் நிலவின் மறுபக்கத்தை நோக்கி நகரும் நிலையில், விண்வெளி வீரர்கள் நிலவின் மேற்பரப்பை நெருக்கமாக ஆய்வு செய்ய உள்ளனர்.