கோவை அரசு மருத்துவமனையில் நோயாளிகளுக்கு வழங்கப்படும் மாத்திரைகளை போட்டு தரும் பழுப்பு நிற கவரின் முன்புறத்தில் தமிழ், ஆங்கிலத்துடன் இந்தியும் அச்சிடப்பட்டிருப்பதாக முன்னாள் தொழில்துறை அமைச்சர் ராஜா தனது எக்ஸ் தளத்தில் பதிவிட்டது அரசியல் வட்டாரத்தில் சர்ச்சையை ஏற்படுத்தியுள்ளது.

இதற்கு பதிலளிக்கும் வகையில், தவெக தகவல் தொழில்நுட்ப அணியினர் தி.மு.க.வை கடுமையாக விமர்சித்துள்ளனர்.தவெக தகவல் தொழில்நுட்ப அணி வெளியிட்டுள்ள பதிவில் கூறியிருப்பதாவது,"கரூர் அரசு மருத்துவக் கல்லூரி மருத்துவமனைக்கு சிகிச்சைக்காக வரும் நோயாளிகளுக்கு வழங்கப்படும் மாத்திரை கவரில் தமிழ், ஆங்கிலம் ஆகியவற்றுடன் இந்தியும் இடம்பெற்றிருப்பதாகக் கூறி தி.மு.க.வினர் ஆவேசமாக எதிர்ப்பு தெரிவித்து வருகின்றனர்.

தமிழ்நாடு முதலமைச்சர் தலைமையில் இயங்கும் தங்கள் கட்சி, மொழிக்கொள்கையில் எந்த சமரசத்துக்கும் இடமளிக்காது என்றும், பேரறிஞர் அண்ணா கடைப்பிடித்த இருமொழிக் கொள்கையே தங்களது அரசின் உறுதியான நிலைப்பாடு என்றும் தவெக தெரிவித்துள்ளது.மேலும், இந்த விவகாரத்தில் உண்மை வேறுவிதமாக இருப்பதாக தவெக குற்றம் சாட்டியுள்ளது.

கடந்த 2025-ம் ஆண்டு டிசம்பர் மாதத்தில் கரூர் மருத்துவக் கல்லூரி மருத்துவமனை சார்பில் பிறப்பிக்கப்பட்ட உத்தரவின் அடிப்படையில், ஈரோடு கூட்டுறவு சங்க அச்சகத்தில் அச்சிடப்பட்ட மாத்திரை கவரில்தான் இந்தி இடம்பெற்றுள்ளதாக தவெக தெரிவித்துள்ளது.இதனை மறைத்துவிட்டு, தாய்மொழியை பாதுகாப்பது போன்று தி.மு.க.வினர் அரசியல் நாடகம் நடத்துவதாகவும் அந்தக் கட்சி விமர்சித்துள்ளது.

இந்த விவகாரம் தொடர்பாக சம்பந்தப்பட்ட மருத்துவக் கல்லூரி மருத்துவமனை முதல்வரும் விளக்கம் அளித்துள்ளதாக தவெக குறிப்பிட்டுள்ளது.கடந்த கால சம்பவத்தையும் தவெக தனது பதிவில் சுட்டிக்காட்டியுள்ளது.

1996-ம் ஆண்டு தி.மு.க. ஆட்சி அமைத்தபோது புதிதாக தேர்ந்தெடுக்கப்பட்ட சட்டமன்ற உறுப்பினர்களுக்கு இந்தி மற்றும் ஆங்கிலத்தில் இடம்பெற்ற அரசியல் சாசனப் புத்தகம் வழங்கப்பட்டதாகவும், 2001-ம் ஆண்டு சட்டமன்றத்தில் அப்போதைய முதல்-அமைச்சர் ஜெயலலிதா அந்தப் புத்தகத்தை அவையில் எடுத்துக்காட்டி தி.மு.க.வின் நிலைப்பாட்டை விமர்சித்ததாகவும் அந்தப் பதிவு குறிப்பிடுகிறது.

அப்போது தி.மு.க. சார்பில் பதிலளித்த பேராசிரியர் அன்பழகன், அவ்வாறு நடந்திருந்தால் அது தவறுதான் என்று தெரிவித்ததாகவும், அந்த தகவல் சட்டமன்ற சபைக்குறிப்பில் இடம்பெற்றுள்ளதாகவும் தவெக தெரிவித்துள்ளது.மேலும், ஆட்சியில் இருக்கும் காலங்களில் இந்திக்கு ஆதரவாக செயல்பட்டுவிட்டு, ஆட்சி அதிகாரத்தை இழந்ததும் மண், மொழி, இனம், மானம் ஆகியவற்றை காப்பவர்களைப் போன்று தி.மு.க.வினர் அரசியல் நிலைப்பாட்டை மாற்றிக் கொள்வதாகவும் தவெக குற்றம் சாட்டியுள்ளது.

இந்த விவகாரம் வெளிச்சத்துக்கு வந்த பின்னரும், உண்மையை மறைத்து மொழிப்பற்றாளர்களைப் போன்று அரசியல் நாடகம் நடத்துவது தி.மு.க.வின் வழக்கமான செயல்பாடாகிவிட்டதாகவும் தவெக தகவல் தொழில்நுட்ப அணி கடுமையாக விமர்சித்துள்ளது.