தமிழக அரசியலில் பல ஆண்டுகளாக சாத்தியமே இல்லை என்று கருதப்பட்ட விஷயங்கள் தற்போது ஒன்றன்பின் ஒன்றாக நடந்து வருவதாக அரசியல் வட்டாரங்களில் பரபரப்பாக பேசப்படுகிறது. குறிப்பாக, திராவிட கட்சிகளின் கூட்டணி அரசியலில் எப்போதும் ஓரங்கட்டப்பட்டதாக கருதப்பட்ட கட்சிகள் இன்று நேரடியாக ஆட்சிப் பங்கில் இடம்பெற தொடங்கியிருப்பது மிகப்பெரிய மாற்றமாக பார்க்கப்படுகிறது.

திமுக ஆட்சியாக இருந்தாலும், அதிமுக ஆட்சியாக இருந்தாலும், விசிக, இடதுசாரிகள் அல்லது இந்திய யூனியன் முஸ்லீம் லீக் போன்ற கூட்டணி கட்சிகள் அமைச்சரவையில் இடம்பெறுவது என்பது அரிதான விஷயமாகவே இருந்து வந்தது. சில தொகுதிகள் கூட கிடைப்பதற்காக நீண்ட பேச்சுவார்த்தைகள் நடத்த வேண்டிய சூழல் நிலவியது.

ஆனால் தற்போது நடிகர் விஜய் தலைமையிலான தமிழக வெற்றிக் கழகம் ஆட்சியை பிடித்த பிறகு, அந்த அரசியல் கணக்குகள் முற்றிலும் மாறியுள்ளதாக கூறப்படுகிறது. தேர்தலுக்கு முன் கூட்டணிக் கட்சிகளுக்கு ஆட்சியில் பங்கு வழங்கப்படும் என்று விஜய் அளித்திருந்த வாக்குறுதியை, அவர் தற்போது நடைமுறைப்படுத்த தொடங்கியுள்ளார்.

இதன் ஒரு பகுதியாக, பல ஆண்டுகளாக தமிழக அமைச்சரவையில் இடம் பெற முடியாமல் இருந்த காங்கிரஸ் கட்சிக்கும் வாய்ப்பு கிடைத்துள்ளது. பெருந்தலைவர் காமராஜருக்கு பிறகு சுமார் 50 ஆண்டுகளுக்கு பின்னர் தமிழக ஆட்சியில் காங்கிரஸ் மீண்டும் அமைச்சரவை இடம் பெற்றிருப்பது குறிப்பிடத்தக்கதாக பார்க்கப்படுகிறது.

அதேபோல், இந்திய யூனியன் முஸ்லீம் லீக் கட்சியும் தவெக அமைச்சரவையில் பங்கேற்கும் முடிவை அதிகாரப்பூர்வமாக அறிவித்துள்ளது. “தவெக தலைமையின் அழைப்பின் பேரில் அமைச்சரவையில் இணைகிறோம்” என்று அக்கட்சி தெரிவித்துள்ளது.

இதற்கிடையில், விசிக தலைவர் திருமாவளவன் என்ன முடிவு எடுக்கப் போகிறார் என்ற எதிர்பார்ப்பு அரசியல் வட்டாரங்களில் அதிகமாக இருந்தது. காரணம், சில மாதங்களுக்கு முன்பு வரை “விஜய் ஆர்எஸ்எஸ் ஆதரவு அரசியல் செய்கிறார்” என விமர்சித்திருந்த திருமாவளவன், தவெக அமைச்சரவையில் இடம்பெற மாட்டோம் என்று கூறியிருந்தார்.

ஆனால் தற்போது, தவெக அரசின் அமைச்சரவையில் விசிக இடம்பெறும் என்று அவர் அதிகாரப்பூர்வமாக அறிவித்துள்ளார். “தவெக தரப்பில் இருந்து தொடர்ந்து அழைப்பு வந்தது. கட்சி நிர்வாகிகளுடன் ஆலோசித்து இந்த முடிவை எடுத்துள்ளோம். வன்னி அரசு அமைச்சரவையில் இடம்பெறுவார்” என்று திருமாவளவன் தெரிவித்துள்ளார்.

இதன் மூலம், விசிக திமுக கூட்டணியில் இருந்து விலகும் நிலைக்கு சென்றுவிட்டதாக அரசியல் விமர்சகர்கள் கருதுகின்றனர். ஏற்கெனவே காங்கிரஸ் மற்றும் ஐயூஎம்எல் போன்ற கட்சிகளின் நகர்வுகள் அறிவாலயத்திற்கு அதிர்ச்சியை ஏற்படுத்தியிருந்த நிலையில், தற்போது விசிகவும் தவெக பக்கம் சென்றிருப்பது திமுகவுக்கு பெரிய பின்னடைவாக பார்க்கப்படுகிறது.

இடதுசாரிகள் நேரடியாக அமைச்சரவைப் பங்கு கோரவில்லை என்றாலும், அவர்கள் கூட தவெகவுக்கு நெருக்கமாக செயல்பட்டு வருவதாக அரசியல் வட்டாரங்களில் பேசப்படுகிறது.

இந்த மாற்றங்களுக்கு பின்னால் உள்ள முக்கிய காரணம், கூட்டணி கட்சிகளுக்கு மரியாதையும் அதிகாரப் பங்கும் வழங்கும் விஜய்யின் அணுகுமுறைதான் என கூறப்படுகிறது. இதுவரை அமைச்சரவை வாய்ப்பு கூட கிடைக்காமல் இருந்த கட்சிகளுக்கு நேரடியாக ஆட்சிப் பங்கீடு வழங்கப்பட்டிருப்பது, அவர்களிடையே நல்ல வரவேற்பை ஏற்படுத்தியுள்ளது.

மேலும், பட்டியல் சமூகத்தைச் சேர்ந்த 7 பேருக்கு அமைச்சர் பதவி வழங்கியிருப்பதும் சமூக நீதி அரசியல் என்ற புதிய அடையாளத்தை உருவாக்கும் முயற்சியாக பார்க்கப்படுகிறது.

“அரசியல் தெரியாதவர்” என்று விமர்சிக்கப்பட்ட விஜய், தற்போது அமைதியாகவே அதிமுகவை பலவீனப்படுத்தி, திமுக கூட்டணியையும் பிரித்து, தமிழக அரசியலில் புதிய கூட்டணி சமன்பாடுகளை உருவாக்கி வருகிறார் என்ற கருத்து அரசியல் பார்வையாளர்களிடையே வலுத்து வருகிறது.