விழுப்புரம் மாவட்டம் வானூர் அடுத்த திருவக்கரை அருகே உள்ள கொடுக்கூர் ஆதிதிராவிட நலப்பள்ளியில் சமூக நீதித் துறை அமைச்சர் வன்னி அரசு இன்று ஆய்வு செய்தார். அதன் பின்னர் செய்தியாளர்களை சந்தித்தார்.

அப்போது தமிழக இடைத்தேர்தலில் தவெக நட்சத்திர பேச்சாளர் பட்டியலில் இருந்து கூட்டணி கட்சி தலைவர்கள் பெயர் நீக்கப்பட்டுள்ளது குறித்து செய்தியாளர்கள் கேள்வி எழுப்பினர்.

அதற்கு, ''மதசார்பற்ற சமூக நீதி வெற்றிக் கூட்டணியின் நட்சத்திர பேச்சாளர்கள் என குறிப்பிட்டிருக்க வேண்டும். அப்படிதான் அவர்களும் நினைத்து இருப்பார்கள். ஆனால், தவெக என குறிப்பிட்டதால் நீக்கி இருக்கிறார்கள். கூட்டணியின் நட்சத்திர பேச்சாளர்கள் என திருத்தம் செய்து வெளியிடுவார்கள். நீக்கினாலும், நீக்காவிட்டாலும் அவர்கள் நட்சத்திர பேச்சாளர்கள்தான்.''என்று பதிலளித்துள்ளார்.

அதனைத்தொடர்ந்து, எதிர்கட்சிகளின் கேள்விக்கு பதில் சொல்ல வேண்டிய அவசியமில்லை என அமைச்சர் ஆதவ் அர்ஜுனா தெரிவித்துள்ளமை குறித்த கேள்வி எழுப்பப்பட்டது. 

அதற்கு பதிலளித்த வன்னியரசு ''ஆக்கபூர்வமான விமர்சனங்கள், கேள்விகளுக்கு பதில் சொல்லலாம். திட்டமிட்டு அவதூறு பரப்பும் கேள்விகளுக்கு பதில் சொல்ல தேவையில்லை என்ற நோக்கத்தில் ஆதவ் அர்ஜுனா சொல்லியிருக்கலாம்.

ஆக்கபூர்வமான கேள்விகளை வரவேற்கின்றோம். ஆக்கபூர்வமான கேள்விகள் என்றால், எங்களின் தவறுகளை திருத்துவதாக கூட எடுத்துக் கொள்ளலாம். இதற்கு பதில் சொல்ல தயாராக இருக்கிறோம்.'' என்று கூறியுள்ளார்.

மேலும், விசிக தலைவர் திருமாவளவன் பயணித்த ''TN CM 2031'' காரின் நம்பர் ப்ளேட் குறித்த கேள்வி எழுப்பப்பட்டது. அதற்கு ''ஒவ்வொன்றையும் அரசியல் நோக்கத்துடன் செயல்படுத்துகின்றனர். சமூக நீதி விழா நடத்திய நிறுவனம் ஏற்பாடு செய்திருந்த காரில்தான் திருமாவளவன் பயணம் செய்தார். இதனை அரசியலுக்காக பேசுவதை ஏற்க முடியாது. திருமாவளவனை முதல்வராக்குவதுதான் எங்களது கனவு. இதை நோக்கி ஒரு குறியீடாக சொல்லப்பட்டிருக்கலாம். உள்நோக்கத்துடன் விவாத பொருளாக மாற்றி இருக்கின்றனர்.''என்று பதிலளித்துள்ளார்.

அத்துடன், விவசாய கடன் தள்ளுபடி உட்பட அனைத்து கோரிக்கைகளையும் முதல்வர் விஜய் தீர்த்து வைப்பார். இடைத்தேர்தலில் மதசார்பற்ற சமூக நீதி வெற்றிக் கூட்டணி வெற்றி பெறும் என திருமாவளவன் கூறியதை நாள் வழிமொழிகின்றேன் என்று அமைச்சர் வன்னி அரசு தெரிவித்துள்ளார்.