பிரதமர் அறிவித்த 'பெஸ்ட் புதுச்சேரி' செயல்திட்டத்தை விரைவுபடுத்த வேண்டும் என அதிகாரிகளுக்கு துணைநிலை ஆளுநர் கைலாசநாதன் அறிவுறுத்தினார்.

ஆளுநர் மாளிகையில் மாநிலத்தின் தொழில்துறை வளர்ச்சி குறித்த ஆலோசனைக் கூட்டம் துணைநிலை ஆளுநர் கைலாசநாதன் தலைமையில் நடைபெற்றது. கூட்டத்தில் அமைச்சர்  நமச்சிவாயம், துணைநிலை ஆளுநரின் செயலர் மணிகண்டன், தொழில் வளர்ச்சித்துறைச் செயலர் ருத்ர கௌடு மற்றும் அதிகாரிகள் கலந்து கொண்டனர். 

தொழில்துறை வளர்ச்சிக்காக எடுக்கப்பட்டு வரும் நடவடிக்கைகள் குறித்து அதிகாரிகளிடம் கேட்டறிந்த துணைநிலை ஆளுநர், பல்வேறு ஆலோசனைகளை வழங்கினார். 

புதுச்சேரியில் தொழில் துறை வளர்ச்சிக்கு ஏற்ற சாதகமான சூழ்நிலையை உருவாக்க வேண்டும்.புதிய தொழில் முதலீட்டாளர்களை கவரும் வகையிலான திட்டங்களையும் நடைமுறைகளையும் செயல்படுத்த வேண்டும்.

புதிய தொழில் தொடங்குவதற்கு ஏற்ற அடிப்படை வசதிகளை செய்து தர வேண்டும்.
தொழில்நுட்ப பூங்கா, ஜவுளி பூங்கா போன்ற தொழில்துறைகளை தொடங்க ஆர்வம் காட்டும் தொழில் முதலீட்டாளர்களை ஊக்கப்படுத்த வேண்டும். 

தொழில்துறை வளர்ச்சி வேலை வாய்ப்புகளை உருவாக்கவும் மாநிலத்தின் பொருளாதார வளர்ச்சியை விரைவுப்படுத்தும் என்பதால் கூடுதல் கவனத்தோடும் சிரத்தையோடும் அதிகாரிகள் செயல்பட வேண்டும்.
பாரதப் பிரதமர் நரேந்திர மோடி அறிவித்த 'பெஸ்ட் புதுச்சேரி'(BEST Puducherry) செயல்திட்டத்தை விரைவுபடுத்த வேண்டும் என அறிவுறுத்தினார்.