இந்தியாவுக்கு சுற்றுப்பயணம் மேற்கொண்டுள்ள நியூசிலாந்து கிரிக்கெட் அணிக்கு எதிராக நடைபெற்ற மூன்று போட்டிகள் கொண்ட ஒருநாள் தொடரில், இந்திய அணி 2–1 என்ற கணக்கில் தோல்வியை சந்தித்தது. சொந்த மண்ணில் நியூசிலாந்துக்கு எதிராக ஒருநாள் தொடரை இழந்தது ரசிகர்களிடையே பெரும் ஏமாற்றத்தையும், அணியின் செயல்பாடுகள் குறித்து கடும் விமர்சனங்களையும் ஏற்படுத்தியது.

இந்த நிலையில், ஒருநாள் தொடருக்குப் பிறகு அடுத்த கட்டமாக ஐந்து போட்டிகள் கொண்ட டி20 தொடரில் இந்திய அணி நியூசிலாந்தை எதிர்கொள்ள உள்ளது. சூரியகுமார் யாதவ் தலைமையிலான இந்திய டி20 அணி இந்த தொடரில் பங்கேற்கிறது. 2026 டி20 உலகக் கோப்பைக்கு முன்பான முக்கியமான தயாரிப்பு தொடராக இந்த டி20 தொடர் பார்க்கப்படுவதால், இந்திய அணிக்கு இது மிகுந்த முக்கியத்துவம் பெற்றதாக கருதப்படுகிறது. ஒருநாள் தொடரில் ஏற்பட்ட தோல்விக்கு பதிலடி கொடுக்கும் வகையிலும், உலகக் கோப்பை அணியை வடிவமைக்கும் நோக்கிலும் இந்திய அணி இந்த தொடரில் களமிறங்குகிறது.

இந்நிலையில், நியூசிலாந்துக்கு எதிரான முதல் டி20 போட்டிக்கான அணித் தேர்வு குறித்து இந்திய அணித் தலைவர் சூரியகுமார் யாதவ் முக்கிய தகவலை வெளியிட்டுள்ளார். காயம் காரணமாக திலக் வர்மா இந்த தொடரில் இடம் பெறாத நிலையில், அவருக்கு மாற்றாக ஷ்ரேயாஸ் ஐயர் முதல் போட்டியில் விளையாட மாட்டார் என அவர் உறுதி செய்துள்ளார். அதற்கு பதிலாக, மூன்றாவது இடத்தில் இஷான் கிஷனே விளையாடுவார் என்றும் சூரியகுமார் அறிவித்துள்ளார்.

இதுகுறித்து பேசிய சூரியகுமார் யாதவ், “மூன்றாவது இடத்திற்கு எங்களுடைய முதல் தேர்வு இஷான் கிஷன் தான். அவர் 2026 டி20 உலகக் கோப்பை அணியிலும் இடம் பெற்றுள்ளதால், இந்த போட்டியில் விளையாடுவது அவருக்கு உரியது. ஷ்ரேயாஸ் ஐயரை முதல் போட்டியில் விளையாட வைக்கவில்லை” என்று தெரிவித்தார். நீண்ட காலமாக இந்திய அணிக்காக விளையாடாமல் இருந்த இஷான் கிஷன் மீண்டும் எவ்வாறு செயல்படுவார் என்பதைப் பார்க்க ஆவலாக உள்ளதாகவும் அவர் கூறினார்.

மேலும், திலக் வர்மா மற்றும் வாஷிங்டன் சுந்தர் ஆகியோர் காயம் காரணமாக அணியில் இடம் பெறாதது வருத்தமளிப்பதாகவும், இருப்பினும் கிடைக்கும் வாய்ப்புகளை பயன்படுத்தி அணியை சிறப்பாக அமைப்பதே குறிக்கோள் எனவும் சூரியகுமார் யாதவ் தெரிவித்துள்ளார். இந்த டி20 தொடர் இந்திய அணியின் எதிர்கால திட்டங்களில் முக்கிய பங்கு வகிக்கும் என்பதால், ரசிகர்களின் எதிர்பார்ப்பும் அதிகரித்துள்ளது.