தமிழகத்தில் ஆட்சி மாற்றம் ஏற்பட்டுள்ள நிலையில், முந்தைய திமுக ஆட்சியில் அறிவிக்கப்பட்டு செயல்படுத்தப்பட்டு வந்த அல்லது செயல்படுத்தத் திட்டமிடப்பட்டிருந்த பல்வேறு திட்டங்கள் தற்போது ரத்து செய்யப்படுவது, நிறுத்தி வைக்கப்படுவது அல்லது மறுபரிசீலனை செய்யப்படுவது கவனம் பெற்றுள்ளது. முதலமைச்சர் விஜய் தலைமையிலான தவெக அரசு, சில திட்டங்களை கைவிட்டு, அதற்கு மாற்றாக புதிய திட்டங்களை அறிவித்து வருகிறது.

அந்த வகையில் திமுக ஆட்சியில் அறிவிக்கப்பட்டு தற்போது பாதியில் நிறுத்தப்பட்டுள்ள அல்லது ரத்து செய்யப்பட்டதாக கூறப்படும் முக்கிய திட்டங்கள் என்னென்ன என்பதை பார்க்கலாம்.

சென்னையின் எதிர்கால போக்குவரத்து தேவையை கருத்தில் கொண்டு, பரந்தூரில் சுமார் 5,746 ஏக்கர் பரப்பளவில் ரூ.27,000 கோடி மதிப்பீட்டில் இரண்டாவது விமான நிலையம் அமைக்க முந்தைய திமுக அரசு திட்டமிட்டிருந்தது. இதற்கான நிலம் கையகப்படுத்தும் பணிகள் சுமார் 50 சதவீதத்தை எட்டியிருந்த நிலையில், திட்டத்திற்கு எதிராக அப்பகுதி மக்கள் தொடர்ந்து போராட்டங்களை நடத்தி வந்தனர்.

இந்த நிலையில், பரந்தூர் விமான நிலையத் திட்டத்தை தவெக அரசு ரத்து செய்துள்ளது. இதற்கான அறிவிப்பை முதலமைச்சர் விஜய் ஆகஸ்ட் 24-ம் தேதி சட்டப்பேரவையில் வெளியிட்டதாக கூறப்படுகிறது.

பரந்தூரில் விமான நிலையம் அமைக்கப்படும் பட்சத்தில், அதனை சென்னையுடன் இணைக்கும் வகையில் மெட்ரோ ரயில் திட்டத்தையும் முந்தைய அரசு திட்டமிட்டிருந்தது. பூந்தமல்லியில் இருந்து பரந்தூர் விமான நிலையம் வரை சுமார் 53 கி.மீ. தொலைவுக்கு 20 ரயில் நிலையங்களுடன் இந்த மெட்ரோ வழித்தடம் வடிவமைக்கப்பட்டிருந்தது.

இதற்கான ஆய்வு அறிக்கை தயாரிக்கப்பட்டு மத்திய அரசுக்கு அனுப்பப்பட்டிருந்த நிலையில், பரந்தூர் விமான நிலையத் திட்டம் கைவிடப்பட்டதை தொடர்ந்து இந்த மெட்ரோ திட்டமும் தற்போது கைவிடப்பட்டுள்ளதாக தகவல்கள் தெரிவிக்கின்றன.

சென்னையின் கிழக்குக் கடற்கரை சாலையில் தொடர்ந்து நிலவும் போக்குவரத்து நெரிசலை குறைக்கும் நோக்கில், திருவான்மியூர் முதல் உத்தண்டி வரை 13.5 கி.மீ. நீளத்தில் நான்கு வழி உயர்மட்ட சுங்கச் சாலை அமைக்கும் திட்டம் முந்தைய திமுக ஆட்சியில் திட்டமிடப்பட்டது.

தமிழகத்தின் முக்கியமான உயர்மட்டச் சாலைத் திட்டங்களில் ஒன்றாக கருதப்பட்ட இந்த திட்டத்தை தற்போது தவெக அரசு கைவிட்டுள்ளதாக கூறப்படுகிறது.

அதேநேரத்தில், சுமார் 200 கி.மீ. நீளத்தில் சென்னை - புதுச்சேரி இடையே உயர்மட்ட கடற்கரை வழித்தடத்தை அமைக்கும் புதிய திட்டத்தை தவெக அரசு அறிவித்துள்ளதாக தகவல்கள் தெரிவிக்கின்றன.

கிண்டி மற்றும் வேளச்சேரி இடையே நிலவும் கடுமையான போக்குவரத்து நெரிசலை குறைக்கும் நோக்கில், சுமார் ரூ.310 கோடி மதிப்பில் மேம்பாலம் அமைக்கும் திட்டம் முந்தைய திமுக ஆட்சியில் அறிவிக்கப்பட்டது.

2025-ம் ஆண்டு தமிழக பட்ஜெட்டில் அறிவிக்கப்பட்ட இந்த திட்டத்திற்கு 2026 பிப்ரவரியில் அப்போதைய முதலமைச்சர் மு.க.ஸ்டாலின் அடிக்கல் நாட்டியிருந்தார். ஆனால், தற்போது இந்த திட்டத்திற்கான டெண்டர் ரத்து செய்யப்பட்டு, பணிகள் நிறுத்தி வைக்கப்பட்டுள்ளதாக கூறப்படுகிறது.டெண்டர் தொடர்பான சிக்கல்கள் மற்றும் நிதிப் பற்றாக்குறை காரணமாக இந்த நடவடிக்கை எடுக்கப்பட்டதாக தகவல்கள் தெரிவிக்கின்றன.

வரலாற்றுச் சிறப்புமிக்க காஞ்சிபுரத்தை சுற்றியுள்ள பகுதிகளை ஒருங்கிணைத்து புதிய நகர்ப்புற வளர்ச்சியை ஏற்படுத்தும் வகையில், சுமார் 62.78 சதுர கிலோமீட்டர் பரப்பளவில் 18 கிராமங்களை உள்ளடக்கிய புதிய நகர மேம்பாட்டுத் திட்டம் 2023 பிப்ரவரியில் அறிவிக்கப்பட்டது.இந்த திட்டமும் தற்போது தவெக அரசால் ரத்து செய்யப்பட்டுள்ளதாக கூறப்படுகிறது.

ஜெப்பியார் கல்வி அறக்கட்டளை ஆக்கிரமித்து வைத்திருந்த நிலத்தை சுமார் 20 ஆண்டுகள் நடைபெற்ற சட்டப் போராட்டத்திற்குப் பிறகு, முந்தைய திமுக அரசு 2021-ம் ஆண்டு மீட்டெடுத்தது.

அந்த நிலத்தில் செம்மஞ்சேரியில் சுமார் ரூ.261 கோடி மதிப்பில் பல்நோக்கு விளையாட்டு வளாகம் அமைக்க திட்டமிடப்பட்டது. இதற்கான அடிக்கல் கடந்த பிப்ரவரி மாதம் அப்போதைய முதலமைச்சர் மு.க.ஸ்டாலினால் நாட்டப்பட்டது.

இந்நிலையில், கடந்த ஜூன் மாதம் நடைபெற்ற ஆய்வுக் கூட்டத்துக்குப் பிறகு இந்த திட்டம் ரத்து செய்யப்பட்டதாக கூறப்படுகிறது. இதற்கு மாற்றாக, ஒலிம்பிக் போட்டிகள் உள்ளிட்ட தேசிய மற்றும் சர்வதேச அளவிலான பெரிய விளையாட்டு நிகழ்வுகளை நடத்தும் வகையில் புதிய திட்டம் செயல்படுத்தப்படும் என தவெக அரசு அறிவித்துள்ளதாக தகவல்கள் தெரிவிக்கின்றன.

கோவையில் சுமார் ரூ.300 கோடி மதிப்பில் நூலகம் மற்றும் அறிவியல் மையம் அமைக்கும் திட்டம் முந்தைய திமுக ஆட்சியில் செயல்படுத்தப்பட்டது. 2026-ம் ஆண்டின் தொடக்கத்தில் இந்த திட்டம் கிட்டத்தட்ட நிறைவடைந்திருந்ததாக கூறப்படுகிறது.

ஆட்சி மாற்றம் ஏற்பட்டதை தொடர்ந்து, கோவை பெரியார் நூலகம் மற்றும் அறிவியல் மையம் இன்னும் திறக்கப்படாமல் உள்ளது. இருப்பினும், வேண்டுமென்றே திறப்பு பணியை தாமதப்படுத்தவில்லை என்றும், விரைவில் இந்த மையம் திறக்கப்படும் என்றும் தவெக அரசு தரப்பில் தெரிவிக்கப்பட்டுள்ளதாக கூறப்படுகிறது.

உலகளாவிய திறன் மையங்களை ஈர்க்கும் நோக்கில், ஓசூர் பகுதியில் அறிவு வழித்தடம் அமைக்கும் திட்டம் முந்தைய அரசால் அறிவிக்கப்பட்டது. வெளிவட்டச் சாலை, சாட்டிலைட் டவுன் ரிங் ரோடு, பாகலூர் புறவழிச்சாலை உள்ளிட்ட முக்கிய சாலைகளை ஒட்டி சுமார் 30 சதுர கிலோமீட்டர் பரப்பளவில் இந்த திட்டத்தை செயல்படுத்த திட்டமிடப்பட்டது.

இதற்காக TIDCO நிறுவனம் 2025 செப்டம்பரில் டெண்டர் வெளியிட்டிருந்தது. ஆனால், இதுவரை பெரிய அளவிலான கட்டுமானப் பணிகள் அல்லது நில ஒதுக்கீடு தொடர்பான அறிவிப்புகள் வெளியாகவில்லை. இதனால் திட்டம் அடுத்தகட்டத்திற்கு செல்லாமல் கிடப்பில் இருப்பதாக கூறப்படுகிறது.

சென்னை சேப்பாக்கம் மைதானத்திற்கு இணையாக கோவையிலும் சர்வதேச தரத்திலான கிரிக்கெட் மைதானம் அமைக்கப்படும் என முந்தைய திமுக அரசு அறிவித்திருந்தது.

சுமார் 25,000 இருக்கைகள் கொண்ட சர்வதேச கிரிக்கெட் மைதானத்தை அமைப்பதற்காக 2025 அக்டோபரில் டெண்டர்கள் கோரப்பட்டன. ஆனால், அதன் பின்னர் பணிகள் எதிர்பார்த்த வேகத்தில் நடைபெறவில்லை என கூறப்படுகிறது.

இதனால் கோவை கிரிக்கெட் மைதானத் திட்டத்தின் தற்போதைய நிலை குறித்தும், அது முழுமையாக செயல்படுத்தப்படுமா என்பது குறித்தும் கேள்விகள் எழுந்துள்ளன.

இவ்வாறு, முந்தைய ஆட்சியில் அறிவிக்கப்பட்ட பல்வேறு உள்கட்டமைப்பு மற்றும் வளர்ச்சித் திட்டங்களில் சிலவற்றை தவெக அரசு ரத்து செய்தும், சிலவற்றை நிறுத்தி வைத்தும், மேலும் சிலவற்றை மாற்றியமைத்தும் வருவதாக கூறப்படுகிறது. அதேநேரத்தில், கைவிடப்பட்ட திட்டங்களுக்கு மாற்றாக புதிய திட்டங்கள் அறிவிக்கப்படுவதால், தமிழகத்தின் வளர்ச்சித் திட்டங்களில் ஏற்பட்டுள்ள இந்த மாற்றங்கள் அரசியல் மற்றும் பொதுவெளியில் கவனம் பெற்றுள்ளன.