திமுக முன்னாள் அமைச்சரும், தற்போதைய எதிர்க்கட்சி துணைத் தலைவருமான கே.என். நேரு மற்றும் அவரது சகோதரர் ரவிச்சந்திரனுக்குச் சொந்தமான பல்வேறு இடங்களில் லஞ்ச ஒழிப்புத் துறை அதிகாரிகள் சனிக்கிழமை அதிகாலை முதல் அதிரடிச் சோதனையில் ஈடுபட்டு வருகின்றனர். சென்னை மற்றும் திருச்சி உள்ளிட்ட பகுதிகளில் அமைந்துள்ள அவர்களுக்குத் தொடர்புடைய 10-க்கும் மேற்பட்ட இடங்களில் இந்தச் சோதனை தீவிரமாக நடைபெற்று வருகிறது.

சென்னையில் மயிலாப்பூர், அடையாறு, திருவான்மியூர், அண்ணா நகர் மற்றும் அபிராமபுரம் ஆகிய முக்கியப் பகுதிகளில் உள்ள இல்லங்கள் மற்றும் அலுவலகங்களில் அதிகாரிகள் விரிவான ஆய்வுகளை மேற்கொண்டு வருகின்றனர். இதேபோல, திருச்சி தில்லை நகரில் அமைந்துள்ள கே.என். நேருவின் இல்லத்திலும், அவருக்குச் சொந்தமான பிற இடங்களிலும் நான்கு வாகனங்களில் வந்த லஞ்ச ஒழிப்புத் துறையினர் சோதனையில் ஈடுபட்டனர். சோதனை குறித்த தகவல் அறிந்தவுடன், தில்லை நகரில் உள்ள தனது இல்லத்திற்கு கே.என். நேரு உடனடியாக நேரில் வந்தார்.

சட்டவிரோதமாகப் பல்வேறு நிறுவனங்களை மிரட்டி 'கட்சி நிதி' என்ற பெயரில் பெரும்தொகை வசூலித்ததாக எழுந்த புகார்களின் அடிப்படையில் இந்த நடவடிக்கை மேற்கொள்ளப்படுவதாகக் கூறப்படுகிறது. மேலும், நகராட்சி நிர்வாகத் துறையில் பணி நியமனம் வாங்கித் தருவதாகக் கூறி ரூ.800 கோடிக்கும் மேல் முறைகேடு செய்த வழக்குகள் மற்றும் குடிநீர் வழங்கல் துறை டெண்டர் ஒதுக்கீடு முறைகேடுகள் தொடர்பாகவும் இந்தச் சோதனை நடத்தப்படலாம் எனத் தெரிகிறது. இருப்பினும், எந்தக் குறிப்பிட்ட வழக்கின் அடிப்படையில் சோதனை நடைபெறுகிறது என்பது குறித்த அதிகாரப்பூர்வ அறிவிப்புகள் எதுவும் இதுவரை வெளியாகவில்லை.

தற்போது சட்டப்பேரவைக் கூட்டத்தொடர் நடைபெற்று வரும் சூழலில், மாநிலத்தின் முக்கிய எதிர்க்கட்சித் தலைவர்களில் ஒருவரான கே.என். நேருவின் வீடுகளில் லஞ்ச ஒழிப்புத் துறையினர் நடத்தி வரும் இந்த அதிரடிச் சோதனை நடவடிக்கை, தமிழக அரசியல் களத்தில் பெரும் கவனத்தையும் பரபரப்பையும் ஏற்படுத்தியுள்ளது.