மலையாளம் மற்றும் தமிழ் திரையுலகில் கவனம் பெற்ற நடிகைகளில் ஒருவரான அனுபமா பரமேஸ்வரன், சமூக வலைதளத்தில் பகிர்ந்துள்ள உணர்ச்சிப்பூர்வ பதிவு ரசிகர்கள் மத்தியில் பரவலாக பேசப்பட்டு வருகிறது. குறிப்பாக, அவரது பதிவு தனிப்பட்ட வாழ்க்கையைப் பற்றியதா என்ற கேள்வி சமூக வலைதளங்களில் எழுந்துள்ளது.

அனுபமா பரமேஸ்வரன் தமிழில் சமீபத்தில் வெளியான 'டிராகன்' மற்றும் 'பைசன்' திரைப்படங்களில் நடித்திருந்தார். இந்த இரண்டு படங்களிலும் அவரது நடிப்பு ரசிகர்களிடையே நல்ல வரவேற்பைப் பெற்றது. இதையடுத்து அவர் மேலும் சில தமிழ் படங்களில் நடிக்கவுள்ளதாகவும் தகவல்கள் வெளியாகி வருகின்றன.

இதற்கிடையில், கடந்த சில மாதங்களாக நடிகர் விக்ரமின் மகன் துருவ் விக்ரமுடன் அனுபமா பரமேஸ்வரன் தொடர்புபடுத்தி சமூக வலைதளங்களில் பல்வேறு வதந்திகள் பரவி வந்தன. எனினும், இருவரும் தங்களது உறவு குறித்து இதுவரை எந்த அதிகாரப்பூர்வ அறிவிப்பையும் வெளியிடவில்லை.

இந்த சூழலில், அனுபமா தனது சமூக வலைதளப் பதிவில்,"சில நேரங்களில் உங்கள் அமைதியை நீங்கள் கண்டறிய தேவையற்ற முட்டுக்கட்டைகளை கடந்து செல்ல வேண்டியிருக்கும். இன்று அந்த அமைதி என்னை தேடி வந்திருக்கிறது. இனி என் குரலையும், என் வாழ்க்கையையும் நானே தேர்ந்தெடுக்கிறேன். நான் கிட்டத்தட்ட மறந்துபோன என் வாழ்க்கையை மீண்டும் காதலிக்கத் தொடங்கியிருக்கிறேன். இது எனது ஹீலிங், சுதந்திரம் மற்றும் புதிய தொடக்கம்."என்று பதிவிட்டுள்ளார்.

இந்த பதிவு வெளியாகியதைத் தொடர்ந்து, அதன் பொருள் குறித்து சமூக வலைதளங்களில் பல்வேறு விளக்கங்கள் பகிரப்பட்டு வருகின்றன. சிலர் இதை அவரது தனிப்பட்ட வாழ்க்கையுடன் தொடர்புபடுத்தி கருத்து தெரிவித்து வரும் நிலையில், மற்றொரு தரப்பினர் இது அவரது வாழ்க்கைப் பயணம் மற்றும் மனநிலையை வெளிப்படுத்தும் பொதுவான பதிவாக இருக்கலாம் என்றும் கருத்து கூறுகின்றனர்.

அனுபமா பரமேஸ்வரன் தனது பதிவில் எந்த நபரையும் பெயர் குறிப்பிட்டு பேசவில்லை. மேலும், இந்த பதிவு துருவ் விக்ரமுடனான உறவு அல்லது பிரிவு தொடர்புடையது என்று அவர் எங்கும் கூறவில்லை.

அதேபோல், முன்னர் அனுபமா பரமேஸ்வரன் குறித்து வெளியான காதல் வதந்திகளுக்கும் எந்த அதிகாரப்பூர்வ உறுதிப்படுத்தலும் வெளியாகவில்லை.

எனவே, அவரது சமீபத்திய சமூக வலைதளப் பதிவை குறிப்பிட்ட நபர் அல்லது உறவுடன் தொடர்புபடுத்துவது தற்போதைக்கு ஊகமாக மட்டுமே உள்ளது. இதுகுறித்து அனுபமா பரமேஸ்வரன் அல்லது சம்பந்தப்பட்ட தரப்பினர் அதிகாரப்பூர்வமாக விளக்கம் அளிக்கும் வரை, சமூக வலைதளங்களில் பரவும் தகவல்களை உறுதிப்படுத்தப்பட்ட செய்தியாக கருத முடியாது.