தமிழ்நாடு முதலமைச்சர் விஜய் அண்மையில் இரண்டு நாள் பயணமாக டெல்லி சென்றிருந்த நிலையில், மக்களவை எதிர்க்கட்சித் தலைவர் ராகுல் காந்தியை அவர் சந்திப்பார் என அரசியல் வட்டாரங்களில் பெரும் எதிர்பார்ப்பு நிலவியது. ஆனால் அந்த சந்திப்பு நடைபெறாதது பல்வேறு யூகங்களுக்கும் விவாதங்களுக்கும் வழிவகுத்தது.

முதலமைச்சராக பொறுப்பேற்ற பிறகு முதல் முறையாக டெல்லி சென்ற விஜய், குடியரசுத் தலைவர், பிரதமர் நரேந்திர மோடி, மத்திய நிதியமைச்சர் நிர்மலா சீதாராமன் உள்ளிட்ட தலைவர்களை சந்தித்து தமிழகத்தின் கோரிக்கைகளை முன்வைத்தார். இருப்பினும் மத்திய உள்துறை அமைச்சர் அமித்ஷாவை சந்திக்க நேரம் கிடைக்காததால் அந்த சந்திப்பு நடைபெறவில்லை.

பிரதமர் மோடியுடனான விஜய்யின் சந்திப்பு சுமார் 10 நிமிடங்கள் மட்டுமே நீடித்ததாக தகவல்கள் வெளியானது. இதையடுத்து, இவ்வளவு குறுகிய நேரத்தில் தமிழகத்தின் முக்கிய கோரிக்கைகளை முழுமையாக எடுத்துரைக்க முடியுமா என்ற கேள்விகளும் எழுந்தன.

இதற்கிடையில், ராகுல் காந்தி, சோனியா காந்தி மற்றும் காங்கிரஸ் தலைவர் மல்லிகார்ஜுன கார்கே ஆகியோரை விஜய் சந்திப்பார் என்ற தகவல்கள் வெளியாகின. மேலும் சோனியா காந்தி இல்லம் அருகே விஜய்-ராகுல் காந்தி புகைப்படங்களுடன் பேனர்கள் வைக்கப்பட்டிருந்ததும் அரசியல் கவனத்தை ஈர்த்தது.

ஆனால் எதிர்பார்க்கப்பட்ட அந்த சந்திப்பு நடைபெறாமல், தனது அதிகாரப்பூர்வ நிகழ்ச்சிகளை முடித்துக்கொண்ட விஜய் நேரடியாக விமான நிலையம் சென்று சென்னை திரும்பினார்.

இந்த விவகாரம் அரசியல் அரங்கில் பரபரப்பை ஏற்படுத்திய நிலையில், காங்கிரஸ் கட்சியின் மூத்த நிர்வாகியான பிரவீன் சக்கரவர்த்தி விளக்கம் அளித்துள்ளார்.

செய்தியாளர்களிடம் பேசிய அவர், “முதலமைச்சர் விஜய் டெல்லி வருகையின்போது ராகுல் காந்தியை சந்திக்கிறார் என்று எந்த அதிகாரப்பூர்வ அறிவிப்பும் வெளியிடப்படவில்லை. அந்த சந்திப்பு திட்டமிடப்பட்டதாகவும் நாங்கள் கூறவில்லை. எனவே இது தொடர்பாக தேவையற்ற விவாதங்கள் உருவாகியுள்ளன” என்றார்.

மேலும், “நேற்று ராகுல் காந்தி பல்வேறு அரசியல் மற்றும் கட்சிப் பணிகளில் பிஸியாக இருந்தார். அதனால் விஜய்க்கு நேரம் ஒதுக்க முடியவில்லை. இதன் காரணமாகவே அந்த சந்திப்பு நடைபெறவில்லை. எதிர்காலத்தில் விஜய் மீண்டும் டெல்லி வரும்போது இருவரும் சந்திக்கும் வாய்ப்பு உள்ளது” என்றும் தெரிவித்தார்.

தமிழகத்தில் நீண்ட இடைவெளிக்குப் பிறகு காங்கிரஸ் அமைச்சரவையில் இடம்பெற்றுள்ள சூழலில், விஜய் மற்றும் காங்கிரஸ் தலைமை இடையிலான உறவு அரசியல் ரீதியாக முக்கியத்துவம் வாய்ந்ததாக பார்க்கப்படுகிறது. எனவே, எதிர்காலத்தில் இந்த சந்திப்பு நடைபெறுமா என்பது அரசியல் வட்டாரங்களில் தொடர்ந்து கவனிக்கப்படும் விஷயமாக உள்ளது.