பாம்பை சுற்றி காலங்காலமாக பல்வேறு நம்பிக்கைகளும், சுவாரஸ்யமான கதைகளும் உலவி வருகின்றன. பாம்பை கையில் தொட்டால் உடலில் விஷம் ஏறிவிடும், பாம்பு தோல் உரிப்பதை பார்த்துவிட்டால் அது நம்மை தேடி வந்து தாக்கும் என்பன போன்ற கருத்துகளை பலரும் கேள்விப்பட்டிருப்போம்.ஆனால், இவற்றில் எது உண்மை? பாம்புகள் ஏன் தோலை உரிக்கின்றன? அனைத்து பாம்புகளும் தோல் உரிக்குமா? எவ்வளவு காலத்திற்கு ஒருமுறை இந்த நிகழ்வு நடைபெறும்? தோலை உரிக்காமல் இருந்தால் என்ன ஆகும்? என்பன போன்ற கேள்விகளுக்கு இயற்கை அறிவியல் தெளிவான விளக்கத்தை அளிக்கிறது.

பாம்பு முதுகெலும்பைக் கொண்ட ஊர்வன வகையைச் சேர்ந்த உயிரினமாகும். அதன் உடலின் கீழ்ப்பகுதியில் அமைந்துள்ள செதில்கள், தரையில் ஊர்ந்து நகர்வதற்கு முக்கிய பங்கு வகிக்கின்றன.பாம்பு வளரும்போது அதன் உடலின் வெளிப்புற தோல் அதே வேகத்தில் விரிவடையாது. இதனால் பழைய வெளிப்புற தோல் இறுக்கமாகி, புதிய தோல் உருவாகும். பழைய தோலை அகற்றி புதிய தோலை வெளிக்கொண்டு வருவதே பாம்பின் தோல் உரித்தல் எனப்படுகிறது.

இதன் மூலம் பாம்பு தனது உடலை வளர்ச்சிக்கு ஏற்ப புதுப்பித்துக் கொள்கிறது.பாம்பு வாழ்நாள் முழுவதும் ஒரே தோலுடன் இருப்பதில்லை. வளர்ச்சியின் வேகம், வயது, உடல்நிலை, உணவு மற்றும் சுற்றுச்சூழல் போன்ற காரணிகளைப் பொறுத்து தோல் உரிக்கும் கால இடைவெளி மாறுபடும்.இளம் பாம்புகள் வேகமாக வளர்வதால், வயது வந்த பாம்புகளைவிட அடிக்கடி தோல் உரிக்கக்கூடும். சில பாம்புகள் வருடத்திற்கு பல முறை தோலை மாற்றுகின்றன.

மரங்கள் பழைய இலைகளை உதிர்த்து புதிய இலைகளை உருவாக்குவது போல, பாம்பும் தனது பழைய வெளிப்புற தோலை அகற்றி புதிய தோலுக்கு மாறுகிறது.தோல் உரிக்கும் காலம் நெருங்கும்போது பாம்பின் தோற்றத்தில் சில மாற்றங்கள் ஏற்படும். அதன் உடல் நிறம் மங்கலாகத் தோன்றலாம். கண்களை மூடியிருப்பது போலவும் காணப்படலாம்.இந்த நிலையில் பாம்பு அமைதியான, பாதுகாப்பான இடத்தைத் தேடி ஒதுங்கிக் கொள்ளும்.

பின்னர் தலையின் முன்பகுதியை கல், மரப்பட்டை அல்லது பிற கடினமான பொருட்களில் உரசுவதன் மூலம் பழைய தோலில் பிளவு ஏற்படுத்துகிறது. அந்தப் பிளவு படிப்படியாக உடல் முழுவதும் பரவி, பாம்பு தனது உடலை நெளித்து பழைய தோலில் இருந்து வெளியேறுகிறது.தோல் முழுமையாக நீங்கிய பிறகு, பாம்பின் புதிய தோல் வழக்கத்தைவிட பளபளப்பாகவும் தெளிவாகவும் காணப்படும்.பாம்பு தோல் உரிக்கும் நேரத்தில் அதனை பார்த்தாலே அது பழிவாங்கும் என்ற நம்பிக்கைக்கு அறிவியல் ஆதாரம் இல்லை.

ஆனால், அந்த காலகட்டத்தில் பாம்பின் பார்வை தெளிவாக இல்லாமல் இருக்கலாம். உடலும் ஒருவித அசௌகரியத்தில் இருக்கும். இதனால் மனிதர்கள் அருகில் சென்று தொந்தரவு செய்தால், தன்னை பாதுகாத்துக் கொள்ளும் நோக்கில் பாம்பு தாக்க முயற்சி செய்யக்கூடும்.எனவே, தோல் உரிக்கும் பாம்பை பார்த்தால் அதற்கு அருகில் செல்லாமல் பாதுகாப்பான இடைவெளியை கடைப்பிடிப்பதே சரியான நடைமுறையாகும்.

பாம்பின் உடலை தொட்டாலே விஷம் உடலுக்குள் ஏறிவிடும் என்பது தவறான நம்பிக்கை.பாம்பின் தோலில் விஷம் இருப்பதில்லை. விஷமுள்ள பாம்பின் விஷம் அதன் விஷப்பற்கள் மற்றும் விஷச் சுரப்பிகளுடன் தொடர்புடையது. பாம்பு கடிக்கும் போது விஷம் உடலுக்குள் செலுத்தப்படுவதால்தான் ஆபத்து ஏற்படுகிறது.அதேபோல், பாம்பு உரித்துவிட்டுச் சென்ற பழைய தோலிலும் விஷம் இருப்பதாக கருதுவதற்கும் அறிவியல் அடிப்படை இல்லை.

ஒரு இடத்தில் பாம்பு காணப்பட்டால், அந்தப் பகுதியில் மீண்டும் பாம்பு இருப்பதற்கான வாய்ப்பு இருக்கலாம். குறிப்பாக, அங்கு உணவு, மறைவிடம் அல்லது தண்ணீர் போன்றவை இருந்தால் பாம்புகள் அந்தப் பகுதியை தொடர்ந்து பயன்படுத்தக்கூடும்.எனவே, பாம்பை பார்த்தவுடன் அதை நாமே பிடிக்கவோ, துரத்தவோ முயற்சி செய்வதை தவிர்க்க வேண்டும். வீடு அல்லது மக்கள் வசிக்கும் பகுதியில் பாம்பு தென்பட்டால், பயிற்சி பெற்ற பாம்பு மீட்பாளர்களின் உதவியை நாடுவது பாதுகாப்பானது.

பாம்பை விரட்ட புகை மூட்டுவது போன்ற பாரம்பரிய முறைகள் சில இடங்களில் வழக்கத்தில் இருந்தாலும், அவை எப்போதும் பாதுகாப்பானவை அல்லது உறுதியானவை என்று கருத முடியாது.பாம்பை சுற்றியுள்ள பல தலைமுறை நம்பிக்கைகளில் சில உண்மைக்கு புறம்பானவையாக இருந்தாலும், அவற்றை முற்றிலும் அலட்சியப்படுத்தாமல், பாம்பை கையாளும்போது எப்போதும் பாதுகாப்புக்கு முன்னுரிமை அளிப்பதே சிறந்தது.