6 வயது சிறுமிக்கு பாலியல் தொந்தரவு.! ஓய்வு பெற்ற அரசு பஸ் ஓட்டுநருக்கு 20 ஆண்டுகள் சிறை..!

பெரம்பலூர் மாவட்டத்தில் 6 வயது சிறுமிக்கு பாலியல் ரீதியாக தொந்தரவு கொடுத்த ஓய்வு பெற்ற அரசு பேருந்து ஓட்டுநருக்கு 20 ஆண்டுகள் சிறை தண்டனை விதிக்கப்பட்டது.

பெரம்பலூர் மாவட்டம் வ.கீரனூர் பகுதியைச் சேர்ந்தவர் ஓய்வு பெற்ற அரசு பேருந்து ஓட்டுநர் மணி (82). இவர் கடந்த 2019ஆம் ஆண்டு 6 வயதுடைய சிறுமி வீட்டில் தனியாக இருந்தபோது பாலியல் ரீதியாக தொந்தரவு கொடுத்துள்ளார். இதையடுத்து இந்த சம்பவம் குறித்து சிறுமியின் தாய் குன்னம் காவல் நிலையத்தில் புகார் கொடுத்தார். இந்த புகாரின் அடிப்படையில் வழக்கு பதிவு செய்த போலீசார் விசாரணை மேற்கொண்டு போக்சோ சட்டத்தின் கீழ் மணியை கைது செய்தனர்.

இதையடுத்து இது தொடர்பான வழக்கு பெரம்பலூர் மாவட்ட மகளிர் நீதிமன்றத்தில் நடைபெற்று வந்தது. இந்நிலையில் இந்த வழக்கை விசாரித்த நீதிபதி, ஆறு வயது சிறுமிக்கு பாலியல் ரீதியாக தொந்தரவு கொடுத்த மணிக்கு 20 ஆண்டுகள் சிறை தண்டனையும், 20 ஆயிரம் ரூபாய் அபராதமும் விதித்து தீர்ப்பளித்தார். அபராதத்தை செலுத்த தவறினால் மேலும் 6 மாத சிறை தண்டனை அனுபவிக்க உத்தரவிட்டார். இதைத்தொடர்ந்து போலீசார் மணியை திருச்சி மத்திய சிறையில் அடைத்தனர்.