புதுக்கோட்டை அருகே பள்ளி மாணவிகள் பயணம் செய்த அரசுப் பேருந்தின் கதவு திடீரென திறந்ததில், படிக்கட்டில் நின்றிருந்த 10 பழங்குடியின மாணவிகள் அடுத்தடுத்து சாலையில் விழுந்து காயமடைந்த சம்பவம் பெரும் பரபரப்பை ஏற்படுத்தியுள்ளது. இதில் ஒரு மாணவியின் காலில் பேருந்தின் சக்கரம் ஏறியதாக தெரிவிக்கப்படுவதால், அவரது நிலை கவலைக்கிடமாக இருப்பதாக தெரிவிக்கப்படுகிறது. இந்த சம்பவத்தால் ஆத்திரமடைந்த கிராம மக்கள் தேசிய நெடுஞ்சாலையில் திரண்டு சாலை மறியலில் ஈடுபட்டனர்.

புதுக்கோட்டை மாவட்டம், கீரனூர் மற்றும் அதனைச் சுற்றியுள்ள கிராமங்களில் இருந்து ஏராளமான மாணவ, மாணவிகள் தினமும் அரசுப் பேருந்துகள் மூலம் புதுக்கோட்டையில் உள்ள பள்ளிகளுக்கு சென்று வருகின்றனர்.அந்த வகையில், இன்று காலை பழங்குடியின சமூகத்தைச் சேர்ந்த பள்ளி மாணவிகள் வழக்கம்போல் கீரனூரில் இருந்து புதுக்கோட்டை நோக்கிச் சென்ற அரசுப் பேருந்தில் பயணம் செய்தனர்.

பேருந்து ரெங்கம்மாள்சத்திரம் அருகே சென்றபோது, அதற்குள் பயணிகள் கூட்டம் அதிகமாக இருந்ததாக தெரிவிக்கப்படுகிறது. இதனால் மாணவிகள் சிலர் பேருந்தின் படிக்கட்டில் நின்றபடி பயணம் செய்ததாக கூறப்படுகிறது.அப்போது படிக்கட்டில் நின்றிருந்த மாணவிகளை கீழே இறங்குமாறு நடத்துனர் வலியுறுத்தியதாக தெரிவிக்கப்படுகிறது.

மாணவிகள் இறங்குவதற்கு தயக்கம் காட்டிய நிலையில், பேருந்தின் கதவு திடீரென திறந்ததாக கூறப்படுகிறது.கதவு திறந்ததால் நிலைதடுமாறிய மாணவிகள், ஓடிக்கொண்டிருந்த பேருந்தில் இருந்து ஒருவர் பின் ஒருவராக சாலையில் விழுந்தனர். இதில் 10 மாணவிகள் காயமடைந்தனர்.இந்த விபத்தில் ஒரு மாணவியின் காலில் பேருந்தின் சக்கரம் ஏறியதாக தெரிவிக்கப்படுகிறது. இதில் அந்த மாணவி பலத்த காயமடைந்ததாக கூறப்படுகிறது.

மாணவிகளின் அலறல் சத்தம் கேட்டு அதிர்ச்சியடைந்த அப்பகுதி மக்கள் உடனடியாக சம்பவ இடத்துக்கு ஓடி வந்து அவர்களை மீட்கும் பணியில் ஈடுபட்டனர். மேலும் அவசர ஊர்திக்கும் தகவல் தெரிவிக்கப்பட்டது.காயமடைந்த மாணவிகளை மீட்ட பொதுமக்கள் மற்றும் மீட்புப் பணியாளர்கள், அவர்களை புதுக்கோட்டை அரசு மருத்துவக் கல்லூரி மருத்துவமனைக்கு அனுப்பி வைத்தனர்.அங்கு மாணவிகளுக்கு மருத்துவர்கள் சிகிச்சை அளித்து வருகின்றனர்.

பலத்த காயமடைந்த மாணவிக்கு கூடுதல் மருத்துவக் கண்காணிப்பு வழங்கப்பட்டு வருவதாக தெரிவிக்கப்படுகிறது.மாணவிகள் காயமடைந்த சம்பவம் குறித்து அறிந்ததும் கிராம மக்கள் கடும் அதிருப்தி அடைந்தனர். பள்ளிக்குச் செல்லும் குழந்தைகளின் பாதுகாப்புக்காக உரிய நடவடிக்கைகள் எடுக்க வேண்டும் என்றும், அரசுப் பேருந்துகளில் மாணவர்கள் பாதுகாப்பாக பயணம் செய்வதை உறுதி செய்ய வேண்டும் என்றும் அவர்கள் வலியுறுத்தினர்.

இதையடுத்து நூற்றுக்கணக்கான கிராம மக்கள் சம்பவ இடத்தில் திரண்டு, திருச்சி–புதுக்கோட்டை தேசிய நெடுஞ்சாலையில் அமர்ந்து சாலை மறியல் போராட்டத்தில் ஈடுபட்டனர்.சாலை மறியலால் அந்தப் பகுதியில் போக்குவரத்து பாதிக்கப்பட்டது. இதையடுத்து சம்பவ இடத்துக்கு விரைந்த காவலர்கள் மற்றும் அரசு அதிகாரிகள், போராட்டத்தில் ஈடுபட்ட பொதுமக்களிடம் பேச்சுவார்த்தை நடத்தினர்.

பேருந்து நடத்துனர் அர்ச்சுனன் மற்றும் ஓட்டுநர் மணிகண்டன் மீது உரிய சட்டப்பிரிவுகளின் கீழ் வழக்குப்பதிவு செய்து நடவடிக்கை எடுக்க வேண்டும் என்றும், சம்பவம் தொடர்பாக முழுமையான விசாரணை நடத்த வேண்டும் என்றும் கிராம மக்கள் வலியுறுத்தினர்.மாணவிகளின் பாதுகாப்பை உறுதி செய்யும் வகையில் அரசுப் பேருந்துகளில் உரிய கட்டுப்பாடுகள் மற்றும் பாதுகாப்பு நடவடிக்கைகள் மேற்கொள்ள வேண்டும் என்பதையும் பொதுமக்கள் வலியுறுத்தியுள்ளனர்.