பின்லாந்தில், ஆன்லைன் கேமிங் லைவ்ஸ்ட்ரீம் விளையாட்டின் போது, 32 வயதான பெண் ஒருவர் கொடூரமாகக் குத்திக் கொலை செய்யப்பட்ட சம்பவம் உலகளவில் அதிர்ச்சியை ஏற்படுத்தியுள்ளது.

விசாரணை அதிகாரிகள் தெரிவித்ததாவது: புமலா (Puumala) என்ற இடத்தில் வசித்த அந்தப் பெண், பிரிட்டனில் உள்ள தனது நண்பருடன் கிட்டத்தட்ட 10 மணி நேரத்திற்கும் மேலாக ஆன்லைன் கேமில் ஈடுபட்டிருந்தார். ஏப்ரல் 23 அதிகாலை 5 மணியளவில், திடீரென ஜன்னல் உடைக்கப்படும் சத்தம் கேட்டது.

அச்சமடைந்த பிரிட்டன் நண்பர், “கதவை பூட்டிவிட்டாயா?” என கேள்வியெழுப்பினார். ஆனால் சில நிமிடங்களுக்குள், அந்நியர் ஒருவர் அந்தப் பெண்ணுடன் பின்னிஷ் மொழியில் பேசுவது கேட்கப்பட்டதாகவும், பின்னர் கூச்சலிடும் சத்தமும் கேட்கப்பட்டதாகவும் நண்பர் சாட்சியளித்துள்ளார்.

 தன்னால் உடனடியாக உதவ முடியாத நிலையில், அந்த நண்பர் பின்லாந்து காவல்துறைக்கு மின்னஞ்சல் மூலம் தகவல் அனுப்பியுள்ளார். சம்பவ இடத்திற்கு விரைந்த போலீசார், பெண்ணை வீட்டில் பல குத்துக் காயங்களுடன் சடலமாகக் கண்டனர்.

 கொலையாளியின் இறுதி
கொலை செய்த நபர், அங்கிருந்து சுமார் 30 மைல் தூரத்தில் உள்ள ஜுவா (Juva) என்ற இடத்திற்குச் சென்று ஒரு கொட்டகைக்கு தீ வைத்துள்ளார். பின்னர் தீயிலிருந்து வெளியே வந்த அவர் சரிந்து விழுந்ததாக சாட்சிகள் தெரிவித்துள்ளனர். பலத்த தீக்காயங்களுடன் மருத்துவமனைக்குக் கொண்டு செல்லப்பட்ட அவர், சிகிச்சை பலனின்றி உயிரிழந்தார்.

விசாரணையில், அந்த நபருக்கு முன்பு எந்த குற்றப் பதிவும் இல்லை என்றும், பாதிக்கப்பட்ட பெண்ணுடன் நேரடி தொடர்பும் இல்லை என்றும் தெரியவந்துள்ளது. விளக்குகள் எரிந்திருந்ததால் எளிதாக நுழையக்கூடிய வீடாக இருந்ததே குற்றவாளியின் தேர்வுக்குக் காரணம் என போலீசார் கருதுகின்றனர்.

உலகம் தழுவிய கேமிங் லைவ்ஸ்ட்ரீம் அபாயங்கள்
சமீப காலமாக ஆன்லைன் கேமிங் மற்றும் லைவ்ஸ்ட்ரீம் நடைபெறும் நேரங்களில் குற்றச்சம்பவங்கள் அதிகரித்துள்ளன. சில வாரங்களுக்கு முன்பு, பிரான்ஸ் நாட்டைச் சேர்ந்த யூடியூபர் ராஃபேல் கிரேவன் (Raphael Graven), ‘Kick’ தளத்தில் நேரலையில் விளையாடிக்கொண்டிருந்தபோது, இரண்டு பேர் தாக்கி சித்திரவதை செய்ததில் உயிரிழந்தார்.

 இந்த தொடர் சம்பவங்கள், ஆன்லைன் கேமிங் மற்றும் லைவ்ஸ்ட்ரீமிங் பாதுகாப்பைச் சார்ந்த கேள்விகளை எழுப்பியுள்ளன. நிபுணர்கள், “விளையாட்டு வீரர்களும் பார்வையாளர்களும் பாதுகாப்பு முன்னெச்சரிக்கைகளை கடைபிடிக்க வேண்டும்” என எச்சரிக்கை விடுத்துள்ளனர்.