தமிழக அரசியலில் தவெக–காங்கிரஸ் இடையேயான உறவில் ஏற்பட்டுள்ள விரிசல் தற்போது மேலும் வெளிப்படத் தொடங்கியுள்ளது. தவெக ஆட்சிக்கு ஆதரவு அளித்தது தொடர்பான காங்கிரஸின் முடிவு தவறாகிவிட்டதாகவும், தற்போது அந்த முடிவால் அவமானப்பட்டு நிற்பதாகவும் தமிழக காங்கிரஸ் கமிட்டியின் முன்னாள் தலைவர் செல்வப்பெருந்தகை வேதனையுடன் தெரிவித்துள்ளது அரசியல் வட்டாரங்களில் கவனம் பெற்றுள்ளது.

1967-ம் ஆண்டுக்குப் பிறகு தமிழகத்தில் காங்கிரஸ் கட்சியால் தனித்து ஆட்சியைப் பிடிக்க முடியாத நிலை நீடித்து வருகிறது. இதனால் திமுக, அதிமுக உள்ளிட்ட கட்சிகளுடன் கூட்டணி அமைத்து தேர்தலை சந்தித்து வந்த காங்கிரஸ், குறிப்பிட்ட எண்ணிக்கையிலான தொகுதிகளில் மட்டுமே போட்டியிட்டு வந்தது. தேசிய அளவிலும் காங்கிரஸின் அரசியல் செல்வாக்கு கடந்த ஆண்டுகளில் சுருங்கியுள்ள நிலையில், ராகுல் காந்தியை பிரதமர் வேட்பாளராக முன்னிறுத்துவதும் அக்கட்சிக்கு சவாலாக இருந்து வருகிறது.

இந்த சூழலில்தான் நடிகர் விஜய் அரசியல் கட்சியை தொடங்கி, 2026 சட்டப்பேரவைத் தேர்தலை தனது முதல் இலக்காக அறிவித்தார். நாடாளுமன்றத் தேர்தலில் போட்டியிடாமல் சட்டப்பேரவைத் தேர்தலில் கவனம் செலுத்திய தவெகவுடன் கூட்டணி அமைக்க வேண்டும் என்ற விருப்பம் காங்கிரஸில் ஒரு தரப்பினரிடம் இருந்ததாக கூறப்பட்டது.

காங்கிரஸில் சில தலைவர்கள் தவெகவுடன் கூட்டணி அமைப்பதில் ஆர்வம் காட்டியதாக கூறப்பட்டாலும், திமுக கூட்டணியை தொடர வேண்டும் என்பதில் கட்சியின் மேலிடம் கவனம் செலுத்தியதாக தகவல்கள் வெளியாகின. இதற்கிடையே தொகுதி பங்கீடு பேச்சுவார்த்தையில் ஏற்பட்ட இழுபறிக்கு பிறகு, ப.சிதம்பரத்தின் தலையீட்டுடன் காங்கிரஸ் குறிப்பிட்ட எண்ணிக்கையிலான தொகுதிகளில் போட்டியிட்டதாக கூறப்படுகிறது.

தேர்தல் முடிவில் தவெக 108 தொகுதிகளில் வெற்றி பெற்ற நிலையில், ஆட்சி அமைக்க தேவையான பெரும்பான்மைக்கு கூடுதல் ஆதரவு தேவைப்பட்டது. இந்த சூழலில், ஏற்கெனவே விஜய் அறிவித்திருந்த ‘ஆட்சியில் பங்கு’ என்ற நிலைப்பாட்டை கருத்தில் கொண்டு காங்கிரஸ் தவெக ஆட்சிக்கு ஆதரவு அளித்ததாக கூறப்படுகிறது.

அதேநேரத்தில், திமுக கூட்டணியில் இடம்பெற்றிருந்த விசிக, கம்யூனிஸ்ட், மார்க்சிஸ்ட் கம்யூனிஸ்ட், இந்திய யூனியன் முஸ்லிம் லீக் உள்ளிட்ட கட்சிகளும் தவெக ஆட்சி அமைக்க ஆதரவு தெரிவித்ததாக கூறப்படுகிறது. ஆனால் காங்கிரஸ் மட்டும் திமுக தலைமையகமான அறிவாலயத்தை நோக்கி செல்லாமல் நேரடியாக தவெக பக்கம் சென்றது அரசியல் ரீதியாக முக்கியத்துவம் பெற்றது.

இந்நிலையில், தவெக தரப்பில் விஜய்யை 2029 நாடாளுமன்றத் தேர்தலுக்கான பிரதமர் வேட்பாளராக முன்னிறுத்துவது தொடர்பாக தொடர்ந்து கருத்துகள் வெளியாகி வருகின்றன. வட மாநிலங்களிலும் விஜய்க்கு ஆதரவாக சமூக வலைதளங்களில் பிரச்சாரம் நடைபெற்று வருவதாக கூறப்படுகிறது.

சமீபத்தில் கவுண்டம்பாளையம் தொகுதி தவெக எம்எல்ஏ கனிமொழி சந்தோஷ் தெரிவித்த கருத்தும் காங்கிரஸ் வட்டாரத்தில் கடும் அதிர்வை ஏற்படுத்தியது. விஜய்யை முதல்வர் நாற்காலியில் உட்கார வைத்தது போல, எதிர்காலத்தில் பிரதமர் நாற்காலியிலும் உட்கார வைப்பார் என அவர் பேசியிருந்தார்.

இந்த கருத்துக்கு பதிலளித்த தமிழக காங்கிரஸ் கமிட்டி தலைவர் மாணிக்கம் தாகூர், தேசிய அளவில் காங்கிரஸின் பிரதமர் வேட்பாளர் ராகுல் காந்திதான் எனத் திட்டவட்டமாக தெரிவித்தார். இதனால் ஏற்கெனவே இருந்த தவெக–காங்கிரஸ் கருத்து வேறுபாடு மேலும் தீவிரமடைந்துள்ளது.

இந்த பின்னணியில், ஒரு நாளேட்டுக்கு அளித்த பேட்டியில் செல்வப்பெருந்தகை தெரிவித்துள்ள கருத்து தற்போது முக்கியத்துவம் பெற்றுள்ளது.

தவெக ஆட்சிக்கு ஆதரவு அளிக்கும் முடிவை ராகுல் காந்தி எடுத்தாரா, வேறு யாராவது எடுத்தார்களா என்பதை தான் கூற விரும்பவில்லை என குறிப்பிட்ட அவர், “என்னை பிரதமராக்க வேண்டும் என்று ராகுலே நேராக வந்து கேட்பாரா? ஆக, ஏதோவொரு கணக்கில் நாங்கள் எடுத்த முடிவு தவறாகி அவமானப்பட்டு நிற்கிறோம்” என தெரிவித்துள்ளார்.

செல்வப்பெருந்தகையின் இந்த பேச்சு, திமுக கூட்டணியில் இருந்து விலகி தவெக ஆட்சிக்கு ஆதரவு அளித்த காங்கிரஸின் முடிவு குறித்து கட்சிக்குள்ளேயே தற்போது மறுபரிசீலனை தொடங்கியுள்ளதா என்ற கேள்வியை எழுப்பியுள்ளது.

ஒருபுறம் விஜய்யை தேசிய அரசியலில் முன்னிறுத்தும் தவெக தரப்பு நடவடிக்கைகள் வேகமெடுத்து வரும் நிலையில், மறுபுறம் ராகுல் காந்திதான் பிரதமர் வேட்பாளர் என காங்கிரஸ் தலைவர்கள் தொடர்ந்து வலியுறுத்தி வருகின்றனர். இதனால் 2029 தேர்தலை முன்னிட்டு தவெக–காங்கிரஸ் கூட்டணிக்குள் ஏற்பட்டுள்ள கருத்து மோதல் வரும் நாட்களில் எந்த அளவுக்கு தீவிரமடையும் என்பதே தமிழக அரசியல் வட்டாரங்களில் எதிர்பார்ப்பாக உள்ளது.