பாலஸ்தீனத்தையும், பிரிட்டன் பல ஆண்டுகளாக ஆட்சி செய்தது. பாலஸ்தீனத்தில் இருந்து பிரிட்டன் வெளியேறிய பின், ஜெருசலேம் உள்ளிட்ட முக்கிய நகரங்களை உள்ளடக்கி இஸ்ரேல் என்ற தனிநாடு யூதர்களால் தோற்றுவிக்கப்பட்டதை அடுத்து, காசா, மேற்கு கரை என இரண்டு முக்கிய நகரங்களை பாலஸ்தீனம் வைத்திருந்தது.

ஆனால் 1967-ஆம் ஆண்டு அரபு நாடுகளின் கூட்டணிக்கு எதிராக இஸ்ரேல் போர் தொடுத்தது. அப்போது பாலஸ்தீனத்தின் பெரும்பான்மையான பகுதிகளை தன் வசப்படுத்தியது. இது கிழக்கில் ஜோர்டான் நதியிலிருந்து மேற்கில் மத்திய தரைக் கடல் வரை நீண்டுள்ளது. இந்த போரின் முடிவில், இஸ்ரேல், மேற்குக் கரையின் பெரும்பான்மையான பகுதிகளை ஆக்கிரமித்தது. இதனால் பாலஸ்தீனியர்களுக்கும், இஸ்ரேலுக்கும் தற்போது வரை மோதல் நீடித்து வருகிறது.

அதன் ஒரு பகுதியாகவே காசாவை கட்டுப்பாட்டில் வைத்திருக்கும் ஹமாஸ் பயங்கரவாதிகளும் இஸ்ரேல் மீது தாக்குதல் நடத்தி வருகின்றனர். இஸ்ரேல் -ஹமாஸ் போர் இரண்டு ஆண்டுகளைக் கடந்துள்ள நிலையில், அமெரிக்கா தலையீட்டால் தற்காலிகமாக போர் நிறுத்தம் அமலில் உள்ளது.

இந்நிலையில், மீண்டும் பிரச்னையை துாண்டும் விதமாக மேற்குக் கரையை தங்கள் நாட்டுடன் இணைக்கும் மசோதா இஸ்ரேல் பாராளுமன்றத்தில் தாக்கல் செய்யப்பட்டுள்ளது. அதாவது, 'யூதேயா மற்றும் சமாரியாவில் இஸ்ரேலிய இறையாண்மையைப் பயன்படுத்துதல்' என்று குறிப்பிடப்படும் இந்த மசோதா, மிகக் குறுகிய வாக்கு வித்தியாசத்தில் நிறைவேற்றப்பட்டுள்ளது. இதனையடுத்து இஸ்ரேல் பாராளுமன்றம் முதற்கட்டமாக இந்த மசோதாகவுக்கு ஒப்புதல் வழங்கியுள்ளது. தொடர்ந்து வெளியுறவு மற்றும் பாதுகாப்புக் குழு விவாதத்திற்கு அனுப்பி வைக்கப்படவுள்ளது.

அமெரிக்க துணை அதிபர் ஜே.டி. வான்ஸ், இஸ்ரேலில் இருக்கும் நிலையிலேயே இந்த மசோதா நிறைவேற்றப்பட்டுள்ளமை குறிப்பிடத்தக்கது. இஸ்ரேலின் இந்த முயற்சிக்குவான்ஸ் அதிருப்தி தெரிவித்துள்ளார். அத்துடன், அமெரிக்க வெளியுறவு அமைச்சர் மார்கோ ரூபியோவும் கண்டனம் தெரிவித்துள்ளார். இது காசாவில் போர் நிறுத்த ஒப்பந்தத்திற்கு குந்தகம் விளைவிப்பது போன்றது எனவும் அவர் குறிப்பிட்டுள்ளார்.

இந்நிலையில், இஸ்ரேலின் இந்த செயல், காலனித்துவ ஆக்கிரமிப்பின் அசிங்கமான முகத்தை பிரதிபலிக்கிறது என்று ஹமாஸ் அறிக்கை வெளியிட்டுள்ளது. மேற்குக் கரை நிலங்களை இணைக்கும் முயற்சி பலிக்காது என்றும், மேற்குக் கரை பாலஸ்தீன பிரதேசம் என்ற உண்மையை மாற்றாது என்றும் அந்த அறிக்கையில் ஹமாஸ் மேலும்  குறிப்பிட்டுள்ளது.