கள்ளத்தொடர்பு தொடர்பான முன்விரோதத்தில் திருவள்ளூர் அருகே பெயிண்டர் ஒருவரை காரால் மோதி கீழே தள்ளிய மர்ம கும்பல், அவரை பட்டப்பகலில் பொதுமக்கள் முன்னிலையில் ஓட ஓட விரட்டி கொடூரமாக வெட்டிக்கொலை செய்த சம்பவம் பெரும் பரபரப்பை ஏற்படுத்தியுள்ளது. இந்தச் சம்பவத்தில் தொடர்புடையதாகக் கருதப்படும் 5 பேரை காவலர்கள் கைது செய்து விசாரணை நடத்தி வருகின்றனர்.

திருவள்ளூர் மாவட்டம் சிற்றத்தூர் கிராமத்தைச் சேர்ந்த மாரி என்ற ரூபன் (32), பெயிண்டராக பணியாற்றி வந்தார். இவர் மீது அடிதடி உள்ளிட்ட சில குற்ற வழக்குகள் ஏற்கெனவே நிலுவையில் இருந்ததாகத் தெரிவிக்கப்படுகிறது. கடந்த சில நாட்களுக்கு முன்பு மின்வாரிய அதிகாரிகளை பணி செய்யவிடாமல் தடுத்து தகராறில் ஈடுபட்டதாக மாரியை காவலர்கள் கைது செய்தனர். பின்னர் பிணையில் வெளியே வந்த அவர், வெங்கல் காவல் நிலையத்தில் தினமும் கையெழுத்திட்டு வந்தார்.

இந்த நிலையில், வழக்கம்போல் நேற்று காலை 11 மணியளவில் வெங்கல் காவல் நிலையத்துக்குச் சென்ற மாரி, அங்கு கையெழுத்திட்டுவிட்டு தனது நண்பர் வெங்கடேசனுடன் மோட்டார் சைக்கிளில் புறப்பட்டார். வெங்கடேசன் வாகனத்தை ஓட்டிய நிலையில், மாரி பின்னால் அமர்ந்திருந்தார். இருவரும் தாமரைப்பாக்கம் கூட்டுச்சாலை நோக்கிச் சென்றுகொண்டிருந்தனர்.

அவர்கள் பாகல்மேடு பேருந்து நிறுத்தம் அருகே சென்றபோது, பின்னால் வந்த கார் ஒன்று திடீரென மோட்டார் சைக்கிள் மீது வேகமாக மோதியதாகத் தெரிவிக்கப்படுகிறது. இதில் நிலைதடுமாறிய இருவரும் சாலையில் விழுந்தனர். விபத்து நடந்த சில நொடிகளிலேயே காரில் இருந்து 5 பேர் கொண்ட கும்பல் பயங்கர ஆயுதங்களுடன் இறங்கியதாகத் தெரிவிக்கப்படுகிறது.

உயிரைக் காப்பாற்ற ஓடியும் விடாத கொலையாளிகள்

கத்தி, அரிவாள் உள்ளிட்ட ஆயுதங்களுடன் மாரியை சுற்றிவளைத்த அந்த கும்பல், அவரை தாக்க முயன்றதாகத் தெரிவிக்கப்படுகிறது. இதனால் உயிருக்கு அஞ்சி மாரி அங்கிருந்து ஓட்டம் பிடித்தார். ஆனால் அவரை விடாமல் பின்தொடர்ந்த கும்பல், பொதுமக்கள் நடமாட்டம் மிகுந்த சாலையிலேயே ஓட ஓட விரட்டி சரமாரியாக வெட்டியதாகத் தெரிவிக்கப்படுகிறது.

இந்த கொடூர தாக்குதலில் பலத்த காயமடைந்த மாரி, ரத்த வெள்ளத்தில் சம்பவ இடத்திலேயே பரிதாபமாக உயிரிழந்தார். அவரது மணிக்கட்டு பகுதியில் பலத்த வெட்டுக்காயம் ஏற்பட்டதுடன், முகத்திலும் கொடூரமான காயங்கள் ஏற்பட்டிருந்ததாகத் தெரிவிக்கப்படுகிறது. பட்டப்பகலில் நடந்த இந்த சம்பவத்தை நேரில் பார்த்த பொதுமக்கள் அதிர்ச்சியில் உறைந்தனர்.

காரை மடக்கிய பொதுமக்கள்

கொலையை அரங்கேற்றிய பின்னர் அந்தக் கும்பல் மீண்டும் காரில் ஏறி தப்பிச் செல்ல முயன்றதாகத் தெரிவிக்கப்படுகிறது. அப்போது வேகமாகச் சென்ற கார் அருகில் உள்ள வீட்டின் சுவரில் மோதி நின்றது. இதையடுத்து அங்கு திரண்ட பொதுமக்கள் காரில் இருந்த 3 பேரை மடக்கிப் பிடித்தனர்.

இதுகுறித்து தகவல் அறிந்த வெங்கல் காவலர்கள் சம்பவ இடத்துக்கு விரைந்து சென்று, பொதுமக்களிடம் சிக்கிய 3 பேரையும் கைது செய்தனர். அவர்களிடம் நடத்தப்பட்ட விசாரணையில், கீழானூர் பகுதியைச் சேர்ந்த தீனா (25), நரேஷ் (20), விக்கி என்ற கலாநிதி (23) என்பது தெரியவந்தது.

மேலும், கொலை சம்பவத்துக்குப் பிறகு தலைமறைவான மேலானூர் பகுதியைச் சேர்ந்த பேரரசு (19), ராஜ்குமார் (20) ஆகிய இருவரையும் ஊத்துக்கோட்டை துணை காவல் கண்காணிப்பாளர் வினோத்குமார் தலைமையிலான காவலர்கள் தேடிப்பிடித்து கைது செய்தனர். கொலைக்கு பயன்படுத்தப்பட்ட கார் மற்றும் அரிவாள் உள்ளிட்ட ஆயுதங்களும் பறிமுதல் செய்யப்பட்டன.

பழிவாங்கும் நோக்கில் கொலை?

கைது செய்யப்பட்ட 5 பேரிடமும் காவலர்கள் நடத்திய விசாரணையில், கொலைக்கான பின்னணி குறித்து பரபரப்பான தகவல்கள் வெளியாகியுள்ளதாகத் தெரிவிக்கப்படுகிறது. கைது செய்யப்பட்ட தீனாவின் திருமணமான சகோதரி தீபாவுக்கும், கொலை செய்யப்பட்ட மாரிக்கும் இடையே கள்ளத்தொடர்பு இருந்ததாகக் கூறப்படுகிறது.

இதனால் குடும்பத்தில் ஏற்பட்ட பிரச்சினையில், தீபாவின் கணவர் அவரை தாக்கி தாய் வீட்டுக்கு அனுப்பியதாகத் தெரிவிக்கப்படுகிறது. இதைத்தொடர்ந்து, கடந்த டிசம்பர் மாதம் தீபா தூக்கிட்டு உயிரை மாய்த்துக் கொண்டதாகவும், அவரது மரணத்துக்கு மாரிதான் காரணம் என தீனா கருதியதாகவும் விசாரணையில் தெரியவந்துள்ளதாகத் தெரிவிக்கப்படுகிறது.

இதனால் மாரியை பழிவாங்கும் நோக்கில் கூட்டாளிகளுடன் சேர்ந்து திட்டமிட்டு கொலை செய்ததாக காவலர்களின் விசாரணையில் தெரியவந்துள்ளதாகத் தெரிவிக்கப்படுகிறது. இந்தக் கொலை சம்பவத்தின் பின்னணி மற்றும் தொடர்புடைய நபர்கள் குறித்து காவலர்கள் தொடர்ந்து தீவிர விசாரணை மேற்கொண்டு வருகின்றனர்.

மேலும், கொலை செய்யப்பட்ட மாரிக்கு மனைவியும், இரண்டு மகன்களும் உள்ளனர். கள்ளத்தொடர்பு விவகாரத்தில் ஏற்பட்ட முன்விரோதம், பட்டப்பகலில் கொடூர கொலையாக மாறிய சம்பவம் திருவள்ளூர் பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.