நமது அண்டைய தீவு நாடான இலங்கை டிட்வா புயல் காரணமாக வரலாறு காணாத அளவு மழை, காட்டாறு வெள்ளம் மற்றும் சூறாவளியால் நிலை குலைந்து போயுள்ளது. இதன் போது பலியானவர்களின் எண்ணிக்கை எண்ணிக்கை 132 ஆக உயர்ந்துள்ளது. 176 பேர் இதுவரை காணாமல் போயுள்ளதாக அனர்த்த நிலையம் அறிவித்துள்ளது.

நாட்டை புரட்டிபோட்டுள்ள டிட்வா புயலில் கோரத்தாண்டவத்தையை அடுத்து அவசர நிலை பிரகடனப்படுத்தப்பட்டுள்ளது. இலங்கையின் மொத்தம் உள்ள 25 மாவட்டங்களில் முக்கால்வாசி மாவட்டங்கள் நீரில் மூழ்கியுள்ளன. அத்துடன், மலையக பகுதிகள் உள்ளிட்ட பல மாகாணங்களில் கடும் சீதம் ஏற்பட்டுள்ளதோடு, பெரும் வெள்ளம் மற்றும் நிலச்சரிவு காரணமாக, லட்சக்கணக்கான மக்கள் கடுமையாக பாதிக்கப்பட்டுள்ளனர். 

வெள்ளம் மற்றும் நிலச்சரிவினால் காணாமல் போனவர்களை தேடும் பணிகள் தீவிரப்படுத்தப்பட்டுள்ளன. டிட்வா புயலின் சேதாரம் கடுமையாக இருப்பதால் இலங்கை அரசு  அவசர நிலை பிரகடனப்படுத்தப்படுத்தியுள்ளது. 

மேலும், வானிலை நிலவரம் சாதகமாக இல்லாத காரணத்தினால் துபாயில் இருந்து இலங்கை வழியாக புறப்பட்ட இந்தியா விமானம், கொழும்பில் முன் எச்சரிக்கையாக தரையிறக்கப்பட்டுள்ளது. அதில் உள்ள 300க்கும் மேற்பட்ட பயணிகள் அங்கேயே தங்க வைக்கப்பட்டுள்ள நிலை உருவாகியுள்ளது.

சீரற்ற காலநிலையால் ஏற்பட்ட வெள்ளப்பெருக்கில் இருந்து மக்களை காப்பாற்றும் நடவடிக்கைகளை ஜனாதிபதி அநுரகுமார திசாநாயக்க கண்காணித்துள்ளார்.

இந்த சூழலில் அநுராதபுரம் - புத்தளம் வீதியில் உள்ள கலா ஓயா பாலத்தின் அருகில் வெள்ளத்தில் சிக்கிய பேருந்திலுள்ள பயணிகளை மீட்கும் நடவடிக்கை முன்னெடுக்கபட்டுள்ளது.  பேருந்தில் சிக்கியிருந்த 67 பேரும் பாதுகாப்பாக மீட்கப்பட்டுள்ளதாக கடற்படை தெரிவித்துள்ளது.

நேரடியாக சென்று காப்பாற்ற முடியாத சூழ்நிலையில் ஹெலிகொப்டர்களை அதிகம் பயன்படுத்துமாறு ஜனாதிபதி அநுரகுமார திசாநாயக்க உத்தரவிட்டுள்ளமை குறிப்பிடத்தக்கது. இலங்கை கடற்படையின் பல்வேறு பிரிவுகளைச் சேர்ந்த வீரர்கள் அதிகாலை முதல் வேளையில் மீட்பு பணியில் ஈடுபட்டு வருகின்றனர்.

இந்த அவசகல சூழலில் இந்திய தூதரகம் வெளியிட்டுள்ள அறிக்கையில் கூறியுள்ளதாவது: இலங்கையில் உள்ள இந்தியர்களுக்கு உதவ கொழும்புவில் உள்ள பண்டாரநாயக்கே சர்வதேச விமான நிலையத்தில் இந்திய தூதரகம் அவசர உதவி மையத்தை அமைத்துள்ளது.

சகல இந்திய பயணிகளுக்கும் தேவையான உணவு மற்றும் குடிநீர் வசதிகள் உள்ளிட்ட தேவைப்படும் சகல உதவிகளையும் இந்திய தூதரகம் வழங்கி வருகின்றது. உதவிகள் தேவைப்படும் இந்திய பயணிகள் அவசர உதவி தொலைபேசி இலக்கமான +94773727832 ஐ தொடர்புகொள்ளவும்.'' என குறிப்பிடப்பட்டுள்ளது.