சென்னை சென்ட்ரல் – கூடூர் ரயில் பாதையில் மீஞ்சூர் – பொன்னேரி இடையே முக்கியமான பொறியியல் பராமரிப்பு பணிகள் மேற்கொள்ளப்பட உள்ளதால், சென்னை – கும்மிடிப்பூண்டி மார்க்கத்தில் இயங்கும் சில மின்சார ரயில் சேவைகள் தற்காலிகமாக ரத்து செய்யப்படுகின்றன.

அதன்படி, மார்ச் 10 மற்றும் 12 ஆகிய தேதிகளில் இரவு 11.20 மணிக்கு சென்னை சென்ட்ரலில் இருந்து கும்மிடிப்பூண்டி நோக்கி புறப்படும் மின்சார ரயில், மீஞ்சூர் – கும்மிடிப்பூண்டி இடையே பகுதி ரத்து செய்யப்பட்டுள்ளது.

இதற்கு மாற்றாக, மார்ச் 11 மற்றும் 13 ஆகிய தேதிகளில் அதிகாலை 3.50 மணிக்கு கும்மிடிப்பூண்டியில் இருந்து சென்னை சென்ட்ரலுக்கு புறப்பட வேண்டிய மின்சார ரயில், கும்மிடிப்பூண்டி – மீஞ்சூர் இடையே இயக்கப்படாது என அறிவிக்கப்பட்டுள்ளது.

இதற்கிடையில், அரக்கோணம் – ஜோலார்பேட்டை ரயில் பாதையில் உள்ள பச்சகுப்பம் யார்டில் நடைபெறும் பொறியியல் பணிகள் காரணமாக மெமு (MEMU) ரயில் சேவைகளிலும் மாற்றம் செய்யப்பட்டுள்ளது.

அதன்படி, இன்று காலை 9.30 மணிக்கு காட்பாடி – ஜோலார்பேட்டை இடையே இயக்கப்பட இருந்த மெமு ரயிலும், நண்பகல் 12.15 மணிக்கு ஜோலார்பேட்டை – காட்பாடி இடையே இயக்கப்பட வேண்டிய மற்றொரு மெமு ரயிலும் முழுமையாக ரத்து செய்யப்பட்டுள்ளன.

இந்த தகவலை சென்னை ரயில்வே கோட்டம் வெளியிட்ட செய்திக்குறிப்பில் தெரிவித்துள்ளது.பயணிகள் தங்கள் பயணத் திட்டங்களை முன்கூட்டியே சரிபார்த்து திட்டமிட வேண்டும் எனவும் ரயில்வே நிர்வாகம் அறிவுறுத்தியுள்ளது.