தமிழக அரசியலில் புதிய சக்தியாக உருவெடுத்துள்ள தமிழக வெற்றிக்கழகம், சட்டசபைத் தேர்தலில் 108 தொகுதிகளை கைப்பற்றி மிகப்பெரிய அரசியல் எழுச்சியை பதிவு செய்தது. கட்சித் தலைவர் விஜய், பெரம்பூர் மற்றும் திருச்சி கிழக்கு ஆகிய இரு தொகுதிகளிலும் வெற்றி பெற்றதால், அரசியல் வட்டாரங்களில் பெரும் கவனம் ஈர்க்கப்பட்டது. இருப்பினும் அரசியல் விதிமுறைகளின்படி ஒரு தொகுதியை ராஜினாமா செய்ய வேண்டிய சூழல் ஏற்பட்டதால், த.வெ.க.வின் பலம் 107 ஆக குறைந்தது.

தனித்து ஆட்சி அமைக்க தேவையான 118 உறுப்பினர்கள் இல்லாத நிலையில், கூட்டணி ஆதரவை உறுதிப்படுத்தும் முயற்சியில் த.வெ.க. தீவிரமாக இறங்கியது. முதன்முதலில் தமிழக காங்கிரஸ் கட்சி விஜய்க்கு ஆதரவு தெரிவித்து, அமைச்சரவையிலும் பங்கேற்க விருப்பம் தெரிவித்தது அரசியல் சூழலை பரபரப்பாக்கியது.

இதனைத் தொடர்ந்து நீண்டகால அரசியல் ஆலோசனைகள் மற்றும் இழுபறிகளுக்கு பிறகு, இந்திய கம்யூனிஸ்டு கட்சி, மார்க்சிஸ்ட் கம்யூனிஸ்டு கட்சி, விடுதலை சிறுத்தைகள் கட்சி, இந்திய யூனியன் முஸ்லிம் லீக் உள்ளிட்ட கட்சிகளும் த.வெ.க.வுக்கு ஆதரவு அளித்தன. இந்த ஆதரவுகளின் மூலம் த.வெ.க. கூட்டணியின் பலம் 120 ஆக உயர்ந்து, ஆட்சியமைப்பதற்கான பெரும்பான்மை உறுதியாகியது.

இதையடுத்து, த.வெ.க. தலைவர் விஜய் நேற்று தமிழக பொறுப்பு ஆளுநர் ராஜேந்திர அர்லேகரை நேரில் சந்தித்து, ஆட்சி அமைக்க உரிமை கோரினார். அப்போது, பெரும்பான்மையை நிரூபிக்கும் ஆதரவு கடிதங்களையும் அவர் சமர்ப்பித்தார். அவற்றை பரிசீலித்த ஆளுநர், விஜய் தலைமையிலான அரசை அமைக்க அதிகாரப்பூர்வ அழைப்பை வழங்கினார்.

அதன்படி, சென்னை நேரு உள் விளையாட்டு அரங்கில் இன்று நடைபெற்ற பிரமாண்ட விழாவில் விஜய் தமிழகத்தின் முதலமைச்சராக பதவியேற்றார். அவரைத் தொடர்ந்து என். ஆனந்த், ஆதவ் அர்ஜுனா, அருண்ராஜ், செங்கோட்டையன், வெங்கடரமணன், நிர்மல்குமார், ராஜ்மோகன், டி.கே. பிரபு மற்றும் கீர்த்தனா உள்ளிட்டோர் அமைச்சர்களாக பொறுப்பேற்றுக் கொண்டனர்.

பதவியேற்பு விழாவிற்கு பின்னர் முதல்முறையாக சென்னை தலைமைச் செயலகத்திற்கு வந்த முதலமைச்சர் விஜய்க்கு, அங்கு காவலர்கள் மரியாதை அணிவகுப்புடன் வரவேற்பு அளித்தனர். பின்னர் முதலமைச்சர் அறையில் அமர்ந்து, தற்காலிக சபாநாயகர் நியமன கோப்புகளில் கையெழுத்திட்டார்.

அதன்படி, மதுரை மாவட்டம் சோழவந்தான் தனித்தொகுதியில் வெற்றி பெற்ற கருப்பையா தற்காலிக சபாநாயகராக நியமிக்கப்பட்டுள்ளார். அவர் நாளை புதிதாக தேர்ந்தெடுக்கப்பட்ட சட்டமன்ற உறுப்பினர்களுக்கு பதவிப்பிரமாணம் செய்து வைக்க உள்ளார்.

2011 முதல் 2016 வரை அ.தி.மு.க. சார்பில் சட்டமன்ற உறுப்பினராக பணியாற்றிய கருப்பையா, இந்த தேர்தலில் அக்கட்சியில் வாய்ப்பு மறுக்கப்பட்டதைத் தொடர்ந்து த.வெ.க.வில் இணைந்து போட்டியிட்டு வெற்றி பெற்றது குறிப்பிடத்தக்க அரசியல் திருப்பமாக பார்க்கப்படுகிறது .