பிரதமர் நரேந்திர மோடி, ஒவ்வொரு மாதமும் கடைசி ஞாயிற்றுக்கிழமை நாட்டு மக்களுக்கு வானொலியில் உரையாற்றும் 'மனதின் குரல்' (மன் கி பாத்) நிகழ்ச்சியில், இந்தியாவின் விவசாயச் சாதனை மற்றும் கலாசாரத் தொடர்புகள் குறித்துப் பேசினார்.

விவசாயத் துறையில் சாதனை

உணவு தானிய உற்பத்தி: இந்தியாவின் விவசாயத் துறை மாபெரும் வெற்றி கண்டுள்ளது. நாடு 357 மில்லியன் டன் உணவு தானியங்களை உற்பத்தி செய்து வரலாற்றுச் சாதனை படைத்துள்ளது. இது 10 ஆண்டுகளுக்கு முன்பு இருந்ததை விட 100 மில்லியன் டன் அதிகம் ஆகும்.

இளைஞர்களின் பங்கு: இளைஞர்களின் அர்ப்பணிப்பு உணர்வும் விஞ்ஞானிகளின் விடாமுயற்சியுமே இந்தியாவின் வளர்ச்சிக்கு மிகப்பெரிய பலம் என்று பிரதமர் பாராட்டினார்.

காசி தமிழ் சங்கமம்

4வது சங்கமம்: இந்தியாவின் மிகப் பழமையான இரண்டு நகரங்களின் சங்கமம் எப்போதும் சிறப்பானது என்று குறிப்பிட்ட அவர், நான்காவது காசி தமிழ் சங்கமம் டிசம்பர் 2-ஆம் தேதி வாரணாசியில் தொடங்குகிறது என்றார்.

பெருமை: இந்த ஆண்டின் கருப்பொருள் 'தமிழ் கற்க' என்பதாகும். "தமிழ் கலாச்சாரம் சிறந்தது, தமிழ் மொழி சிறந்தது, தமிழ் பாரதத்தின் பெருமை," என்று கூறி, தமிழ் மொழியை நேசிக்கும் அனைவருக்கும் இது முக்கியமான தளம் என்று மோடி பெருமிதம் தெரிவித்தார்.

முக்கிய முன்னேற்றங்கள்

'வந்தே மாதரம்' 150-வது ஆண்டு விழா, அரசியலமைப்பு தினக் கொண்டாட்டம், அயோத்தி ராமர் கோயில் கோபுரத்தில் காவிக் கொடி ஏற்றப்பட்டது ஆகியவற்றை இந்த மாதத்தின் உத்வேகமான முன்னேற்றங்களாகப் பிரதமர் சுட்டிக்காட்டினார். மேலும், தேனீ வளர்ப்பு முயற்சிகள், விளையாட்டுத் துறையில் சாதனைகள், 2030 காமன்வெல்த் விளையாட்டுப் போட்டிகளை நடத்தும் ஏலத்தை இந்தியா வென்றது குறித்தும் அவர் பேசினார்.