மதுரையில் வரும் திங்கள்கிழமை நடைபெறவுள்ள அரசு விழாக்களுக்கான முன்னேற்பாடுகளைத் தவெக அமைச்சர் நிர்மல்குமார் காந்தி அருங்காட்சியகத்தில் நேரில் ஆய்வு செய்தார். அப்போது, எளிய மக்களின் நலனுக்காக 'தாய்மாமன் தங்க மோதிரம்' வழங்கும் புதிய திட்டத்தை முதலமைச்சர் ச. ஜோசப் விஜய் தொடங்கி வைக்க உள்ளதாகவும், புனரமைக்கப்பட்ட வரலாற்றுச் சிறப்புமிக்க காந்தி அருங்காட்சியகத்தைத் திறந்து வைக்க உள்ளதாகவும் அவர் தெரிவித்தார்.

இதனைத் தொடர்ந்து செய்தியாளர்களிடம் பேசிய அமைச்சர், "ஜெம் வீரமணி விவகாரத்தில் முந்தைய திமுக அரசு கையாண்ட விதம் முற்றிலும் தவறானது. அன்றைய முதலமைச்சர் மு.க. ஸ்டாலின் தலைமையிலான அரசு வீரமணியைக் காப்பாற்ற முயன்றதுடன், அவரை மிரட்டி நூற்றுக்கணக்கான கோடி ரூபாய் பேரம் பேசியுள்ளது. இவ்வழக்கில் அப்போதைய காவல்துறையைச் சேர்ந்த பலருக்கும் நேரடித் தொடர்பு உள்ளது. அன்று வழக்குப்பதிவு செய்தவர்கள் ஏன் வீரமணியை உடனே கைது செய்யவில்லை?" எனக் கேள்வி எழுப்பினார். மேலும், தவெக அரசு குறித்த சிபிஎம் மாநிலச் செயலாளர் பெ. சண்முகத்தின் கருத்து தவறான புரிதலால் வந்தது என்றும், அதுகுறித்து அவர் தெளிவுபடுத்துவார் என்றும் குறிப்பிட்டார்.

தொடர்ந்து திமுக மற்றும் அதிமுகவைச் சாடிய அவர், "நிதித்துறையில் தகுதியற்றவர் என திமுகவாலேயே ஓரங்கட்டப்பட்ட பி.டி.ஆர். பழனிவேல் தியாகராஜனுக்குத் தற்போது கட்சியில் எந்த மதிப்பும் இல்லை. எடப்பாடி பழனிசாமியின் சுயநலத்தால் அதிமுக முடங்கியது போல, இன்னும் இரு ஆண்டுகளில் திமுகவும் குடும்பச் சொத்தாக மாறி அழியும். திமுகவை ஒழிக்க வேண்டும் என்ற ஜெயலலிதாவின் கனவை முதலமைச்சர் விஜய் நிறைவேற்றுவார்" என்றார்.

மேலும் பாஜக குறித்தும் மின்வெட்டு குறித்தும் பேசிய நிர்மல்குமார், "வக்ஃபு மசோதா மற்றும் பரந்தூர் விமான நிலைய விவகாரங்களில் பாஜகவைத் துணிச்சலாக எதிர்த்துள்ளோம். பாஜகவை கொள்கை எதிரியாகக் கருதுவதில் நாங்கள் உறுதியாக இருக்கிறோம். அதேநேரம், மாநிலம் முழுவதும் மின் கட்டமைப்புச் சீரமைப்புப் பணிகள் தீவிரமாக நடந்து வருகின்றன; இன்னும் 3 மாதங்களுக்குள் மின்வெட்டுப் பிரச்னை முழுமையாகச் சரிசெய்யப்படும்" என உறுதியளித்தார்.