தமிழகத்தின் பிரதான எதிர்க்கட்சியான அதிமுகவில் உள்ளக கலகம் மீண்டும் தலைதூக்கியுள்ளது.
எடப்பாடி பழனிசாமிக்கு (இபிஎஸ்) எதிராக குரல் எழுப்பிய மூத்த தலைவர் செங்கோட்டையன் கட்சியில் இருந்து அதிரடியாக நீக்கப்பட்டுள்ளார்.

ஏற்கனவே, எடப்பாடி மீது எதிர்ப்பு தெரிவித்து வந்த ஓ.பன்னீர்செல்வம் (ஓபிஎஸ்), டி.டி.வி. தினகரன், மற்றும் வி.கே. சசிகலா ஆகியோர் கட்சியில் இருந்து நீக்கப்பட்டிருந்தனர். இப்போது அதே பாதையில் செங்கோட்டையனும் இணைந்திருக்கிறார்.

பசும்பொன்னில் தேவர் நினைவிடத்தில், ஓபிஎஸ் மற்றும் டிடிவியுடன் கைகோர்த்த செங்கோட்டையன்,“இபிஎஸ்ஸை வீழ்த்தும் வரை ஓய மாட்டோம்”என்று சபதம் எடுத்தது அதிமுக தலைமைக்கு பெரும் அதிர்ச்சியை ஏற்படுத்தியது.

இதையடுத்து கட்சி தலைமையகம் செங்கோட்டையனை கட்சியில் இருந்து நீக்கும் நடவடிக்கையை மேற்கொண்டது.
இதற்கு எதிராக செங்கோட்டையன்,“நீதிமன்றத்தில் வழக்கு தொடர்வேன்,”என்று எச்சரித்துள்ளார்.

இந்த நீக்கத்துக்கு சசிகலா மற்றும் டிடிவி தினகரன் ஆகியோர் கண்டனம் தெரிவித்துள்ளனர்.அவர்கள் வெளியிட்ட கூற்றில்,“எம்.ஜி.ஆர் காலத்திலிருந்து அதிமுகவில் இருந்த செங்கோட்டையனை நீக்கியது கட்சிக்கு பெரும் பின்னடைவு. இது கொல்லிக்கட்டையை எடுத்து தலையைச் சொரிவதற்கு சமம்,”என்று கடுமையாக விமர்சித்துள்ளனர்.

இந்நிலையில், கட்சிக்குள் எழுந்த அதிர்வை சமன்படுத்த முன்னாள் அமைச்சர் சி.வி. சண்முகம் முக்கியமான கருத்தை தெரிவித்துள்ளார்.
கட்சி நிகழ்வில் பேசிய அவர் கூறியதாவது:“அதிமுக என்பது தொண்டர்கள் இயக்கம். தலைவர்களை நம்பிய இயக்கம் அல்ல.
இன்று ஒருவர் தலைவராக வரலாம், நாளை வேறு ஒருவர் வரலாம்.ஆனால் தொண்டர்களை நம்பியே அதிமுக வளர்ந்தது.”

அவர் மேலும் கூறினார் —“திமுக கோபாலபுரம் குடும்பத்தை நம்பி உள்ளது. ஆனால் அதிமுக யாரையும் நம்புவதில்லை. தொண்டர்களை நம்பிய இயக்கம் இது.எந்த தலைவன் வந்தாலும் போனாலும், அதிமுக நீண்டகாலம் நிலைத்து நிற்கும்.
எம்.ஜி.ஆர், ஜெயலலிதா வழியில் எடப்பாடி பழனிசாமி ஆட்சியை உறுதியாக்க நாம் பாடுபட வேண்டும்.”

இதனுடன், கட்சி உட்பிரிவுகள் வெளிப்படையாகி வரும் நிலையில்,இபிஎஸ் தலைமையிலான அதிமுக “ஒழுங்கு மீறலுக்கு சுழியையும் விட்டுக்கொடுக்காது” என்ற உறுதியுடன் செயல்படுகிறது.

அதிமுகவில் நடைபெறும் இந்த தொடர் நீக்க நடவடிக்கைகள் — கட்சியில் ஒற்றுமையை உறுதிசெய்யும் முயற்சியாகவா?அல்லது எதிர்காலத்தில் பெரிய பிளவுக்கு முன்னோட்டமா?என்பது அடுத்த வாரங்களில் தெளிவாகும்.