கர்நாடக முதலமைச்சராக சித்தராமையாவுக்குப் பதிலாக துணை முதல்வர் டி.கே. சிவகுமார் பொறுப்பேற்பார் என்ற ஊகங்கள் மற்றும் செய்திகள் பரவத் தொடங்கியுள்ளன. ஏனெனில், காங்கிரஸ் பொதுச் செயலாளர் ரன்தீப் சிங் சுர்ஜேவாலாவின் திடீர் பெங்களூரு வருகை இந்த விவாதத்தை மேலும் தூண்டியுள்ளது.

கடந்த திங்களன்று, காங்கிரசின் தேசிய தலைவர் மல்லிகார்ஜுன கார்கேவிடம், "கர்நாடக முதல்வர் அக்டோபரில் மாற்றப்படுவார் என்று சொல்கிறார்கள்" என்று செய்தியாளர்கள் கேள்வி கேட்டனர். அதற்கு அவர், "அது உயர்மட்டத்தின் எல்லைக்குள் உள்ள விஷயம். இங்கு உயர்மட்டத்தில் என்ன நடக்கிறது என்பதை யாராலும் சொல்ல முடியாது.

இந்த விஷயத்தை உயர்மட்டத்திடம் விட்டு விட்டோம், மேலும் நடவடிக்கை எடுக்க அவர்களுக்கு அதிகாரம் உள்ளது. தேவையற்ற பிரச்சினைகளை யாரும் உருவாக்கக்கூடாது" என்று பதிலளித்து இருந்தார்.

இதற்கிடையே டி.கே. சிவகுமார் அணியை சேர்ந்த தலைவர்கள் தலைமை மாற்றத்தில் நம்பிக்கையை வெளிப்படுத்தி வருகின்றனர். அதன்படி, கடந்த ஞாயிற்றுக்கிழமை அன்று, காங்கிரஸ் எம்.எல்.ஏ. எச்.ஏ. இக்பால் உசேன், "டி.கே. சிவகுமார் அடுத்த இரண்டு அல்லது மூன்று மாதங்களில் முதலமைச்சராக வாய்ப்பு பெறலாம்" என்று கூறியிருந்தார்.

அத்துடன் தற்போதை துணை முதல்வர் சிவகுமாரின் கடின உழைப்பு மற்றும் கட்சியின் வெற்றிக்கான உத்திகள் பற்றி அனைவருக்கும் தெரியும் என்றும், சரியான நேரத்தில் உயர்கட்டளை அவருக்கு ஒரு வாய்ப்பை வழங்கும் என்றும் அவர் நம்பிக்கை தெரிவித்து இருந்தார்.

மேலும், செப்டம்பர் மாதத்திற்குப் பிறகு மாநிலத்தில் முக்கிய அரசியல் மாற்றங்கள் ஏற்படும் என்று சில தலைவர்கள் கூறி வருவதாகவும், அதைப் பற்றி அவர் பேசி வருவதாகவும் அவர் குறிப்பிட்டார். 

கடந்த 2023 மே-இல் கர்நாடகாவில் காங்கிரஸ் கட்சி வெற்றியைப் பெற்றது. அப்போது முதல்வர் பதவிக்கு சித்தராமையா மற்றும் டி.கே. சிவகுமார் இடையே கடுமையான போட்டி நிலவியது. அந்த நேரத்தில், உயர்மட்டக் குழு இருவருக்கும் இடையே சமரசம் செய்து சித்தராமையாவை முதலமைச்சராகவும், சிவகுமாரை துணை முதலமைச்சராகவும் நியமித்தமை குறிப்பிடத்தக்கது.

இந்நிலையில், இரண்டரை ஆண்டுகளுக்குப் பிறகு சிவகுமாருக்கு முதலமைச்சர் பதவி வழங்கப்படும் வகையில், அவர்களுக்கு இடையே சுழற்சி முறையில் முதல்வர் ஒப்பந்தம் எட்டப்பட்டதாக செய்திகள் வெளியாகின. ஆனால், அது குறித்து கட்சி தரப்பில் எந்த அதிகாரப்பூர்வமான உறுதிப்படுத்தலும் வெளியிடவில்லை.