சென்னை டி.ஜி.பி. அலுவலக வளாகத்தில் அமைந்துள்ள காவலர் நினைவுச் சின்னத்தில் முதலமைச்சர் ஜோசப் விஜய் மலர் வளையம் வைத்து, பணியின்போது உயிர்நீத்த காவலர்களுக்கு வீர வணக்கம் செலுத்தினார். தொடர்ந்து அவருக்கு காவல்துறை சார்பில் மரியாதை அளிக்கப்பட்டதுடன், அலுவலக வளாகத்தில் மரக்கன்றையும் நட்டு வைத்தார்.ஒவ்வொரு ஆண்டும் அக்டோபர் 21-ஆம் தேதி நாடு முழுவதும் காவலர் வீரவணக்க நாள் கடைப்பிடிக்கப்படுகிறது.

கடந்த 1959-ஆம் ஆண்டு இதே நாளில் லடாக் பகுதியில் சீன ராணுவத்தினர் மறைந்திருந்து நடத்திய திடீர் தாக்குதலில் 10 மத்திய பாதுகாப்புப் படைக் காவலர்கள் வீரமரணம் அடைந்தனர். அவர்களின் அளப்பரிய தியாகத்தை நினைவுகூரும் வகையிலும், நாட்டின் பாதுகாப்பிற்காகத் தங்கள் உயிரைப் பணயம் வைத்து பணியாற்றும் காவலர்களின் அர்ப்பணிப்பைப் போற்றும் வகையிலும் இந்நாள் ஆண்டுதோறும் அனுசரிக்கப்படுகிறது.

இந்த நிலையில், 2026-ஆம் ஆண்டு காவலர் வீரவணக்க நாளை முன்னிட்டு, கடந்த ஓராண்டில் பணியின்போது வீரமரணம் அடைந்த தமிழ்நாடு காவல்துறையினர் உள்ளிட்ட நாட்டின் பல்வேறு பகுதிகளைச் சேர்ந்த காவலர்கள் மற்றும் துணை ராணுவப் படையினருக்கு அஞ்சலி செலுத்தும் நிகழ்ச்சி சென்னையில் நடைபெற்றது.

இதில் முதலமைச்சர் ஜோசப் விஜய் பங்கேற்று, டி.ஜி.பி. அலுவலகத்தில் உள்ள காவலர் நினைவுச் சின்னத்தில் மலர் வளையம் வைத்து மரியாதை செலுத்தினார். பின்னர் காவல்துறை சார்பில் அவருக்கு மரியாதை அளிக்கப்பட்டது. இதையடுத்து, அலுவலக வளாகத்தில் மரக்கன்று நட்ட அவர், நிகழ்ச்சி முடிந்து புறப்படும்போது தம்மைக் காணக் கூடியிருந்த பொதுமக்களைப் பார்த்துக் கையசைத்து வாழ்த்து தெரிவித்தார்.

காவலர் வீரவணக்க நாளையொட்டி முதலமைச்சர் ஜோசப் விஜய் வெளியிட்ட சமூக வலைதளப் பதிவில், 1959-ஆம் ஆண்டு லடாக் எல்லைப் பகுதியில் நாட்டைக் காக்கும் பணியில் வீரமரணம் அடைந்த 10 மத்திய ரிசர்வ் காவல் படையினரின் வரலாற்றுச் சிறப்புமிக்க தியாகத்தை நினைவுகூர்ந்தார்.

மேலும், நாட்டில் அமைதியையும் சட்டம் ஒழுங்கையும் நிலைநாட்டும் உயரிய கடமையில் தங்கள் இன்னுயிரை ஈந்த காவலர்கள் அனைவருக்கும் வீர வணக்கங்களைத் தெரிவித்தார்.இயற்கைப் பேரிடர்கள், விபத்துகள், குற்றச் சம்பவங்கள் மற்றும் பொதுமக்களின் பாதுகாப்புக்கு அச்சுறுத்தல் ஏற்படும் பல்வேறு சூழல்களிலும் துணிவுடனும் விழிப்புடனும் செயல்படும் காவலர்களின் பணிகளை அவர் பாராட்டினார்.

கடமையை நிறைவேற்றும் பாதையில் உயிர்த் தியாகம் செய்த வீரர்களின் நினைவுக்குத் தலைவணங்கி அஞ்சலி செலுத்துவதுடன், நேரம் காலம் பாராமல் மக்களின் பாதுகாப்பிற்காக அயராது உழைக்கும் காவல்துறையினரின் உன்னதமான சேவைகளைப் போற்ற வேண்டும் என்றும் தனது பதிவில் குறிப்பிட்டிருந்தார்.