தூத்துக்குடி அருகே இடி, மின்னலுடன் பெய்த கனமழையின்போது ஆடுகளை வீட்டிற்கு அழைத்துச் சென்ற இளம் தொழிலாளி மின்னல் தாக்கி சம்பவ இடத்திலேயே உயிரிழந்தார். இந்தத் துயரச் சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.தூத்துக்குடி அருகேயுள்ள பெரியநாயகிபுரம் கிராமத்தைச் சேர்ந்தவர் மதன்குமார் (24).

தொழிலாளியான இவர், சொந்தமாக ஆடுகளை வளர்த்து வந்தார். தினமும் காலையில் கிராமத்தை ஒட்டியுள்ள காட்டுப் பகுதிக்கு ஆடுகளை மேய்ச்சலுக்குக் கொண்டு செல்வதும், மாலையில் அவற்றை மீண்டும் வீட்டிற்கு அழைத்து வருவதும் இவரது வழக்கமாக இருந்தது.அந்த வகையில், நேற்று காலையிலும் மதன்குமார் வழக்கம்போல் ஆடுகளை மேய்ச்சலுக்காகக் காட்டுப் பகுதிக்கு அழைத்துச் சென்றார்.

மாலையில் அப்பகுதியில் இடி, மின்னலுடன் பலத்த மழை பெய்யத் தொடங்கியது. இதனால், மேய்ச்சலில் இருந்த ஆடுகளை விரைவாக வீட்டிற்குக் கொண்டு செல்ல அவர் முயன்றார்.

பெரியநாயகிபுரம் அருகே மழையில் நனைந்தபடி ஆடுகளுக்குப் பின்னால் நடந்து சென்று கொண்டிருந்தார்.அப்போது, யாரும் எதிர்பாராத வகையில் திடீரெனப் பயங்கர சத்தத்துடன் மின்னல் மதன்குமார் மீது தாக்கியது. இதில் பலத்த காயமடைந்த அவர், சம்பவ இடத்திலேயே பரிதாபமாக உயிரிழந்தார்.

மழையிலிருந்து தப்பித்து ஆடுகளைப் பாதுகாப்பாக வீட்டிற்குக் கொண்டு செல்ல முயன்ற இளைஞர் மின்னல் தாக்கி உயிரிழந்த சம்பவம், அவரது குடும்பத்தினரையும் கிராம மக்களையும் பெரும் துயரத்தில் ஆழ்த்தியுள்ளது.