மத்திய பிரதேச மாநிலத்தின் அனுப்பூர் மாவட்டத்தில் உள்ள பத்மேனியா பகுதியைச் சேர்ந்த 50-க்கும் மேற்பட்ட பக்தர்கள், கோவிலில் நடைபெறும் சிறப்பு வழிபாட்டில் பங்கேற்பதற்காக டிராக்டரில் உற்சாகமாக பயணம் மேற்கொண்டனர். ஆனால் அந்த ஆன்மிகப் பயணம் எதிர்பாராத விதமாக கோர விபத்தில் முடிந்தது.

பிஜாவுரா கிராமம் அருகே சென்றபோது, ஓட்டுநரின் கட்டுப்பாட்டை இழந்த டிராக்டர் திடீரென தடுமாறி சாலையோரத்தில் கவிழ்ந்தது. விபத்தின் தாக்கம் மிகுந்ததால், சம்பவ இடத்திலேயே இருவர் உயிரிழந்தனர்.

மேலும் 40-க்கும் மேற்பட்டோர் பலத்த காயங்களுடன் உயிருக்கு போராடினர்.இந்தத் தகவலறிந்த மீட்புக்குழுவினர் மற்றும் அவசர உதவிப் பணியாளர்கள் விரைந்து சென்று காயமடைந்தவர்களை மீட்டு உமரியா மாவட்ட மருத்துவமனை மற்றும் பாலி சமூக சுகாதார மையத்திற்கு சிகிச்சைக்காக அனுப்பி வைத்தனர்.

எனினும், தீவிர சிகிச்சை அளிக்கப்பட்டும் மேலும் நான்கு பேர் உயிரிழந்ததால் பலி எண்ணிக்கை ஆறாக உயர்ந்தது. பலர் தொடர்ந்து மருத்துவ கண்காணிப்பில் இருப்பதாக தெரிவிக்கப்படுகிறது.

இந்த துயரச் சம்பவம் மாநிலம் முழுவதும் அதிர்ச்சியை ஏற்படுத்தியுள்ளது. உயிரிழந்தோரின் குடும்பங்களுக்கு ஆழ்ந்த இரங்கல் தெரிவித்த முதல்-மந்திரி மோகன் யாதவ், அவர்களது குடும்பங்களுக்கு தலா ரூ.4 லட்சம் நிவாரண உதவி வழங்கப்படும் என அறிவித்துள்ளார்.

பக்தி பயணமாக தொடங்கிய இந்தச் சுற்றுலா, பல குடும்பங்களை கண்ணீரில் ஆழ்த்திய சோக நிகழ்வாக மாறியுள்ளது.