மத்திய கிழக்கில் பதற்றம் உச்சக்கட்டத்தை எட்டியுள்ள நிலையில், அமெரிக்காவுக்கு நேரடி எச்சரிக்கை விடுக்கும் வகையில் பஹ்ரைன் மற்றும் குவைத் ஆகிய நாடுகளின் மீது ஈரான் அதிரடியாக ஏவுகணை மற்றும் ட்ரோன் (Drone) தாக்குதல்களை நடத்தியுள்ளது. அமெரிக்கா தனது ராணுவத் தாக்குதல்களை நிறுத்தவில்லை எனில், இந்தத் தாக்குதல்கள் தொடரும் என்றும், இரு நாடுகளுக்கு இடையே நடந்து வரும் அமைதிப் பேச்சுவார்த்தை முழுமையாக நிறுத்தப்படும் என்றும் ஈரான் அச்சுறுத்தியுள்ளது.

மோதலின் பின்னணி

கத்தார் நாட்டுக்குச் சொந்தமான எரிசக்தி நிறுவனத்திற்காகக் கச்சா எண்ணெய் ஏற்றிச் சென்ற கப்பல் மீது ஈரான் முதலில் தாக்குதல் நடத்தியது. இதற்குப் பதிலடி கொடுக்கும் வகையில், ஈரானின் ராணுவ உள்கட்டமைப்புகள் மற்றும் பாதுகாப்புத் தளங்களை இலக்காகக் கொண்டு அமெரிக்கா கடுமையான வான்வழித் தாக்குதலை நடத்தியதாக அதிகாரப்பூர்வமாகத் தெரிவித்தது. இந்த மோதலின் தொடர்ச்சியாகவே, தற்போது பஹ்ரைன் மற்றும் குவைத் ஆகிய நாடுகளை நோக்கி ஈரான் தனது ஏவுகணைகளை ஏவியுள்ளது.

தாக்குதலுக்குள்ளான இலக்குகள்

ஈரான் பாதுகாப்புப் படை வெளியிட்டுள்ள அதிகாரப்பூர்வ தகவலின்படி, இந்தத் தாக்குதலில் பின்வரும் முக்கிய ராணுவ நிலைகள் இலக்காக்கப்பட்டுள்ளன:
பஹ்ரைன்: அங்கு நிலைநிறுத்தப்பட்டுள்ள அமெரிக்க கடற்படையின் 5-வது படைப்பிரிவு தலைமையகம் (US Navy 5th Fleet HQ).
குவைத்: குவைத்தில் அமைந்துள்ள அல் அசாத் விமானப்படை தளம் (Al Asad Air Base).

முறியும் நிலையில் இடைக்கால ஒப்பந்தம்

ஈரான் மற்றும் அமெரிக்கா இடையே நிலவி வரும் போரை நிரந்தரமாக முடிவுக்குக் கொண்டு வருவதற்காக, இரு தரப்பிற்கும் 60 நாட்கள் அவகாசம் அளிக்கப்பட்டு அண்மையில் ஓர் இடைக்கால ஒப்பந்தம் போடப்பட்டிருந்தது. ஆனால், தற்போதைய சூழலில் அந்தப் பேச்சுவார்த்தை மற்றும் ஒப்பந்த விதிகள் முற்றிலும் மீறப்படும் என இதுவரை இல்லாத அளவிற்கு ஈரான் கடுமையான எச்சரிக்கையை விடுத்துள்ளது.

"போர் நிறுத்த ஒப்பந்தத்தை எதிரி தரப்பு மீறுவது, தற்போது பிராந்தியத்தில் சுமூக நிலையை ஏற்படுத்த நடந்து வரும் அனைத்து பேச்சுவார்த்தைகளையும் முழுமையாக முடக்கிவிடும் என்பதை அவர்கள் உணர்ந்து கொள்ளட்டும்" என்று ஈரான் பாதுகாப்புப் படை எச்சரித்துள்ளது. இந்தத் திடீர் ஏவுகணைத் தாக்குதல்களால் வளைகுடா நாடுகளில் மீண்டும் போர் மேகங்கள் சூழ்ந்துள்ளன.