காவல்துறை அதிகாரி ஒருவரைச் சாதிப் பெயரைச் சொல்லி அவதூறாகப் பேசிய விவகாரத்தில், மத்திய இரயில்வே துறை இணையமைச்சர் ரவ்நீத் சிங் பிட்டூ பஞ்சாப் மாநில பட்டியலினத்தவர் ஆணையத்தின் (Punjab State Commission for Scheduled Castes) முன்பு இன்று நேரில் ஆஜராகி எழுத்துப்பூர்வமாக மன்னிப்புக் கோரியுள்ளார்.

கடந்த மே 26 அன்று, மத்திய அமைச்சர் ரவ்நீத் சிங் பிட்டூவிற்கும், பணியில் இருந்த காவல்துறை அதிகாரி ஒருவருக்கும் இடையே திடீர் வாக்குவாதம் ஏற்பட்டது. அப்போது, அந்த அதிகாரியின் சாதிப் பெயரைத் குறிப்பிட்டு அமைச்சர் பிட்டூ அவதூறாகப் பேசியதாகக் கடுமையான குற்றச்சாட்டு எழுந்தது. இந்தச் சம்பவம் முழுமையாகப் பதிவான வீடியோ காட்சிகள் சமூக வலைத்தளங்களில் வெளியாகி நாடு முழுவதும் பெரும் சர்ச்சையையும், கண்டனங்களையும் எழுப்பியது.

ஆணையத்தின் உத்தரவும் எழுத்துப்பூர்வ மன்னிப்பும்

வீடியோ வைரலானதைத் தொடர்ந்து, தனது பேச்சுக்கு அமைச்சர் பிட்டூ பொதுவெளியில் மன்னிப்புக் கோரியிருந்தார். எனினும், இந்த விவகாரத்தைக் கையில் எடுத்த பஞ்சாப் மாநில பட்டியலினர் ஆணையம், நேரில் ஆஜராகி விளக்கமளிக்குமாறு அமைச்சருக்கு முறைப்படி உத்தரவிட்டது. இதற்கு முன்பாக இருமுறை ஆஜராவதிலிருந்து விலக்கு பெற்றுத் தவிர்த்து வந்த மத்திய அமைச்சர் பிட்டூ, இன்று (ஜூன் 24, 2026) சண்டிகரில் உள்ள ஆணையத்தின் முன்பு இறுதியாக நேரில் ஆஜரானார். விசாரணையின் போது தனது தவறை ஒப்புக்கொண்ட அவர், எதிர்காலத்தில் இதுபோன்ற சம்பவங்கள் நிகழாது எனத் தெரிவித்து ஆணையத்திடம் எழுத்துப்பூர்வமாக மன்னிப்புக் கடிதத்தைச் சமர்ப்பித்தார்.

பரிகார வழிபாட்டிற்கு ஆணையம் ஆணை

அமைச்சரின் எழுத்துப்பூர்வமான மன்னிப்பை ஏற்றுக்கொண்ட பட்டியலின ஆணையம், இந்தத் தவறுக்கு உரியப் பரிகாரமாகப் பஞ்சாப் மாநிலத்தில் உள்ள மிக முக்கிய ஆன்மீக மற்றும் வரலாற்றுச் சிறப்புமிக்க நான்கு வழிப்பாட்டுத் தலங்களுக்கு நேரில் சென்று அவர் மரியாதை செலுத்த வேண்டும் என்று நிபந்தனையுடன் கூடிய உத்தரவைப் பிறப்பித்துள்ளது. அதன்படி:

பில்லூரில் உள்ள தேரா பாபா பிரம்மதாஸ் (Dera Baba Brahmdass)
ஜலந்தரில் உள்ள குரு ரவிதாஸ் மகராஜுடன் தொடர்புடைய தேரா சச்கந்த் பாலன் (Dera Sachkhand Ballan)
அமிர்தசரஸில் உள்ள பகவான் வால்மீகி தீரத் ஸ்தலம் (Bhagwan Valmiki Tirath Sthal)
அமிர்தசரஸில் உள்ள புகழ்பெற்ற சீக்கிய புனிதத்தலமான ஸ்ரீ தர்பார் சாஹிப் (Sri Darbar Sahib / Golden Temple)

ஆகிய நான்கு இடங்களுக்கும் மத்திய அமைச்சர் ரவ்நீத் சிங் பிட்டூ நேரில் சென்று வழிபாடு நடத்தி, தனது மரியாதையைச் செலுத்த வேண்டும் என ஆணையம் அறிவுறுத்தி வழக்கை முடித்து வைத்துள்ளது.