சிவகாசி பட்டாசுத் தொழிலை உலக வர்த்தக அரங்கில் முன்னணி இடத்துக்கு கொண்டு செல்லும் நோக்கில், புதிய தொழில்துறை கொள்கை வடிவமைக்கப்பட்டு வருவதாக தமிழக தொழில்துறை அமைச்சர் எஸ்.கீர்த்தனா தெரிவித்துள்ளார். இந்த முயற்சி வெற்றியடைந்தால், விருதுநகர் மாவட்டத்தின் பொருளாதார வலிமையும், சர்வதேச அங்கீகாரமும் புதிய உயரத்தை எட்டும் என எதிர்பார்க்கப்படுகிறது.

இந்தியாவில் உற்பத்தியாகும் பட்டாசுகளில் பெரும்பாலானவை சிவகாசியிலேயே தயாரிக்கப்படுகின்றன. ஆண்டுதோறும் ஆயிரக்கணக்கான கோடி ரூபாய் மதிப்பிலான வர்த்தகத்தை தாங்கி நிற்கும் இந்தத் தொழில், தற்போது உலகளாவிய சந்தைகளில் தனது தடத்தை ஆழமாகப் பதிக்கும் இலக்குடன் முன்னேறி வருகிறது.

இதுகுறித்து அமைச்சர் எஸ்.கீர்த்தனா பேசியபோது, சீன தயாரிப்புகளுக்கு இணையாக சிவகாசி பட்டாசுகளை சர்வதேச சந்தைகளில் அறிமுகப்படுத்துவதற்கான நடவடிக்கைகள் தீவிரமாக முன்னெடுக்கப்படுவதாக தெரிவித்தார். இதன் மூலம் விருதுநகர் மாவட்டத்தின் தொழில் வளர்ச்சி மட்டுமின்றி, ஆயிரக்கணக்கான குடும்பங்களின் வாழ்வாதாரமும் மேம்படும் என்ற நம்பிக்கையையும் வெளிப்படுத்தினார்.

பட்டாசுத் தொழிலை நவீனமயமாக்கி, உலக நாடுகளின் தரநிலைகளுக்கு ஏற்ப மாற்றும் வகையில் பிரத்யேக கொள்கை வடிவமைக்கப்பட உள்ளது. உற்பத்தி மையங்களில் பாதுகாப்பு நடைமுறைகளை மேலும் வலுப்படுத்தவும், விபத்துகளை குறைக்கவும், தொழிலாளர் நலனை உறுதிப்படுத்தவும் வல்லுநர்கள் அடங்கிய தனிக்குழு அமைக்கப்பட உள்ளதாக தெரிவிக்கப்படுகிறது.

மேலும், சென்னை மற்றும் தூத்துக்குடி துறைமுகங்கள் வழியாக பட்டாசுப் பொருட்களை பாதுகாப்பாகவும் விரைவாகவும் வெளிநாடுகளுக்கு அனுப்பும் தளவாட மற்றும் போக்குவரத்து வசதிகள் மேம்படுத்தப்பட உள்ளன.உலக நாடுகளில் சுற்றுச்சூழல் பாதுகாப்பு விதிமுறைகள் கடுமையடைந்து வரும் நிலையில், குறைந்த புகை மற்றும் குறைந்த மாசுபாட்டை உருவாக்கும் பசுமைப் பட்டாசுகள் தயாரிப்பை ஊக்குவிப்பதற்கும் அரசு முக்கியத்துவம் அளித்து வருகிறது.

சர்வதேச இறக்குமதி நெறிமுறைகளுக்கு ஏற்ப தயாரிப்புகளை மாற்றியமைப்பதன் மூலம், சிவகாசி பட்டாசுகள் உலக சந்தையில் தனித்துவமான இடத்தைப் பெறும் என்ற நம்பிக்கை நிலவுகிறது.தற்போது மிகப்பெரிய சில நிறுவனங்கள் மட்டுமே ஏற்றுமதியில் ஈடுபட்டு வரும் நிலையில், புதிய கொள்கையின் மூலம் சிறு, குறு மற்றும் நடுத்தர பட்டாசு உற்பத்தியாளர்களும் உலக வர்த்தகத்தில் பங்கேற்கும் வாய்ப்பைப் பெறுவார்கள் என எதிர்பார்க்கப்படுகிறது.

இதன் மூலம் தொழில் வளர்ச்சி பரவலாகப் பகிரப்பட்டு, கிராமப்புற பொருளாதாரத்துக்கும் புதிய உயிரோட்டம் கிடைக்கும் என தொழில்துறை வட்டாரங்கள் நம்பிக்கை தெரிவித்து வருகின்றன.பாதுகாப்பு, தொழில்நுட்ப மேம்பாடு, பசுமை உற்பத்தி மற்றும் ஏற்றுமதி விரிவாக்கம் ஆகிய நான்கு முக்கிய தூண்களை அடிப்படையாகக் கொண்டு வடிவமைக்கப்படும் இந்தத் திட்டம், சிவகாசி பட்டாசுத் தொழிலின் அடுத்த கட்ட வளர்ச்சிக்கான முக்கிய திருப்புமுனையாக அமையும் என தெரிவிக்கப்படுகிறது.