சென்னை சென்ட்ரல் ரயில் நிலையத்திலிருந்து ஆக்ரா சென்ற ரயிலின் பின்புறப் பெட்டியில் கேட்பாரற்றுக் கிடந்த பெட்டியில் எலும்புக்கூடுகள் மற்றும் உடல் உறுப்புகள் கண்டெடுக்கப்பட்ட சம்பவம் பெரும் அதிர்ச்சியை ஏற்படுத்தியது. சிசிடிவி காட்சிகளின் அடிப்படையில் ஆய்வு செய்த காவல்துறையினர், கூடுவாஞ்சேரியில் பூட்டிக்கிடந்த வீட்டின் பூட்டை உடைத்துச் சோதனை செய்தபோது, பெரிய பாத்திரத்தில் துண்டு துண்டாக நறுக்கப்பட்ட நிலையில் உடற்பாகங்கள் இருப்பது கண்டுபிடிக்கப்பட்டது. விசாரணையில் கொலை செய்யப்பட்டவர் ஒடிசாவைச் சேர்ந்த ஹயாத்துன் நிஷா (38) என்பது உறுதி செய்யப்பட்டது.

யூடியூப் பார்த்துத் துண்டிக்கப்பட்ட உடல்

இக் கொடூரக் கொலையில் முக்கியக் குற்றவாளியான மணிக் உத்தீன் லஸ்கர் (22) போலிசாரிடம் அளித்த திடுக்கிடும் வாக்குமூலம்:

கர்ப்பமும் கொலையும்: தாம்பரத்தில் உள்ள ஏற்றுமதி ஆடை நிறுவனத்தில் பணிபுரிந்தபோது ஹயாத்துன் நிஷாவுடன் பழக்கம் ஏற்பட்டு, கள்ளக்காதலாக மாறியுள்ளது. நிஷா கர்ப்பமான நிலையில் கருவைக் கலைக்க மறுத்ததால், அவருக்கு விஷம் கொடுத்துக் கொலை செய்துள்ளார்.

யூடியூப் வழிகாட்டல்: கொலையைச் செய்த பின் உடலைக் குளியலறைக்கு இழுத்துச் சென்று தலையைத் துண்டித்துள்ளார். பின்னர் கைப்பேசியில் யூடியூப் வீடியோக்களைப் பார்த்து, மனித உடலில் இருந்து சதையையும் எலும்புகளையும் தனித்தனியாகப் பிரித்து பாத்திரத்தில் போட்டுத் துணியால் சுற்றி வைத்துள்ளார்.

மணிப்பூரில் கைது நடவடிக்கை

சம்பவத்திற்குப் பின் தலைமறைவான மணிக் உத்தீன் லஸ்கர் மற்றும் அவரது மனைவி பகவதி மாஜி ஆகிய இருவரையும் கூடுவாஞ்சேரி காவல் ஆய்வாளர் கோவிந்தராஜ் தலைமையிலான தனிப்படை போலிசார் மணிப்பூர் மாநிலம், ஜிரிபாம் மாவட்டம், காஷிம்பூர் பகுதியில் பதுங்கியிருந்தபோது கைது செய்தனர். இக் கொலையில் வேறு யாருக்கேனும் தொடர்பு உள்ளதா என்பது குறித்து உயர்மட்டப் போலிஸ் அதிகாரிகள் தொடர்ந்து விசாரணை நடத்தி வருகின்றனர்.