1980-களில் மலேசியக் கால்பந்து அணியின் முன்னணி நட்சத்திரமாகத் திகழ்ந்த முன்னாள் வீரர் டத்தோக் அப்தா அலிப் (72), 20 வயதான இளம்பெண் ஒருவரைத் திருமணம் செய்து கொண்டுள்ள சம்பவம் சமூக வலைதளங்களில் பெரும் கவனத்தையும் விவாதத்தையும் ஈர்த்து வருகிறது. 1970-களின் பிற்பகுதியிலும் 1980-களின் தொடக்கத்திலும் மலேசிய தேசிய அணியின் தவிர்க்க முடியாத ஆட்டக்காரராக விளங்கிய இவர், 1980-ஆம் ஆண்டு மாஸ்கோ ஒலிம்பிக் போட்டிக்குத் தகுதிபெற்ற வரலாற்றுச் சிறப்புமிக்க தேசிய அணியில் இடம்பெற்றுப் புகழ் பெற்றவர் என்பது குறிப்பிடத்தக்கது.

இவர்களது திருமணம் கடந்த ஆகஸ்ட் 27-ஆம் தேதி கோலா திராங்கானுவில் இரு வீட்டாரின் பூரண சம்மதத்துடனும் ஆசிகளுடனும் மிகவும் எளிமையான முறையில் நடைபெற்று முடிந்துள்ளது. திருமணம் முடிந்து புதுமணத் தம்பதியினர் தற்போது தேனிலவு சென்றுள்ளதால், இந்த நிகழ்வு குறித்து அப்தா அலிப்பைத் தொலைபேசியில் உடனடியாகத் தொடர்புகொள்ள இயலவில்லை.

எனினும், முன்னாள் தேசிய வீரரும் அப்தா அலிப்பின் தம்பியுமான டத்தோக் யூனுஸ் அலிப் இத்திருமணச் செய்தியை ஊடகங்களிடம் அதிகாரப்பூர்வமாக உறுதிப்படுத்தியுள்ளார். இரு குடும்பங்களின் நல்வாழ்த்துகளுடன் திருமணம் இனிதே முடிந்ததாகவும், அவர்கள் இருவரும் தங்களின் புதிய வாழ்க்கைப் பயணத்தில் என்றென்றும் மகிழ்ச்சியாக வாழ வாழ்த்துவதாகவும் அவர் தெரிவித்துள்ளார்.

சுமார் 52 ஆண்டுகள் வயது வித்தியாசம் கொண்ட இத்திருமணத்தின் புகைப்படங்கள் இணையத்தில் தீயாய் பரவி வருகின்றன. 72 வயது முன்னாள் விளையாட்டு வீரர் 20 வயதுப் பெண்ணைக் கரம்பிடித்துள்ள இந்த நிகழ்வு, மலேசியக் கால்பந்து ரசிகர்கள் மற்றும் சமூக வலைதளப் பயனர்களிடையே பெரும் வியப்பையும் சுவாரசியமான விவாதங்களையும் ஏற்படுத்தியுள்ளது.