சட்டப்பேரவைத் தேர்தலில் ஆட்சியை கைப்பற்றியுள்ள தமிழக வெற்றிக் கழகத்திற்கு அடுத்த மிகப்பெரிய அரசியல் சவாலாக உள்ளாட்சித் தேர்தல் மாறியுள்ளது. சட்டப்பேரவையில் ஆட்சி மாறியிருந்தாலும், மாநகராட்சி, நகராட்சி, பேரூராட்சி உள்ளிட்ட உள்ளாட்சி அமைப்புகளில் திமுகவின் வலுவான அடித்தள கட்டமைப்பு தொடர்ந்து இருப்பதாக தவெக கருதுவதாக கூறப்படுகிறது.

இதனால், உள்ளாட்சி அமைப்புகளிலும் தனது அரசியல் ஆதிக்கத்தை நிலைநிறுத்துவதற்கான பல அடுக்கு வியூகங்களை தவெக வகுத்து வருவதாக கட்சி வட்டாரங்களில் தகவல்கள் வெளியாகியுள்ளன.

உள்ளாட்சித் தேர்தலை குறிவைத்து தவெக தற்போது திடீரென களமிறங்கவில்லை என்றும், கடந்த ஜூன் மாதமே அதற்கான ஆரம்பகட்ட பணிகள் தொடங்கிவிட்டதாகவும் கூறப்படுகிறது.

குறிப்பாக, உள்ளாட்சித் தேர்தலில் தனிப்பெரும்பான்மையுடன் வெற்றி பெறுவதற்காக, பிற கட்சிகளில் செல்வாக்குடன் இருக்கும் இரண்டாம் மற்றும் மூன்றாம் கட்ட தலைவர்கள், முன்னாள் நிர்வாகிகள் மற்றும் உள்ளூர் அரசியல் செல்வாக்கு கொண்டவர்களை தங்கள் பக்கம் கொண்டுவரும் முயற்சிகள் மேற்கொள்ளப்பட்டதாக தகவல்கள் தெரிவிக்கின்றன.

இதன் ஒரு பகுதியாக அதிமுகவைச் சேர்ந்த முன்னாள் அமைச்சர்கள், மாவட்டச் செயலாளர்கள், முன்னாள் எம்எல்ஏக்கள் உள்ளிட்ட பலர் தவெகவில் இணைந்ததாக கூறப்படுகிறது.

சென்னை உள்ளிட்ட முக்கிய நகரங்களில் பிற கட்சிகளில் அதிருப்தியில் இருக்கும் நிர்வாகிகள், தேர்தல் அனுபவம் கொண்டவர்கள் மற்றும் உள்ளூர் செல்வாக்கு மிக்கவர்களை அடையாளம் கண்டு கட்சிக்குள் கொண்டு வருவதற்கான முயற்சிகள் நடைபெற்றதாக கூறப்படுகிறது.

அதேநேரத்தில், கிராமப்புறங்களில் நகரங்களைப் போல அல்லாமல் வேறுபட்ட அணுகுமுறையை கையாள தவெக திட்டமிட்டுள்ளதாக தகவல்கள் தெரிவிக்கின்றன.

கடந்த தேர்தல்களில் போட்டியிட்டு குறைந்த வாக்கு வித்தியாசத்தில் தோல்வியடைந்தவர்கள், தங்கள் கட்சிகளில் ஓரங்கட்டப்பட்ட நிர்வாகிகள் உள்ளிட்டோரை அடையாளம் கண்டு அவர்களை தவெக பக்கம் கொண்டுவருவது ஒரு முக்கிய திட்டமாக இருந்ததாக கூறப்படுகிறது.

மேலும், குடிநீர், சாலை வசதி, தெருவிளக்கு, வேலைவாய்ப்பு உறுதித் திட்டம் உள்ளிட்ட மக்களின் அன்றாடப் பிரச்சினைகளை முன்வைத்து, ‘சமூகத் தணிக்கை’ என்ற பெயரில் களப்பணிகளை மேற்கொள்ளவும் திட்டமிடப்பட்டிருந்ததாக கடந்த ஜூன் மாத தகவல்கள் தெரிவித்தன.

தனக்கு சாதகமாக இருப்பதாக தவெக கணிக்கும் சுமார் 35 சதவீத வாக்கு ஆதரவை உள்ளாட்சித் தேர்தலில் முழுமையாக பயன்படுத்தி, பிரதான கட்சிகளுக்கு எதிராக பெரிய அளவில் வெற்றியைப் பெற வேண்டும் என்பதும் கட்சியின் முக்கிய அரசியல் கணக்காக இருப்பதாக கூறப்படுகிறது.இதற்காக கட்சி அமைப்பையும் விரிவுபடுத்தும் பணிகள் நடைபெற்று வருவதாக தகவல்கள் தெரிவிக்கின்றன.

தற்போதுள்ள 132 மாவட்ட அமைப்புகளை விரிவுபடுத்தி, தொகுதி அடிப்படையில் 234 கட்சி மாவட்டங்களை உருவாக்கவும், ஒவ்வொரு தொகுதிக்கும் ஒரு மாவட்டச் செயலாளரை நியமிக்கவும் திட்டமிடப்பட்டுள்ளதாக கூறப்படுகிறது.

தேர்தலில் போட்டியிட வாய்ப்பு கிடைக்காத மாவட்டச் செயலாளர்கள் மற்றும் தேர்தலில் தோல்வியடைந்த வேட்பாளர்களுக்கு வாரியத் தலைவர் உள்ளிட்ட அரசுப் பொறுப்புகளை வழங்கும் திட்டமும் இருப்பதாக ஏற்கனவே தகவல்கள் வெளியாகியிருந்தன.

இந்த நிலையில், தவெகவின் உள்ளாட்சித் தேர்தல் வியூகத்தில் அடுத்தகட்டமாக புதிய திட்டம் ஒன்று ஆலோசனையில் இருப்பதாக கூறப்படுகிறது.

உள்ளாட்சி அமைப்புகளின் பதவிக்காலம் அடுத்த ஆண்டு மார்ச் மாதம் வரை இருப்பதாக கூறப்படும் நிலையில், மாநகராட்சிகளை மட்டும் அதற்கு முன்பாக கலைப்பது குறித்து தமிழக அரசு ஆலோசித்து வருவதாக தகவல்கள் வெளியாகியுள்ளன.சட்டப்பேரவை கூட்டத்தொடர் நிறைவடைந்த பிறகு இதுதொடர்பான அறிவிப்பு வெளியாகலாம் என்றும் சில வட்டாரங்கள் தெரிவிக்கின்றன.

மாநகராட்சிகள் கலைக்கப்பட்டால், தற்போது தேர்ந்தெடுக்கப்பட்டுள்ள மன்றங்களுக்கு பதிலாக தனி அதிகாரிகளை நியமித்து மாநகராட்சி நிர்வாகத்தை அரசின் நேரடி கட்டுப்பாட்டில் கொண்டு வர முடியும். அதன்பிறகு குறிப்பிட்ட காலத்துக்குள் உள்ளாட்சித் தேர்தலை நடத்துவதற்கான திட்டம் குறித்து ஆலோசிக்கப்பட்டு வருவதாக கூறப்படுகிறது.

மாநகராட்சிகளை முன்கூட்டியே கலைப்பது குறித்து பேசப்படுவதன் பின்னணியில் முக்கியமான அரசியல் கணக்கு இருப்பதாக அரசியல் வட்டாரங்கள் சுட்டிக்காட்டுகின்றன.

சட்டப்பேரவையில் ஆட்சி மாறியிருந்தாலும், உள்ளாட்சி அமைப்புகளில் திமுகவைச் சேர்ந்த தேர்ந்தெடுக்கப்பட்ட பிரதிநிதிகள் மற்றும் உள்ளூர் அரசியல் வலையமைப்பு தொடர்ந்து செயல்பட்டு வருவதாக தவெக கருதுவதாக கூறப்படுகிறது.

இதனால், மாநில அளவில் ஆட்சி தங்களிடம் இருந்தாலும், அடிமட்ட அளவில் திமுகவின் அரசியல் செல்வாக்கு நீடிப்பதாக ஆளுங்கட்சி தரப்பு கணிப்பதாக கூறப்படுகிறது.

இந்த சூழலில் மாநகராட்சி நிர்வாகங்களை முன்கூட்டியே மாற்றியமைத்து, புதிய அரசியல் சூழலில் உள்ளாட்சித் தேர்தலை எதிர்கொள்வது தவெகவுக்கு சாதகமாக இருக்கும் என்பது ஆளுங்கட்சியின் கணக்காக இருக்கலாம் என அரசியல் பார்வையாளர்கள் தெரிவிக்கின்றனர்.

வரவிருக்கும் உள்ளாட்சித் தேர்தலில், திமுக ஆட்சிக் காலத்தில் மாநகராட்சி மற்றும் நகராட்சி நிர்வாகங்களில் நடைபெற்றதாக கூறப்படும் ஊழல் மற்றும் முறைகேடு புகார்களை முக்கிய பிரச்சார ஆயுதமாக பயன்படுத்தவும் தவெக தயாராகி வருவதாக தகவல்கள் வெளியாகியுள்ளன.

குறிப்பாக, நகராட்சி துறை தொடர்பான டெண்டர்களில் முறைகேடுகள் நடைபெற்றதாக முன்வைக்கப்படும் புகார்கள் குறித்து அரசு தரப்பு கவனம் செலுத்தி வருவதாக கூறப்படுகிறது.

இந்த விவகாரங்களை மக்கள் மத்தியில் எடுத்துச் சென்று, “உள்ளாட்சி நிர்வாகத்தில் மாற்றம் தேவை” என்ற மனநிலையை உருவாக்க முடியும் என தவெக தரப்பு கருதுவதாக கூறப்படுகிறது.

உள்ளாட்சித் தேர்தல் தொடர்பான இந்தத் திட்டங்களை தவெகவைச் சேர்ந்த மூத்த அமைச்சர்கள் ஏற்கனவே முதல்வர் விஜய்யின் கவனத்துக்கு கொண்டு சென்றுள்ளதாக கட்சி வட்டாரங்களில் தகவல்கள் தெரிவிக்கின்றன.

எனினும், மாநகராட்சிகளை முன்கூட்டியே கலைப்பது உள்ளிட்ட முக்கியமான முடிவுகள் அனைத்தும் முதல்வர் விஜய்யின் இறுதி முடிவுக்குப் பிறகே நடைமுறைக்கு வரும் என்றும் கூறப்படுகிறது.

மொத்தத்தில், தவெகவின் உள்ளாட்சித் தேர்தல் தயாரிப்பு என்பது வேட்பாளர்களை தேர்வு செய்வது என்ற ஒரே நடவடிக்கையில் முடிவடையவில்லை. கட்சி அமைப்பை வலுப்படுத்துவது, பிற கட்சிகளில் உள்ள உள்ளூர் செல்வாக்கு மிக்கவர்களை இணைப்பது, நகரங்கள் மற்றும் கிராமங்களில் தனித்தனி களப்பணிகளை மேற்கொள்வது என பல்வேறு கட்டங்களில் பணிகள் நடைபெற்று வருவதாக கூறப்படுகிறது.

இதனுடன் மாநகராட்சிகளை முன்கூட்டியே கலைக்கும் திட்டமும் நடைமுறைக்கு வந்தால், அடுத்த உள்ளாட்சித் தேர்தல் தவெகவுக்கு வெறும் உள்ளாட்சி பதவிகளுக்கான போட்டியாக மட்டுமல்லாமல், சட்டப்பேரவைத் தேர்தலுக்குப் பிறகு அடிமட்ட அரசியலிலும் தனது ஆதிக்கத்தை நிலைநிறுத்துவதற்கான முக்கியமான அரசியல் பரீட்சையாக மாறும்.