ஆதார் கார்டில் பெயர் மாற்றம், முகவரி திருத்தம், மொபைல் எண் புதுப்பிப்பு போன்ற பணிகளுக்காக அருகிலுள்ள ஆதார் மையத்தை தேடி அலையும் நிலை பலருக்கும் சிரமமாக இருந்து வந்தது. எந்த மையம் எங்கே உள்ளது, அது திறந்திருப்பதா, கூட்டம் எவ்வளவு இருக்கும் போன்ற கேள்விகள் பொதுமக்களை அவதிப்படுத்தியுள்ளன. இந்த சிக்கல்களுக்கு தீர்வாக மத்திய அரசு புதிய வசதியை அறிமுகப்படுத்தியுள்ளது.

மின்னணுவியல் மற்றும் தகவல் தொழில்நுட்ப அமைச்சகத்தின் முயற்சியின்படி, இனிமேல் கூகுள் மேப்ஸ் மூலம் அருகிலுள்ள அங்கீகரிக்கப்பட்ட ஆதார் மையங்களை எளிதாக கண்டறியலாம். கூகுள் மேப்ஸில் “Aadhaar Centres near me” அல்லது “ஆதார் மையம்” என்று தேடினால், அருகிலுள்ள மையங்களின் இருப்பிடம் மேப்பில் தோன்றும். அங்கு செல்ல வேண்டிய வழி, எவ்வளவு நேரம் ஆகும் போன்ற தகவல்களும் வழங்கப்படும்.

மேலும், அந்த மையம் தற்போது திறந்திருப்பதா அல்லது மூடப்பட்டுள்ளதா என்பதையும் உடனடியாக அறிய முடியும். இதனால் தேவையில்லாமல் தூரம் சென்று திரும்ப வேண்டிய நிலை தவிர்க்கப்படும். பல மையங்களில் டோக்கன் முறை செயல்பாட்டில் இருப்பதால், முன்கூட்டியே திட்டமிட்டு சென்று வேலைகளை விரைவாக முடிக்கலாம்.

இந்த மையங்களில் புதிய ஆதார் பதிவு முதல் பயோமெட்ரிக் புதுப்பிப்பு வரை பல சேவைகள் கிடைக்கின்றன. புதிய ஆதார் எடுக்க கட்டணம் இல்லை. பெயர், முகவரி போன்ற திருத்தங்களுக்கு ரூ.75 வசூலிக்கப்படுகிறது. 5 முதல் 15 வயது குழந்தைகளுக்கான பயோமெட்ரிக் புதுப்பிப்பு இலவசம்; 15 வயதுக்கு மேற்பட்டவர்களுக்கு ரூ.125 கட்டணம் விதிக்கப்படுகிறது.

இதற்கிடையில், கூகுள் மேப்ஸில் பயணிகளுக்கான கூடுதல் அம்சங்களும் அறிமுகமாகியுள்ளன. இருசக்கர வாகன பயணிகளுக்காக பல்வேறு பைக் சின்னங்கள் தேர்வு செய்யும் வசதி, போக்குவரத்து நெரிசல் அல்லது சாலைப் பணிகள் குறித்து முன் எச்சரிக்கை, மாற்று பாதை வழிகாட்டுதல் போன்ற சேவைகள் வழங்கப்படுகின்றன. சில நகரங்களில் மெட்ரோ டிக்கெட் முன்பதிவு வசதியும் இணைக்கப்பட்டுள்ளது.

மொத்தத்தில், இந்த புதிய டிஜிட்டல் ஒருங்கிணைப்பு பொதுமக்களின் அலைச்சலை குறைத்து, நேரத்தை மிச்சப்படுத்தும் முயற்சியாக பார்க்கப்படுகிறது.