புதுச்சேரியில் கடந்த சில மாதங்களாக அரசு மற்றும் முக்கிய நிறுவனங்களை குறிவைத்து மர்ம நபர்கள் இடைவெளி தோறும் இ-மெயில் மூலம் வெடிகுண்டு மிரட்டல்கள் விடுத்து வருகின்றனர்.

கவர்னர் மாளிகை, டி.ஜி.பி. அலுவலகம், தலைமைச் செயலகம், கலெக்டர் அலுவலகம், ஜிப்மர், தனியார் ஓட்டல்கள் உள்ளிட்ட பல இடங்கள் இதற்கு முன் இலக்காகியிருந்தன. சமீபத்தில் பிரெஞ்சு தூதரகத்திற்கும் மிரட்டல் வந்தது குறிப்பிடத்தக்கது.

இந்தச் சூழலில், மத்திய அரசின் கட்டுப்பாட்டில் காலாப்பட்டில் இயங்கும் ஜவஹர் நவோதயா வித்யாலயா பள்ளியின் இ-மெயில் முகவரிக்கு புதிய வெடிகுண்டு மிரட்டல் செய்தி வந்தது.

அதில், தனிப்பட்ட குற்றச்சாட்டுகள் மற்றும் கவனம் ஈர்க்கும் நோக்கில் பள்ளியில் வெடிகுண்டு வைத்துள்ளதாக தெரிவிக்கப்பட்டிருந்தது.இதனால் பதற்றமடைந்த பள்ளி நிர்வாகம் உடனடியாக காலாப்பட்டு போலீசாருக்கு தகவல் தெரிவித்தது.

சம்பவ இடத்துக்கு விரைந்த போலீசார், மோப்ப நாய்கள் உதவியுடன் பள்ளி வளாகத்தின் ஒவ்வொரு மூலையையும் தீவிரமாக சோதனை செய்தனர். எனினும் எந்த வெடிகுண்டும் கண்டுபிடிக்கப்படவில்லை.

பின்னர் அது வெறும் வதந்தி மிரட்டல் என்பதும் உறுதியானது.சோதனை நடைபெறும் வரை மாணவர்கள் அனைவரும் பாதுகாப்பு முன்னெச்சரிக்கையாக விடுதிகளில் தங்க வைக்கப்பட்டனர்.

இந்த மிரட்டல் குறித்து காலாப்பட்டு போலீசாரும் சைபர் கிரைம் பிரிவும் விசாரணையை தீவிரப்படுத்தியுள்ளனர்.இதற்கிடையில், நரேந்திர மோடி வருகையை முன்னிட்டு புதுச்சேரியில் பாதுகாப்பு ஏற்பாடுகள் மேலும் கடுமையாக்கப்பட்டுள்ளன.

விமான நிலையம், லாஸ்பேட்டை ஹெலிபேட், நகரின் முக்கிய பகுதிகள் அனைத்தும் போலீஸ் கண்காணிப்பு வளையத்திற்குள் கொண்டு வரப்பட்டுள்ளன. எல்லைப்பகுதிகள் மற்றும் சந்திப்புகளில் வாகனச் சோதனைகள் நடைபெற்று வருகின்றன.

மொத்தத்தில், வெடிகுண்டு மிரட்டல் வதந்தி புதுச்சேரி நகரையே பரபரப்புக்குள் தள்ளிய நிலையில், சுமார் 2,000 போலீசார் பாதுகாப்புப் பணியில் ஈடுபடுத்தப்பட்டுள்ளனர்.