வேலூர் மாவட்டம் காட்பாடியில் செய்தியாளர்களைச் சந்தித்த திமுக பொதுச்செயலாளர் துரைமுருகன், தவெக அரசு மற்றும் தேர்தல் ஆணையத்தின் செயல்பாடுகள் குறித்துக் கடுமையான விமர்சனங்களை முன்வைத்துள்ளார்.

தேர்தல் ஆணையர் பதவி விலக வேண்டும்:

எஸ்.ஐ.ஆர். (SIR) விவகாரம் தற்போது பூதாகரமாக உருவெடுத்துள்ள நிலையில், இந்தியத் தலைமை தேர்தல் ஆணையரை உடனடியாக மாற்ற வேண்டும் என துரைமுருகன் வலியுறுத்தினார். "மம்தா பானர்ஜி, பினராயி விஜயன், மு.க.ஸ்டாலின் போன்ற மக்கள் செல்வாக்கு மிக்க தலைவர்கள் எவ்விதத்திலும் தேர்தலில் தோற்பதற்கு வாய்ப்பே இல்லை. எங்களைப் போன்ற தலைவர்கள் திட்டமிட்டுக் குறிவைத்துத் தோற்கடிக்கப்பட்டுள்ளோம்.

தலைமை தேர்தல் ஆணையர் ஒன்றும் அமைச்சர் அல்ல, அவரை உடனடியாக வீட்டிற்கு அனுப்புவதே சரியான வழிமுறையாகும். இதனை அரசியல் கட்சிகள் கடந்து அனைவரும் இணைந்து வலியுறுத்த வேண்டும்" என்று அவர் தெரிவித்தார்.

ஜெம் வீரமணி வழக்கில் திமுகவுக்குத் தொடர்பில்லை:

ஜெம் வீரமணி விவகாரம் குறித்துப் பேசிய அவர், "ஜெம் வீரமணி வழக்கில் திமுகவை எப்படிக் குறை சொல்ல முடியும்? வீரமணிக்கு திமுக ஒருபோதும் வக்காலத்து வாங்கவில்லை. சட்டத்தின் முன் அனைவரும் சமம், தவறு செய்தவர்கள் யாராக இருந்தாலும் தண்டிக்கப்பட வேண்டும்; சட்டம் தன் கடமையைச் செய்து வருகிறது. இந்த விவகாரத்தில் திமுகவுக்கு எந்தத் தொடர்பும் இல்லை என்பதை ஏற்கனவே அனைவரும் தெளிவுபடுத்திவிட்டனர். தவெக சட்டமன்ற உறுப்பினர்களுக்கும் அமைச்சர்களுக்கும் என்ன பேசுவது என்றே தெரியாமல் பேசி வருகிறார்கள்" எனச் சாடினார்.

மின்வெட்டு & இடைத்தேர்தல் வெற்றி:

தற்போதைய ஆட்சியில் மின்சாரம் சீராக உள்ளதாகக் கூறப்படுவதை மறுத்த அவர், சாதாரண ஏழை, எளிய குடும்பங்களில் தினசரி எவ்வளவு நேரம் மின்சாரம் துண்டிக்கப்படுகிறது என்பதைப் பொதுமக்கள் நன்கு அறிவார்கள் என்றார். மேலும், வரவிருக்கும் 2 தொகுதி இடைத்தேர்தல்களிலும் திமுகவின் வெற்றி வாய்ப்பு மிகவும் பிரகாசமாக உள்ளது என அவர் உறுதியுடன் தெரிவித்தார்.