இந்தியாவின் ஒட்டுமொத்த நீர் ஆதாரத்திற்கும், விவசாயப் பெருங்குடி மக்களின் வாழ்வாதாரத்திற்கும் முதுகெலும்பாக விளங்குவது ஜூன் மாதம் தொடங்கி செப்டம்பர் மாதம் வரை நீடிக்கும் தென்மேற்கு பருவமழையாகும். வழக்கமாக கேரளாவில் தொடங்கி கடலோர கர்நாடகா, மும்பை, டெல்லி, கொல்கத்தா மற்றும் வடகிழக்கு மாநிலங்கள் என நாடு முழுவதும் படிப்படியாக முன்னேறும் இந்தப் பருவமழை, இந்த ஆண்டு நாளை (ஜூன் 4) முதல் கேரளா மற்றும் தமிழகப் பகுதிகளில் அதிகாரப்பூர்வமாகத் தொடங்கவுள்ளதாக இந்திய வானிலை ஆய்வு மையம் (IMD) அதிரடியாக அறிவித்துள்ளது.

மழை பெய்யப்போகும் முக்கியப் பகுதிகள்:

தென்மேற்கு மற்றும் தென்கிழக்கு அரபிக்கடல், லட்சத்தீவுகள், தமிழகத்தின் ஒரு சில பகுதிகள் மற்றும் வங்காள விரிகுடாவின் மத்திய வடகிழக்கு பகுதிகளில் பருவமழை தீவிரமடைவதற்கான சாதகமான சூழல் தற்பொழுது கனிந்துள்ளது. தமிழகத்தில் கடந்த சில நாட்களாகக் கோடை வெயிலின் தாக்கம் இயல்பை விட 2°C வரை அதிகமாகப் பதிவாகி மக்களை வாட்டி வதைத்து வந்த நிலையில், இந்தப் பருவமழையின் வருகை வெப்பத்தைத் தணித்து பெரும் நிம்மதியைத் தரவுள்ளது.

அதிக வாய்ப்புள்ள மாவட்டங்கள்: கன்னியாகுமரி, திருநெல்வேலி, தென்காசி மற்றும் மேற்குத் தொடர்ச்சி மலைப்பகுதியை ஒட்டியுள்ள மாவட்டங்களில் பரவலாகக் கனமழை பெய்யக்கூடும்.

 மாறும் வானிலை: ஜூன் மாதத்தைப் பொறுத்தவரை வெப்பமும், அதைத் தொடர்ந்து மழையும் மாறி மாறி கண்ணாமூச்சி ஆட வாய்ப்புள்ளது.

சென்னை வானிலை ஆய்வு மையத்தின் எச்சரிக்கை:

சூறாவளிக் காற்று எச்சரிக்கை: பருவமழை தொடங்குவதையொட்டித் தமிழகக் கடலோரப் பகுதிகளில் பலத்த சூறாவளிக் காற்று வீசக்கூடும். எனவே, பொதுமக்கள் மற்றும் கடலுக்குச் செல்லும் மீனவர்கள் வானிலை எச்சரிக்கைகளைக் கவனித்துத் தேவையான பாதுகாப்பு முன்னெச்சரிக்கைகளுடன் இருக்க வேண்டும்.

இதற்கிடையில், இந்த பருவமழை வருகையின் முன்னோட்டமாகக் கன்னியாகுமரி மாவட்டத்தின் பல்வேறு பகுதிகளில் தற்போதே இதமான சூழலுடன் சாரல் மழை பெய்யத் தொடங்கியுள்ளது. மேகமூட்டத்துடன் பெய்து வரும் இந்தத் தொடர் மழையால் அப்பகுதி விவசாயிகளும் பொதுமக்களும் மிகுந்த மகிழ்ச்சி அடைந்துள்ளனர்.