தமிழகத்தில் சாலைகளில் குழந்தைகளைப் பிச்சை எடுக்கப் பயன்படுத்துவதைத் தடுக்க உரிய நடைமுறைகளை வகுக்க வேண்டும் என்று சென்னை உயர் நீதிமன்றம் தமிழக அரசுக்கு அறிவுறுத்தியுள்ளது.

பொதுநல வழக்கு
மனுதாரர்: சென்னையைச் சேர்ந்த வழக்கறிஞர் தமிழ்வேந்தன், சாலைகளில் குழந்தைகளுடன் பிச்சை எடுக்கும் பெண்கள், உண்மையில் அந்தக் குழந்தைகளின் தாய்தானா என்பதைக் கண்டறிய விசாரணை நடத்த உத்தரவிடக் கோரிப் பொதுநல வழக்கு தாக்கல் செய்திருந்தார்.

மனுவில், சாலைகளில் பிச்சை எடுக்கும் பெண்களுக்கும் குழந்தைகளுக்கும் உருவ ஒற்றுமை இல்லை என்றும், பிச்சை எடுக்கப் பயன்படுத்தப்படும் குழந்தைகள் எப்போதும் தூங்கிக் கொண்டிருப்பது சந்தேகத்தை ஏற்படுத்துவதாகவும் கூறப்பட்டுள்ளது.

மருந்துப் பயன்பாடு: வெயில் மற்றும் வாகன இரைச்சலுக்குக்கூட அந்தக் குழந்தைகள் கண்விழிக்காததால், அவர்களுக்கு தூக்க மாத்திரைகள், வேறு மருந்துகள் அல்லது ஆல்கஹால் கொடுக்கப்படுகிறதா என்பதைக் கண்டறிய வேண்டும் என்றும் வலியுறுத்தப்பட்டுள்ளது.

விசாரணைக் கோரிக்கைகள்
பிச்சை எடுக்கும் பெண்கள் பெரும்பாலும் தமிழில் பேசுவதில்லை என்றும், குழந்தைகளை வேறு இடங்களில் இருந்து கடத்தி வந்து பிச்சை எடுக்கப் பயன்படுத்துகிறார்களா, இதற்குப் பின்னணியில் செயல்படுவோர் யார் என்பதைக் கண்டறிய விசாரணை நடத்தப்பட வேண்டும் என்றும் மனுதாரர் கோரிக்கை விடுத்திருந்தார்.

நீதிமன்ற உத்தரவு
தலைமை நீதிபதி எம்.எம். ஸ்ரீவஸ்தவா மற்றும் நீதிபதி ஜி. அருள்முருகன் அடங்கிய அமர்வு இந்த வழக்கை விசாரித்தது. இதுபோன்ற செயல்களைத் தடுக்க உரிய நடைமுறைகளை வகுக்க வேண்டும் என்று தமிழக அரசுக்கு அறிவுறுத்திய நீதிபதிகள், மனுவுக்குப் பதிலளிக்க உத்தரவிட்டு, விசாரணையை டிசம்பர் 11-ஆம் தேதிக்கு ஒத்திவைத்தனர்.