தமிழ்நாடு காங்கிரஸ் கட்சியில் முக்கிய மாற்றமாக, மாநில தலைவராக இருந்த செல்வப்பெருந்தகை மாற்றப்பட்டு, அவரது இடத்தில் நாடாளுமன்ற காங்கிரஸ் கட்சி கொறடாவும், எம்.பி.யுமான மாணிக்கம் தாகூர் புதிய மாநிலத் தலைவராக அகில இந்திய காங்கிரஸ் தலைமையால் நியமிக்கப்பட்டுள்ளார்.

இந்த அறிவிப்பு தமிழக காங்கிரஸ் வட்டாரத்தில் புதிய அரசியல் பரபரப்பை ஏற்படுத்தியுள்ளது.இதனைத் தொடர்ந்து, சென்னை சத்தியமூர்த்தி பவனில் நடைபெற்ற சிறப்பு நிகழ்ச்சியில் மாணிக்கம் தாகூர் அதிகாரப்பூர்வமாக தமிழ்நாடு காங்கிரஸ் தலைவராக பொறுப்பேற்றுக் கொண்டார்.

காங்கிரஸ் நிர்வாகிகள் மற்றும் மூத்த தலைவர்கள் முன்னிலையில் நடைபெற்ற இந்த விழாவில், மாணிக்கம் தாகூர் பதவியேற்று கட்சியின் அடுத்தகட்ட பயணத்திற்கான முக்கிய பொறுப்பை ஏற்றார்.இந்த மாற்றம் கட்சியின் எதிர்கால செயல்பாடுகளில் புதிய அணுகுமுறையையும், புத்துணர்ச்சியையும் உருவாக்கும் என கட்சியினர் நம்பிக்கை தெரிவித்து வருகின்றனர்.

இதனையடுத்து, மாவட்ட காங்கிரஸ் தலைவர்கள் ஆலோசனைக் கூட்டம் சென்னை சத்தியமூர்த்தி பவனில் நாளை (2-ஆம் தேதி) காலை 10.30 மணிக்கு நடைபெற உள்ளதாக காங்கிரஸ் துணைத்தலைவர் கோபண்ணா தெரிவித்துள்ளார்.இந்த கூட்டம் புதிய தலைமையின் கீழ் நடைபெறும் முதல் முக்கிய ஆலோசனைக் கூட்டமாக பார்க்கப்படுகிறது.

தமிழ்நாடு காங்கிரஸ் தலைவர் மாணிக்கம் தாகூர் எம்.பி. தலைமையில் நடைபெறும் இந்த கூட்டத்தில், சட்டமன்ற காங்கிரஸ் தலைவரும் அமைச்சருமான ராஜேஷ்குமார் முன்னிலை வகிக்கிறார்.

கூட்டத்தில் கட்சியின் அமைப்பு வலுப்படுத்தல், வளர்ச்சி பணிகள், மாவட்ட அளவிலான செயல்பாடுகள் மற்றும் ஒருங்கிணைந்த அரசியல் நடவடிக்கைகள் குறித்து விரிவான ஆலோசனைகள் நடைபெறும் என தெரிவிக்கப்படுகிறது.இந்த கூட்டம் தமிழக காங்கிரஸின் அடுத்தகட்ட அரசியல் நகர்வுகளுக்கு முக்கிய திசை நிர்ணயமாக அமையும் என எதிர்பார்க்கப்படுகிறது.