நிலவின் மர்மங்களை அவிழ்க்கும் விண்வெளி வேட்டையில், அமெரிக்காவின் 'ஆர்டெமிஸ்-2' மற்றும் இந்தியாவின் 'சந்திரயான்-3' ஆகிய இரண்டும் மனிதகுல வரலாற்றின் இரு பெரும் துருவங்களாகத் திகழ்கின்றன. இரண்டுமே நிலவை நோக்கிய பயணங்கள் என்றாலும், அவற்றின் வியூகமும் இலக்கும் முற்றிலும் மாறுபட்டவை.

இந்தியக் கொடி நிலவின் தென்துருவ மண்ணைத் தொட்டு முத்தமிட்ட வேளையில், அமெரிக்க விண்கலம் மனிதர்களைச் சுமந்து கொண்டு நிலவின் அந்தகார மறுபக்கத்தைச் சுற்றி வந்து புதிய சாதனை படைத்துள்ளது.உலக நாடுகளுக்கு இடையே நிலவைத் தழுவ நடக்கும் இந்தப் போட்டியில், இந்தியாவும் அமெரிக்காவும் தற்போதைய நிலவரப்படி முன்னிலை வகிக்கின்றன.

இஸ்ரோவின் சந்திரயான்-3, கடந்த 2023 ஆகஸ்ட் 23 அன்று யாரும் நுழைய அஞ்சிய நிலவின் தென்துருவத்தில் தனது தடத்தைப் பதித்து உலகையே வியப்பில் ஆழ்த்தியது. சூரிய ஒளி எட்டிப்பார்க்காத, கடும் உறைபனி நிலவும் இப்பகுதியில் தரையிறங்கிய முதல் நாடு என்ற மகுடம் இந்தியாவுக்குச் சூட்டப்பட்டது.

சுமார் -200°C குளிர் மற்றும் ஆழமான பள்ளங்களைக் கொண்ட இப்பகுதியில் 'விக்ரம் லேண்டர்' மற்றும் 'பிரக்யான் ரோவர்' ஆகியவை தன்னாட்சி அதிகாரத்துடன் ஆய்வுகளை மேற்கொண்டன.மறுபுறம், நாசாவின் ஆர்டெமிஸ்-2 திட்டம் நிலவில் தடம் பதிப்பதை விட, மனிதர்களைப் பாதுகாப்பாக ஏந்திச் சென்று நிலவின் சுற்றுப்பாதையில் வலம் வருவதை முதன்மை நோக்கமாகக் கொண்டுள்ளது.

பூமியிலிருந்து என்றும் மறைந்தே இருக்கும் நிலவின் 'இருண்ட மறுபக்கத்தை' நான்கு விண்வெளி வீரர்கள் நேரில் கண்டு களித்தனர். சுமார் 4.06 லட்சம் கிலோமீட்டர் தொலைவைத் தாண்டிப் பயணித்த இத்திட்டம், எதிர்காலத்தில் மனிதர்கள் நிலவில் குடியேறுவதற்கான வெள்ளோட்டமாக அமைந்தது.

இந்த இரு திட்டங்களுக்குமான நிதி ஒதுக்கீடு மலைக்க வைக்கும் வேறுபாட்டைக் கொண்டுள்ளது. வெறும் ரூ. 615 கோடியில் சந்திரயான்-3 சாதித்துக் காட்டிய வேளையில், ஆர்டெமிஸ்-2 திட்டத்திற்கு சுமார் ரூ. 34,000 கோடி செலவிடப்பட்டுள்ளது. இது இந்தியாவின் செலவை விடப் பலமடங்கு அதிகம் என்றாலும், மனித உயிருக்கான பாதுகாப்பு மற்றும் நவீனத் தொழில்நுட்பங்கள் இதில் முதன்மை பெறுகின்றன.

தற்போது இந்தியாவும் அமெரிக்காவும் 'ஆர்டெமிஸ் உடன்படிக்கை' மூலம் கைகோர்த்துள்ளன. சந்திரயான் திரட்டிய தரவுகளும், நாசாவின் அதிநவீன விண்கலத் தொழில்நுட்பமும் இணைந்து வரும் காலங்களில் நிலவில் நிரந்தர மனிதத் தளம் அமைப்பதற்கான பாதையைச் செப்பனிடுகின்றன. விண்வெளிப் பந்தயத்தில் வெறும் பார்வையாளராக இருந்த இந்தியா, இன்று உலக நாடுகளுக்கு வழிகாட்டும் வல்லரசாக விஸ்வரூபம் எடுத்துள்ளது.