நடிகர் விஜய்யின் மகன் ஜேசன் சஞ்சய், ‘சிக்மா’ படத்தின் மூலம் இயக்குநராக அறிமுகமாகிறார். சந்தீப் கிஷன், ராஜூ சுந்தரம் உள்ளிட்டோர் நடித்துள்ள இப்படத்தை லைகா நிறுவனம் தயாரித்துள்ளது. தமன் இசையமைத்துள்ளார்.

‘சிக்மா’ திரைப்படம் முதலில் ஜூலை 31ஆம் தேதி வெளியாகும் என அறிவிக்கப்பட்டிருந்தது. ஆனால் விஜய் நடித்த ‘ஜனநாயகன்’ திரைப்படம் ஜூலை 23ஆம் தேதி வெளியானதால், ஒரே குடும்பத்தைச் சேர்ந்த இருவரின் படங்களும் அடுத்தடுத்து வெளியாக வேண்டாம் என்பதற்காக ‘சிக்மா’ ரிலீஸ் தள்ளிவைக்கப்பட்டதாக கூறப்படுகிறது. படத்தின் புதிய ரிலீஸ் தேதி குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.

இதற்கிடையே, படத்தின் புரமோஷன் பணிகளில் ஈடுபட்டு வரும் ஜேசன் சஞ்சய், சமீபத்திய பேட்டிகளில் தனது தந்தை விஜய், குடும்பம் மற்றும் தனது சினிமா பயணம் குறித்து பல்வேறு தகவல்களை பகிர்ந்து வருகிறார்.

அந்த வகையில், விஜய் தனக்கு வழங்கிய அறிவுரை குறித்தும் அவர் பேசியிருந்தார். “உனக்கு என்ன வேண்டும் என்பதை நீதான் என்னிடம் கேட்க வேண்டும். நானாக வந்து உதவ மாட்டேன். நீ முன்னெடுத்து வரும் விஷயமாக இருந்தால், அதற்கு நான் உதவுவேன்” என விஜய் கூறியதாக ஜேசன் தெரிவித்திருந்தார்.

இந்தப் பேச்சை வைத்து விஜய்க்கும் ஜேசனுக்கும் இடையே கருத்து வேறுபாடு இருப்பதாக சமூக வலைதளங்களில் சில விவாதங்கள் எழுந்தன. ஆனால், இதுகுறித்து இருவரிடமிருந்தும் எந்தவிதமான அதிகாரப்பூர்வ தகவலும் வெளியாகவில்லை.

இதற்கிடையே ‘சிக்மா’ படத்தின் புரமோஷன் பணிகளில் அஜித்தின் நீண்டகால மேலாளரான சுரேஷ் சந்திரா பணியாற்றுவது திரையுலகில் கவனம் பெற்றது. விஜய்–அஜித் ரசிகர்களிடையே பல ஆண்டுகளாக இருந்த போட்டிக்கு மத்தியில், அஜித்தின் நெருங்கிய வட்டத்தைச் சேர்ந்த ஒருவர் விஜய்யின் மகனின் படத்தில் பணியாற்றுவது ரசிகர்களிடையே பாராட்டைப் பெற்றது.

இந்த நிலையில், பத்திரிகையாளர் வி.கே.சுந்தர் அளித்த பேட்டியில் இதுகுறித்து சுவாரஸ்யமான தகவலை பகிர்ந்துள்ளார்.

அவர் கூறியதாக வெளியாகியுள்ள தகவலின்படி, சுரேஷ் சந்திராவை தனது படத்தின் பி.ஆர்.ஓ.வாக பணியாற்ற ஜேசன் சஞ்சய் விரும்பியுள்ளார். இதற்காக சுரேஷ் சந்திரா அஜித்திடம் அனுமதி கேட்டபோது, அஜித் எந்தத் தயக்கமும் இல்லாமல் சம்மதித்ததாக கூறப்படுகிறது.

மேலும், சுரேஷ் சந்திரா மூலமாக ஜேசன் சஞ்சயைத் தொடர்புகொண்ட அஜித், “சினிமாவில் உனக்கு என்ன உதவி வேண்டுமானாலும் தயங்காமல் கேள். நான் உன்னுடன் நிற்கிறேன்” என கூறியதாகவும் வி.கே.சுந்தர் தெரிவித்துள்ளார்.

இதனால், விஜய்யுடன் நீண்டகாலமாக திரைத்துறையில் போட்டியாளராக பார்க்கப்பட்ட அஜித், அவரது மகன் ஜேசன் சஞ்சயை நண்பரின் மகனாக மட்டுமல்லாமல், தனது சொந்த மகனைப் போல அன்புடன் அணுகியிருப்பதாக ரசிகர்கள் சமூக வலைதளங்களில் பாராட்டி வருகின்றனர்.

ஜேசன் சஞ்சயின் ‘சிக்மா’ திரைப்படம் வெளியாகும் நிலையில், அஜித்தின் இந்த ஆதரவு அவரது இயக்குநர் பயணத்திற்கு எந்த அளவுக்கு உறுதுணையாக அமையப் போகிறது என்பதையும் ரசிகர்கள் எதிர்பார்த்து வருகின்றனர்.