ஆஸ்திரேலியாவின் சிட்னி நகரில் விறுவிறுப்பாக நடைபெற்று வரும் ஆஸ்திரேலிய ஓபன் பேட்மிண்டன் தொடரில் இந்திய வீராங்கனைகள் சிறப்பான ஆட்டத்தை வெளிப்படுத்தி அடுத்த கட்டத்தை நோக்கி முன்னேறியுள்ளனர்.

பெண்கள் ஒற்றையர் பிரிவு தொடக்கச் சுற்றில் இந்தியாவின் முன்னணி நட்சத்திர வீராங்கனையான பி.வி. சிந்து, பெரு நாட்டைச் சேர்ந்த ஐனிஸ் காஸ்டிலோவை எதிர்கொண்டார்.

ஆட்டத்தின் தொடக்கம் முதலே ஆதிக்கம் செலுத்திய சிந்து, துல்லியமான அடிகளும் வேகமான நகர்வுகளும் மூலம் எதிராளிக்கு வாய்ப்பளிக்காமல் விளையாடினார்.இதன் பலனாக, 21-13, 21-11 என்ற நேர்செட் கணக்கில் அபார வெற்றி பெற்ற அவர், இரண்டாவது சுற்றுக்கான நுழைவுச்சீட்டை உறுதிப்படுத்தினார்.

மற்றொரு முதல் சுற்று ஆட்டத்தில் இந்தியாவின் இளம் வீராங்கனை மாளவிகா பன்சோத், தாய்லாந்தைச் சேர்ந்த டோன்ரக் சேஹெங்கை எதிர்கொண்டார்.

முதல் செட்டை இழந்த நிலையில் பின்னடைவை சந்தித்த மாளவிகா, அதன்பின்னர் ஆக்ரோஷமான ஆட்டத்தை வெளிப்படுத்தி போட்டியின் போக்கையே மாற்றினார்.

அசத்தலான மீள்வரவை பதிவு செய்த அவர், 15-21, 21-7, 21-13 என்ற செட் கணக்கில் வெற்றி பெற்று அடுத்த சுற்றுக்கு முன்னேறினார்.இந்திய வீராங்கனைகள் இருவரின் வெற்றியும் ரசிகர்களிடையே உற்சாகத்தை ஏற்படுத்தியுள்ள நிலையில், தொடரின் அடுத்த கட்டப் போட்டிகளிலும் அவர்கள் சிறப்பாக செயல்படுவார்கள் என்ற எதிர்பார்ப்பு அதிகரித்துள்ளது.