தென்கிழக்கு வங்கக் கடலில் புதிய காற்றழுத்த தாழ்வு! 26-28 தேதிகளில் புயல் அபாயம்

தமிழ்நாட்டில் வடகிழக்கு பருவமழை தொடர்ந்து தாக்கம் செலுத்துகிறது. இன்று தெற்கு அந்தமான் மற்றும் தென்கிழக்கு வங்கக் கடலில் புதிய காற்றழுத்த தாழ்வு உருவாகியுள்ளதாக வானிலை ஆய்வு மையம் தெரிவித்துள்ளது.

இந்த குறைந்த அழுத்த மண்டலம் மேற்கு-வடமேற்கு திசை நோக்கி நகர்ந்து, 26-ந் தேதி ஆழ்ந்த காற்றழுத்த மண்டலமாக, 27-28-ந் தேதிகளில் மத்திய மேற்கு வங்கக் கடலில் புயலாக வலுப்பெறும் வாய்ப்பு உள்ளது.

இதன் தாக்கத்தால் கோவை, நீலகிரி, ஈரோடு, திருப்பத்தூர், வேலூர், ராணிப்பேட்டை மாவட்டங்களில் இன்று ஓரிரு இடங்களில் கனமழை பெய்யும் என எதிர்பார்க்கப்படுகிறது.

சென்னை மற்றும் புறநகர் பகுதிகளில் 26-28-ந்தேதிகளில் இடை இடையே கனமழை, சில இடங்களில் மிக கனமழையும் பெய்யும் வாய்ப்பு உள்ளது.மேலும் புதுக்கோட்டை, தஞ்சாவூர், நாகை, திருவாரூர், மயிலாடுதுறை, கடலூர், காரைக்கால் மாவட்டங்களிலும் நாளை கனமழை பெய்யும் என்று வானிலை ஆய்வு மையம் அறிவித்துள்ளது.