இந்திய தொலைத்தொடர்பு ஒழுங்குமுறை ஆணையம் (TRAI), அனைத்து டெலிகாம் நிறுவனங்களும் தங்களது இணையதளங்கள் மற்றும் மொபைல் செயலிகளில் “டிராய்-அனுமதித்த பேக்குகள்” (TRAI-Mandated Packs) என்ற தனிப்பிரிவை வாடிக்கையாளர்களின் பார்வைக்குத் தெளிவாகத் தெரியும் வகையில் அமைக்க வேண்டும் என உத்தரவிட்டுள்ளது.

உத்தரவின் பின்னணி & புதிய வழிகாட்டுதல்கள்:

வாடிக்கையாளர்கள் புகார்: டிராய் பரிந்துரைத்த குறைந்தபட்ச மற்றும் அத்தியாவசிய ரீசார்ஜ் வவுச்சர்கள் எளிதில் கிடைக்காமல், செயலிகள் மற்றும் வலைத்தளங்களில் பல பக்கங்களுக்குப் பின்னால் மறைத்து வைக்கப்படுவதாக நுகர்வோரிடம் இருந்து பரவலாகப் புகார்கள் வந்தன.

டிராயின் அதிரடி ஆய்வு: புகார்களின் அடிப்படையில் டெலிகாம் நிறுவனங்களின் செயலிகளை ஆய்வு செய்த டிராய், பயனர்கள் பல திரைகளைக் கடந்து சென்ற பின்னரே இந்த வவுச்சர்களை அணுக முடிகிறது என்பதையும், வெளிப்படைத்தன்மை இன்றி வெவ்வேறு பிரிவுகளின் கீழ் அவை வைக்கப்பட்டிருப்பதையும் உறுதி செய்தது.

முதன்மைத் தாவலாக (First Tab) அமைத்தல்: புதிய உத்தரவின்படி, ப்ரீபெய்ட் ரீசார்ஜ் பிரிவில் “TRAI-ஆல் கட்டாயமாக்கப்பட்ட பேக்குகள்” என்ற பகுதி முதல் டேபாகவே (First Tab) இடம்பெற வேண்டும்.

விற்பனை நிலையங்களில் காட்சிப்படுத்துதல்: இணையதளம் மற்றும் செயலிகள் மட்டுமின்றி, டெலிகாம் நிறுவனங்களின் பிரத்யேக நேரடி விற்பனை நிலையங்களிலும் (Retail Outlets) இந்த ரீசார்ஜ் பேக்குகளின் விவரங்கள் முக்கியப் பலகையில் தெளிவாகக் காட்சிப்படுத்தப்பட வேண்டும் எனக் கண்டிப்புடன் தெரிவிக்கப்பட்டுள்ளது.