மதுராந்தகம், தாராபுரம் இடைத்தேர்தல்களில் தவெகவின் பிரச்சாரம் மக்கள் மத்தியில் போதிய ஆதரவை உருவாக்கவில்லை என்றும், ஆளும் கட்சி தனது ஆட்சியின் சாதனைகள் மற்றும் எதிர்காலத் திட்டங்களை முன்வைத்து பிரச்சாரம் செய்யாமல் எதிர்க்கட்சிகளை விமர்சிப்பதில் அதிக கவனம் செலுத்துவதாகவும் மூத்த பத்திரிகையாளர் சேகுவேரா விமர்சித்துள்ளார்.

ஜென்டில்மேன் சேனலில் பேசிய சேகுவேரா, மதுராந்தகத்தில் முதலமைச்சர் விஜய், அமைச்சர் ஆதவ் அர்ஜுனா, வேட்பாளர் மரகதம் குமரவேல் உள்ளிட்டோர் பேசிய விதத்தை விமர்சித்தார். “இவர்கள் எல்லோரும் பேசும்போது, நாம் ஏன் தமிழ்நாட்டில் பிறந்தோம் என்று தோன்றியது. எதற்காக இந்த மாதிரியான வார்த்தைகளை பயன்படுத்துகிறார்கள் என்று புரியவில்லை” என அவர் கூறினார்.

ஆதவ் அர்ஜுனாவின் பேச்சு முழுவதும் திமுக மீதான விமர்சனமாக இருப்பதாகவும், ஆனால் இடைத்தேர்தலில் முக்கியப் போட்டியாளர்களாக அதிமுகவும் தவெகவும் இருப்பதாகவும் சேகுவேரா தெரிவித்தார். இரண்டு தொகுதிகளிலும் கடந்த தேர்தலில் அதிமுக பெற்ற வாக்குகளை கருத்தில் கொள்ளாமல் திமுகவை தொடர்ந்து விமர்சிப்பது, இரண்டாவது இடத்தை தக்க வைத்துக்கொள்வதற்கான முயற்சியா என்ற கேள்வியை எழுப்புவதாகவும் அவர் குறிப்பிட்டார்.

முதலமைச்சர் விஜய்யின் பிரச்சார உரை குறித்தும் அவர் விமர்சனம் முன்வைத்தார். பெண்கள் பாதுகாப்பு குறித்து பேசும்போது தனிப்பட்ட குடும்ப உறுப்பினர்கள் தொடர்பான அவதூறுகளை குறிப்பிட்டு உணர்வுப்பூர்வமாக பேசுவதைவிட, ஆட்சியாளராக தனக்கு இருக்கும் அதிகாரம், சட்டம் மற்றும் காவல்துறை மூலம் பெண்களுக்கு எதிரான பிரச்சினைகளில் எவ்வாறு நடவடிக்கை எடுக்கப் போகிறார் என்பதை விளக்க வேண்டும் என அவர் கூறினார்.

மேலும், இதுபோன்ற பேச்சுகள் அரசியல் ரீதியாக செயற்கையான அனுதாபத்தை உருவாக்கும் முயற்சியாகத் தோன்றுவதாகவும், பெண்களின் வாக்குகளை ஈர்க்கும் நோக்கில் சினிமாத்தனமான பாணியில் பேசுவது போதாது என்றும் சேகுவேரா தனது கருத்தைத் தெரிவித்தார்.

தவெக அரசு ஆட்சிக்கு வந்துள்ள நிலையில், கடந்த நான்கு மாதங்களில் செய்த சாதனைகள் என்ன, இனி மக்களுக்காக என்ன செய்யப்போகிறது என்பதை விளக்கி பிரச்சாரம் செய்திருக்க வேண்டும் என்றும் அவர் கூறினார். “மாற்று அரசியலில் நாகரிகமும் கண்ணியமும் இருக்க வேண்டும். அதைவிட்டுவிட்டு ‘சப்ப பீஸ்’, ‘அங்கிள்’ என்று பேசுவது அரசியல் பிரச்சாரமாக இருக்க முடியாது” என அவர் விமர்சித்தார்.

வேட்பாளர் மரகதம் குமரவேல் கட்சி மாறியதற்கான காரணத்தை தெளிவாக விளக்க வேண்டும் என்றும் சேகுவேரா குறிப்பிட்டார். அதேபோல், தவெக தரப்பில் நடைபெறும் பிரச்சாரக் கூட்டங்களில் பயன்படுத்தப்படும் மொழியும், மேடையில் பேசப்படும் கருத்துகளும் மேலும் அரசியல் முதிர்ச்சியுடன் இருக்க வேண்டும் என அவர் வலியுறுத்தினார்.

மதுராந்தகம் தொகுதியில் மட்டும் ஒரு பெரிய கூட்டத்தை கூட்டி பிரச்சாரம் செய்வது போதாது என்றும், தொகுதியைச் சுற்றியுள்ள ஏராளமான கிராமங்களுக்குச் சென்று முதலமைச்சர் நேரடியாக மக்களை சந்திக்க வேண்டும் என்றும் சேகுவேரா தெரிவித்தார். தொகுதி மக்களின் உள்ளூர் பிரச்சினைகள், அரசு மேற்கொண்டுள்ள நடவடிக்கைகள் மற்றும் எதிர்காலத் திட்டங்கள் குறித்து நேரடியாக விளக்க வேண்டும் என்றும் அவர் கூறினார்.

மேலும், தேர்தல் திணிக்கப்படும் தேர்தல் என விமர்சனங்கள் முன்வைக்கப்படும் நிலையில், இடைத்தேர்தல் ஏன் வந்தது என்பதையும், அதற்கு தங்களது பார்வையில் யார் காரணம் என்பதையும் தவெக தரப்பு மக்களுக்கு தெளிவாக விளக்க வேண்டும் என்றும் சேகுவேரா தெரிவித்தார்.

கிரானைட் வீரமணி விவகாரம் உள்ளிட்ட சர்ச்சைகள் குறித்தும் அவர் கேள்வி எழுப்பினார். கட்சியின் பிரச்சாரத்தில் இதுபோன்ற விவகாரங்கள் தொடர்பான குற்றச்சாட்டுகளுக்கு விளக்கம் அளிக்காமல் தொடர்ந்து எதிர்க்கட்சிகளை விமர்சிப்பது மக்கள் மத்தியில் கேள்விகளை எழுப்பும் என்றும் அவர் கூறினார்.

இறுதியாக, மதுராந்தகத்தில் தவெக சார்பில் நிறுத்தப்பட்டுள்ள மரகதம் குமரவேல் வேட்பாளராக பல்வேறு விமர்சனங்களை எதிர்கொள்வதாகவும், அவரது கட்சி மாற்றம் குறித்த விவகாரம் தேர்தல் களத்தில் முக்கியப் பேசுபொருளாக இருப்பதாகவும் சேகுவேரா தெரிவித்தார். இரண்டு தொகுதிகளிலும் தவெகவுக்கு தற்போது தெளிவான ஆதரவு நிலைப்பாடு இருப்பதாகக் கூற முடியாத சூழல் காணப்படுவதாகவும், எனவே பிரச்சாரத்தின் அணுகுமுறையை மாற்றி, மக்களின் பிரச்சினைகள் மற்றும் ஆட்சியின் செயல்பாடுகளை மையப்படுத்துவது அவசியம் என்றும் அவர் கருத்து தெரிவித்துள்ளார்.