அதிமுகவில் இருந்து பிரிந்த தலைவர்களை மீண்டும் ஒன்றிணைக்க வேண்டும் என்று வலியுறுத்திய முன்னாள் அமைச்சர் செங்கோட்டையன், இதற்காக பொதுச்செயலாளர் எடப்பாடி பழனிசாமிக்கு 10 நாள் கெடு விதித்திருந்தார். அவரது இந்த அறிவிப்பு, கட்சிக்குள் பெரும் பரபரப்பை ஏற்படுத்தியது.

இதையடுத்து, இன்று எடப்பாடி பழனிசாமி மூத்த நிர்வாகிகளுடன் அவசர ஆலோசனை நடத்தினார். ஆலோசனைக்குப் பிறகு, செங்கோட்டையன் வகித்து வந்த அதிமுக அமைப்பு செயலாளர் மற்றும் ஈரோடு புறநகர் மேற்கு மாவட்ட செயலாளர் பொறுப்புகளில் இருந்து நீக்கப்பட்டதாக அறிவிக்கப்பட்டது. இதோடு, அவரது ஈரோடு மாவட்ட ஆதரவாளர்களில் ஏழுபேரும் கட்சிப் பொறுப்புகளில் இருந்து விடுவிக்கப்பட்டனர்.

இந்நிலையில், தன்னை நீக்கிய தீர்மானம் குறித்து செங்கோட்டையன் பதிலளித்துள்ளார். “அதிமுக பொறுப்புகளில் இருந்து நீக்கப்பட்டதே எனக்கு வேதனை அல்ல, மாறாக மகிழ்ச்சி அளிக்கிறது. நான் கூறிய கருத்துகள் அனைத்தும் அதிமுக மீண்டும் ஆட்சிக்கு வரவேண்டும் என்ற நோக்கத்தில்தான். எம்.ஜி.ஆர் மற்றும் ஜெயலலிதா வழியில் கட்சி வலிமையடைய வேண்டும் என்பதற்காகவே ஒருங்கிணைப்பை வலியுறுத்தினேன்” என அவர் தெரிவித்தார்.

செங்கோட்டையன் நீக்கப்பட்டுள்ளதாலும், அவரின் ஆதரவாளர்களும் பொறுப்புகளில் இருந்து விடுவிக்கப்பட்டதாலும், அதிமுக உள்நிலை அரசியலில் புதிய கட்டம் தொடங்கியிருக்கிறது. கட்சிக்குள் ஒற்றுமை ஏற்படுமா அல்லது பிளவு மேலும் தீவிரமாவதாக மாறுமா என்பது அரசியல் வட்டாரங்களில் விவாதமாகியுள்ளது.