நடிகர் விஜய் தலைமையிலான தமிழக வெற்றிக் கழகத்திற்கு வழங்கியிருந்த ஆதரவை ஜனநாயக முஸ்லீம் மக்கள் கட்சி அதிகாரப்பூர்வமாக திரும்பப் பெற்றுள்ளது. கட்சியின் கொள்கைகள் மற்றும் சமீபத்திய செயல்பாடுகள் தொடர்பாக ஏற்பட்ட அதிருப்தியே இந்த திடீர் முடிவிற்கு காரணம் என அக்கட்சி தரப்பில் தெரிவிக்கப்பட்டுள்ளது.

கடந்த பத்து ஆண்டுகளுக்கும் மேலாக அண்ணா திராவிட முன்னேற்றக் கழகத்திற்கு ஆதரவளித்து வந்த இந்தக் கட்சி, கடந்த ஆண்டு முதல்முறையாக தேர்தல் அரசியலில் களமிறங்கத் தயாரான விஜய்யின் தமிழக வெற்றிக் கழகத்திற்கு ஆதரவு அளிப்பதாக அறிவித்தது.

ஆனால் அரசியல் சூழ்நிலைகளில் ஏற்பட்ட மாற்றங்களும், கட்சியின் செயல்பாடுகள் குறித்த ஏமாற்றமும் காரணமாக தற்போது அந்த முடிவிலிருந்து விலகியுள்ளது. இதையடுத்து, வரவிருக்கும் தேர்தலில் திராவிட முன்னேற்றக் கழகத்தின் தலைமையிலான அணிக்கு ஆதரவு வழங்கத் திட்டமிட்டுள்ளதாகவும், தேர்தலில் போட்டியிடும் வாய்ப்பையும் அக்கட்சியிடம் கேட்டுள்ளதாகவும் தகவல்கள் வெளியாகியுள்ளன.

இதுகுறித்து கட்சியின் நிறுவனர் தலைவர் எம். எப். தமீம் கூறுகையில், “கடந்த எட்டு மாதங்களாக தமிழக வெற்றிக் கழகத்துடன் இணைந்து பயணித்தோம். ஆனால் அவர்களின் செயல்பாடுகள் எங்களின் எதிர்பார்ப்புக்கு ஏற்ப அமையவில்லை.

கரூரில் நடைபெற்ற சம்பவத்தில் பாதிக்கப்பட்டவர்களை நேரில் சந்திக்க வேண்டும் என்று கேட்டபோதும் விஜய் வராதது எங்களுக்கு அதிருப்தியை ஏற்படுத்தியது. இதனால் தான் ஆதரவை திரும்பப் பெற முடிவு செய்தோம். வரவிருக்கும் தேர்தலில் திராவிட முன்னேற்றக் கழகத்தின் தலைமையிலான அணிக்கு ஆதரவு அளிக்க உள்ளோம்.

அதேசமயம், தேர்தலில் போட்டியிடவும் வாய்ப்பு கேட்டுள்ளோம்” என தெரிவித்துள்ளார்.இதற்கிடையில், ஜனநாயக முஸ்லீம் மக்கள் கட்சி தனது ஆதரவை வாபஸ் பெற்றிருந்தாலும், தமிழ்நாடு முஸ்லீம் லீக் மற்றும் எம்.ஜி.ஆர். அண்ணா திராவிட முன்னேற்றக் கழகம் போன்ற அமைப்புகள் நடிகர் விஜய்க்கு ஆதரவு தெரிவித்துள்ளன என்பது அரசியல் வட்டாரங்களில் குறிப்பிடத்தக்கதாக பார்க்கப்படுகிறது.