பாரத் பெட்ரோலியம், இந்துஸ்தான் பெட்ரோலியம் மற்றும் இந்தியன் ஆயில் போன்ற பொதுத்துறை எண்ணெய் நிறுவனங்கள், வீட்டு பயன்பாட்டிற்கு 14.2 கிலோ எடையிலும், வணிகத் தேவைகளுக்காக 19 கிலோ எடையிலும் சமையல் எரிவாயு சிலிண்டர்களை நாடு முழுவதும் பரவலாக விநியோகம் செய்து வருகின்றன.

சர்வதேச சந்தையில் கச்சா எண்ணெய் விலை நிலவரம் மற்றும் அமெரிக்க டாலருடன் ஒப்பிடுகையில் இந்திய ரூபாயின் மாற்றங்கள் ஆகியவற்றை ஆதாரமாகக் கொண்டு, பெட்ரோல், டீசல் மற்றும் எரிவாயு சிலிண்டர்களின் விலைகளை இந்நிறுவனங்கள் காலா காலமாக சீரமைத்து வருகின்றன.

குறிப்பாக, ஒவ்வொரு மாதத்தின் முதல் நாளில் சிலிண்டர் விலைகள் மறுஆய்வு செய்யப்பட்டு மாற்றம் செய்யப்படும் நடைமுறை பின்பற்றப்படுகிறது.அந்த வகையில், இன்றைய மாதத் தொடக்கத்தை முன்னிட்டு புதிய விலை விவரங்கள் வெளியிடப்பட்டுள்ளன.

அதன்படி, சென்னையில் 19 கிலோ எடை கொண்ட வணிக பயன்பாட்டு சிலிண்டர் விலை திடீர் உயர்வாக ரூ.993 அதிகரித்து, ரூ.3,237 என்ற உச்ச மட்டத்தில் விற்பனை செய்யப்படுகிறது.

இதேவேளை, 14.2 கிலோ எடை கொண்ட வீட்டு பயன்பாட்டு சிலிண்டர் விலையில் எந்த மாற்றமும் இல்லை என தெரிவிக்கப்படுகிறது.வணிகத் துறைக்கு நேரடியாக தாக்கத்தை ஏற்படுத்தும் இந்தக் கடுமையான உயர்வு, சிறு மற்றும் நடுத்தர வணிகர்களிடையே அதிர்ச்சி அலைகளை ஏற்படுத்தியுள்ளது.

இதன் தொடர்ச்சியாக, உணவுப் பொருட்களின் விலை மேலும் ஏற்றமடையும் சூழ்நிலை உருவாகும் அபாயம் நிலவுகிறது என தெரிவிக்கப்படுகிறது.

மேலும், தலைநகர் டெல்லியில் ஒரு சிலிண்டர் ரூ.3,071.50க்கும், கொல்கத்தாவில் ரூ.3,202க்கும் விற்பனை செய்யப்படுகிறது. மாநிலங்களின் வரி அமைப்பு மற்றும் போக்குவரத்து செலவுகளின் வேறுபாடுகளால், விலைகளில் மாறுபாடு காணப்படுகிறது என தெரிவிக்கப்படுகிறது.