மதுரை: நடிகர் விஜய் தலைமையிலான தமிழக வெற்றிக்கட்சி (தவெக) தனது இரண்டாவது மாநில மாநாட்டை இன்று மதுரை அருகே நடத்தியது. இந்த மாநாட்டில் லட்சக்கணக்கான தொண்டர்கள் பங்கேற்றனர். மாநாட்டில் பேசிய விஜய், திமுக, அதிமுக, பாஜக உள்ளிட்ட கட்சிகளை கடுமையாக விமர்சித்தார்.

இந்நிலையில், நடிகரும் முன்னாள் எம்.எல்.ஏவுமான எஸ்.வி. சேகர், மாநாடு குறித்து ஒன் இந்தியாவுக்கு அளித்த பேட்டியில் விஜயை கடுமையாக விமர்சித்துள்ளார்.

அவர் கூறியதாவது:
“விஜய், கேரவனை விட்டு இப்போதுதான் இறங்கி இருக்கிறார். உலகம் பெரியது. ராக்கெட்டில் செல்லுபவர்கள் நிலாவில் கால் வைக்கலாமா வேண்டாமா என்று சோதிப்பார்கள். ஆனால் விஜய் எதுவும் தெரியாமலேயே அரசியலில் இறங்கிவிட்டார். புதுச்சேரியில் நான்கு தெருவில் வென்ற புஸ்ஸி ஆனந்த் பேச்சைக் கேட்டு குதித்துவிட்டார்.

ஸ்டாலினை ‘அங்கிள்’ என்பதால், விஜய் ஒரு அரை டிராயர் போட்ட பையன் ஆகிவிடப்போவதில்லை. கூட்டம் எல்லாம் ஓட்டாக மாறாது என காமராஜர் காலத்திலேயே நிரூபிக்கப்பட்டது. அதை விஜய் புரிந்துகொள்ள வேண்டும்.

அரசியலை கேவலமாக்கும் முயற்சியில் தான் தவெக ஈடுபட்டு வருகிறது. சினிமா என்பது பொழுதுபோக்கு. நடிகன் தனக்குப் பிடித்ததைச் செய்வதால் ரசிகன் கொண்டாடுவான். ஆனால் நடிகனுக்கு பிடித்ததை எல்லாம் ரசிகன் செய்யமாட்டான். விஜய்க்கு முதலில் பேசத் தெரிய வேண்டும். மக்களுக்காக என்ன கொள்கை வைத்துள்ளார்? என்ன செய்வார்? இதை தெளிவாக சொல்ல வேண்டும்.

விஜய், சினிமா டிக்கெட்டை 10 ரூபாய் ஆக்குவேன் என சொல்ல முடியுமா? அவர் எதையும் தெளிவாக சொல்லவில்லை. உண்மையில் சீமான் இடத்தைப் பிடிக்க விஜய் முயற்சி செய்கிறார் என வைத்துக் கொள்ளலாம்.

இந்த மாநாட்டில் சுண்டல் விற்க வந்தவர் வழக்கமாக 500 ரூபாய்க்கு விற்பவர் இன்று 1000 ரூபாய்க்கு விற்றிருந்தால், அவருக்கு மாநாடு வெற்றி. ஆனால் விஜய்க்கு வெற்றி கிடைக்குமா என்பது அடுத்த ஆண்டு மே மாதத்தில் தான் தெரிய வரும்.” என எஸ்.வி. சேகர் விமர்சித்துள்ளார்.

சுருக்கமாக: விஜயின் மாநாட்டைத் தொடர்ந்து அவரின் அரசியல் பயணம் குறித்து பல்வேறு வட்டாரங்களில் விமர்சனங்கள் எழுந்துள்ளன. அதில் எஸ்.வி. சேகர் கருத்து அதிக கவனம் பெற்றுள்ளது.